செவ்வாய், 13 ஜூலை, 2010

என்ன வேண்டும் நீ எனக்கு?

என்ன வேண்டும்
நீ எனக்கு?

ஐயிரண்டு மாதங்கள்
அவள் கருவின்
பையிருந்து வந்ததனால்
அம்மா.

பசியின்றி வளரவைத்து
படிக்கவைத்து ஆளாக்கி
பார்த்துப் பார்த்து வளர்த்ததினால்
அப்பா.

ஓராண்டு கழித்துவந்து
ஒன்றாக உண்டுறங்கி
சண்டையிட்டு மகிழ்ந்ததினால்
சகோதரன்.

ஆனால்
என்ன வேண்டும் நீ எனக்கு?



பள்ளிசெல்லும் வயதில்
என் மனக்குளத்தில்
நீ எறிந்த கல்
இன்னும் குமிழிகளை
விட்டுக் கொண்டேயிருக்கிறது
கவிதைகளாய்....

உன்னிடம் தான்
கருப்பு வைரமாய்
கனலும் எண்ணங்களை
வெண்முத்துக் கவிதைகளாய்
வெளியிடக் கற்றேன்.

நீதான்
வகுப்புக்குள் எனக்கோர்
வாசகர் பேரவை
வாங்கித் தந்தாய்.

நான்
கவிதை எழுதக்
காரணமாயிருக்கும்
முக்கிய மூவரில்
நீங்களும் ஒருவர்.

என்னதான் நான்
சுயமாய் எழுதினாலும்
ஏதோ ஓர்வரியில்
நீவந்து சிரிக்கிறாய்.

அதனால்தான் - இன்று
வாழ்த்துச் சொல்வதற்கு
வாசகனைத் தாண்டியதொரு
நெருக்கமிருக்கிறது எனக்கு.

கவிப்பேரரசு வைரமுத்துவுக்கு
இனிய பிறந்தநாள் நல்வாழ்த்துக்கள்.

இப்படிக்கு
குரு துரோணர்
கிராமத்தில் வாழும்
உங்கள் ஏகலைவன்
கலாநேசன்.













செவ்வாய், 6 ஜூலை, 2010

சொல்வரந்தருவாய்...

என்னுயிர்த் தோழியின் திருமணத்திற்காய் தில்லியில் இருந்து திருச்சி சென்ற என்னால் அவள் திருமணத்திற்குச் செல்ல இயலவில்லை. அதனால் கோபம் கொண்ட அந்த குழந்தை மனதுக்காரி ஒன்றரை வருடமாய் என்னோடு பேசுவதில்லை. அவளுக்காய் ஓர் கவிதை...

நட்புக்கு உயிர்தந்த
என்னுயிர்த் தோழிக்கு
நல்மண வாழ்த்துக்கள்.

வரவில்லை நாங்களென
வருந்தாதே - நீயுன்
கண்நிறைந்த காதலரைக்
கைப்பிடிக்கும் தருணம்காண
காத்திருந்தேன்.

முதன்முதலாய்
தியானா பங்குபெறும்
திருமணம் இதுவென்றே
நானும் நினைத்திருந்தேன்
நடைமேடைக் கனவுகண்டேன்.

இடையில் காலத்தால்
தடைவந்து தாக்கியதும் - என்
பாதிஉயிர் மகளைப்
பார்த்துக் கொண்டதையும்
மீதிஉயிர் ஓடிவந்துன்
மெட்டிஒலி கேட்டதையும்
உணர்ந்தாயா நீ?

சரி சரி.
விளக்கங்கள் மட்டும் சொல்ல- இது
விடுமுறைக் கடிதம் அல்ல.

சுயநலக்காரனெனக்கு
சொல்வரம் நல்காய் - அறிவுச்
சுடர்மிகு எந்தேவி.

பதினெட்டு மாதங்களாய்
பதிலேதும் பேசாமல் - நீ
வாய்ப்பூட்டு போட்டு
வைத்திருக்கும் கைப்பேசி
மௌனத்தவம் கலைத்து
மனதோடு பேச
வாய்ப்பூட்டு.

தோழியே மீண்டும் நீ
தொடர்பு எல்லைக்குள் வா!

என்
உளறல்களைக் கவிதைகளாய்
மொழிபெயர்த்தச் செவிகளுக்காய்
காத்திருக்கின்றன நான்
வாங்கிவைத்த தோடுகளும்
வார்த்தைப் பூக்களும்......

சனி, 3 ஜூலை, 2010

புதுசா வந்திருக்கு பூச்சி ஜோசியம்

கிளி ஜோசியம், எலி ஜோசியம், பல்லி ஜோசியம், பாம்பு ஜோசியம் இன்னும் இன்னும் எத்தனையோ ஜோசியங்கள் மக்களை ஏமாற்றிக் கொண்டிருக்கின்றன. அந்த வகையில் புதிதாய் வந்திருப்பது பூச்சி ஜோசியம்.

உலகக் கால்பந்துத் திருவிழா கலைகட்டி இப்போது காலிறுதிச் சுற்றுகள் நடைபெறுகிறது. உலகிலேயே அதிக மக்களால் பார்க்கப்படும் ஒரு விளையாட்டில் இப்படி ஒரு கேலிக் கூத்தா என எண்ண வைக்கிறது சமீபத்திய நிகழ்வுகள்.


நீங்கள் மேலே பார்க்கும் இந்த நீர்வாழ் எட்டுக்கால் பூச்சி ஆக்டோபஸ் வகையைச் சேர்ந்தது. இதன் பெயர் ஆரக்ல் (எ) பால். இங்கிலாந்தில் பிறந்த இந்த இரண்டு வயது பூச்சி தான் ஜெர்மனியில் இப்போது VIP . இது ஜெர்மனி விளையாடும் எல்லா போட்டிகளின் வெற்றி தோல்விகளையும் நாலு நாள் முன்னரே நச்சென்று சொல்லி விடுகிறதாம்.

எப்படின்னா, ஒரு தொட்டியில் இரண்டு கண்ணாடிக் கோப்பைகளை வைத்து இரண்டிலும் ஒவ்வொரு துண்டு மாமிசத்தை வைத்து மூடி விடுகிறார்கள். இரண்டு கண்ணாடிக் கோப்பைக்கு வெளியிலும் இரு நாட்டின் கொடியிருக்கும். பிறகந்த தொட்டிக்குள் ஆச்டோபசை விடும் போது அது எந்த தொட்டில் உள்ள மாமிசத்தை உண்கிறதோ அந்த நாடு ஜெயிக்கும். சிம்பிள்.

இதுவரை ஜெர்மனி விளையாண்ட நான்கு போட்டிகளின் முடிவையும் மிகச் சரியாய் சொல்லிவிட்டதிந்த பூச்சி. முதலிரண்டில் ஜெர்மனி ஜெயிக்கும் என்றது. ஜெயித்தது. மூன்றாவதில் செரிபியாவுடன் தோற்கும் என்றது. ஜெர்மனி தோற்றது. நான்காவதுப்  போட்டியில் உடனே ஓடிப்போய் ஜெர்மானிக் குடுவையில் கரி தின்றதால் எளிதாய் இங்கிலாந்து தோற்றது, 4-1 என்ற கோல் கணக்கில். இந்த போட்டியில் நடுவர்களே பூச்சியின் பேச்சைத் தான் கேட்டார்கள் என்பது கூடுதல் சுவாரசியம்.



இன்று நடக்கும் அர்ஜென்டினாவுடனான காலிறுதிப் போட்டியிலும் ஜெர்மனியே ஜெயிக்குமாம். பூச்சி சொல்லிடுச்சி நாமெல்லாம் மேட்சே பார்க்க வேண்டாம். அதுவும் 45 நிமிடம் யோசித்துச் சொன்னதால் ஜெர்மன் வீரர்கள் கவலையாய் உள்ளனர். ஏனென்று கேட்டால், இங்கிலாந்துப் போட்டியின் முடிவை பூச்சி உடனே சொல்லிவிட்டதால் எளிதாய் வென்றார்கள். இப்போது 45 நிமிடம் யோசித்துச் சொன்னதால் மிகவும் போராடியே ஜெயிக்க வேண்டியிருக்குமாம்.



எனக்கு சில சந்தேகங்கள்
1) ஆக்டோபசுக்கு வயிறார உணவிட்டால் அது ஒரு துண்டு கறிக்காக ஓடி வருமா?
2) வெற்றி தோல்வியின்றி முடியும் போட்டிகளை எப்படிச் சொல்லும்? (இரண்டிலும் பாதி பாதி சப்பிடுமோ!)
3) இதை எல்லாம் விட முக்கியமாய், ஒற்றைப் பந்தின் பின்னால் ஒன்றரை மணி நேரம் ஓடி ஓடி வெற்றிக்காய் போராடும் வீரர்களிடம் நீ தோற்றுப் போவாய் என நாலு நாள்  முன்னரே சொல்லுவது நியாயமா?

நல்லாத்தான் பூச்சி காட்றாங்கப்பா.

புதன், 30 ஜூன், 2010

கூட்டாஞ்சோறு 30.06.2010

வணக்கம். அவியல், குவியல், கொத்துபரோட்டா போன்ற எண்ணச் சிதரல்களுக்கான குறிசொல் வரிசையில் இதோ என்னுடையது கூட்டாஞ்சோறு (சின்ன புள்ளத் தனமா இருக்கோ?). நிறைய பதங்களை யோசித்துப் பார்த்தபின் இதுவே எனக்குப் பிடித்திருக்கிறது. வேறேதும் உங்களுக்குத் தோன்றினால் பகிருங்கள். பரிசளிப்பேன். இல்லை இல்லை பரீசலிப்பேன். (நாங்கல்லாம் இலவசமா கொடுப்பதையே காசு கொடுத்து வாங்கற ஆளு, என்கிட்டே இருந்து பரிசா?). சரி சரி, பொங்கலாமா....

1 . ஒவ்வொரு பூக்களுமே சொல்கிறதே....(ஆட்டோகிராப் ), ஒவ்வொரு பற்களிலும் சிரித்தேன் (பாய்ஸ்) இந்த பாடல் வரிகளில் இலக்கணப் பிழை இருப்பதாக எனக்குள் இருக்கும் நக்கீரன் சொல்றாரு. அது 'ஒவ்வொரு பூவுமே, ஒவ்வொரு பல்லிலும்' ன்னு தானே இருக்கணும். பின்ன ஏன் அப்படி எழுதினார்கள். யாராவாது விளக்குங்கள். (மேல 'நாங்கல்லாம்' னு  இருக்கறது நானெல்லாம்னு தானே இருக்கணும். தன் தவறைத் தானே கண்டறிந்த தானைத் தலைவன் ...........)

2. கடந்த பதினேழாம் தேதி, டில்லியில் உள்ள பன்னாட்டு விமான நிலையத்தில் ஒரு செல்போனை சுட்டுட்டாங்க. (ஒண்ணு தானா??). சுட்டவனுக்குத் தெரியாது, சிறப்புப் பாதுகாப்புப் படையில் இருந்து அத சீகிரமாக் கண்டுபிடிச்சி வீட்டுக்கே வருவாகன்னு..! ஏன்னா அந்த செல்போனுக்குச் சொந்தக்காரர் காங்கிரஸ் பொதுச் செயலாளர் (வருங்காலப் பிரதமர்?) ராகுல் காந்தி. ஞாயிற்றுக் கிழமை போனை பறிமுதல் செய்து ராகுலிடம் ஒப்படைத்தனர், கேஸே போடாமல்..

3. எந்த ஒரு கலந்துரையாடலின் போதும் மற்றவர் கருத்துக்கு மதிப்பு கொடுத்து கேளுங்கள். பின் யோசித்து முடிவெடுங்கள். எந்த விசயத்தையும் ஒரே கோணத்தில் பார்ப்பது சரியல்ல. கீழே உள்ளது தவளை என நாம் வாதிடலாம். அதுவே வேறோர் கோணத்தில் (உண்மையில்) குதிரையாகக் கூட இருக்கக் கூடும்.


                                                   ரோட்டேட்டு.....
 இன்னும் பொங்குவோம்...........

ஞாயிறு, 27 ஜூன், 2010

எனக்கே எனக்காய்...

இரண்டாயிரமாம் ஆண்டு. ஏப்ரலில் ஒருநாள். சூரிய வாத்தியார் பகலைச் சொல்லிக்கொடுத்து போனபின்பு பூமி தன் இரவு வகுப்பெடுக்கும் நிலவு டீச்சருக்காய் காத்திருந்த முன்னிரவு. அப்போது நான் உதகையில் உள்ள ஒரு மருந்தாக்கியல் கல்லூரி மாணவன். ரோட்டரேக்ட் க்ளபின் சந்திப்பிற்காக நாங்கள் உதகையில் உள்ள ஓர் உய்தர விடுதியொன்றில் குழுமியிருந்தோம். (Hotel Monarch)

வைரமுத்துவும் அங்கு வந்திருப்பதாக காற்றில் கசிந்த செய்தி கேட்டு அறை எண் விசாரித்தோம். அந்த புத்திசாலி வரவேற்பாளர்(!) அறை என்னைச் சொல்லிவிட்டு அனுமதி இல்லை என்றாள். நானும் நண்பர்கள் இருவரும் திருட்டுத்தனமாய் மேலே வந்து அறைக்கதவைத் தட்டினோம்.

ஒல்லியாய்  ஓர் உருவம் கதவைத் திறந்தது. நாங்கள் இங்குள்ள மருந்தாக்கியல் கல்லூரி மாணவர்கள். திரு வைரமுத்துவை சந்திக்க வேண்டுமேன்றோம். வாருங்கள் உள்ளே என்றார். அறையில் மொத்தம் மூவர் இருந்தனர். பார்த்தவுடன் தெரித்தது அங்கோர் பாடல் உருவாகிக் கொண்டிருப்பது.

படபடப்பு, பிரமிப்பு, உற்சாகம் என எல்லாம் சேர்ந்த ஒரு கலவை என்னை உந்தித் தள்ளியது. நான் வைரமுத்துவின் காலில் விழுந்து ஆசி வாங்கினேன். நண்பர்கள் இருவரும் அப்படியே செய்தனர். பின் வைரமுத்து அங்கிருந்த இருவரையும் அறிமுகப் படுத்தினார். இவர் (கதவைத் திறந்தவர்) கண்ணெதிரே தோன்றினாள் என்ற வெற்றிப் பட இயக்குனர் ரவிச்சந்திரன். இவர் இளம் இசையமைப்பாளர் ஹாரிஸ் ஜெயராஜ் என்றார்.

சில நிமிட உரையாடளுக்குப்பின் எங்களுக்கு உரைத்தது கையெழுத்து வாங்கக்கூட எங்களிடம் காகிதம் இல்லையென்று. உடனே வைரமுத்து தான் பாட்டெழுதிக் கொண்டிருந்த தாளுக்கு அடுத்த தாளில் மூவருக்கும் சேர்த்து மூன்று கையொப்பமிட்டுக் கொடுத்தார்.

அறைக்கு வைத்தும் முதல் வேலையாய் அத்தாளை மின்விளக்கின் மிக அருகில் வைத்து பாட்டிற்காய் எழுதிய வரி பதிந்துள்ளதா என பார்த்தேன். உற்று நோக்கி ஒவ்வொரு எழுத்தாய் கோர்த்தபின் என்னுள் உற்சாகம் கரைபுரண்டது. வைரமுத்துவின் வரிகள் இசையோடு சேர்ந்து உலகறியும் முன்னர் எனக்கே என்னகெனக் குதித்தேன்.
அதிலிருந்த வரிகள்

" இருக்கும் கவிஞர்கள்
 இம்சை போதும்
 என்னையும் கவிஞன் ஆக்காதே...."
(பாடல்: குல்மொகர் மலரே..., படம்: மஜ்னு )

பின்பந்த ஒற்றைத் தாளை மூன்றாக்கிப் பங்கிட்டுக் கொண்டோம். இதோ என்பங்கு கீழே....

புதன், 16 ஜூன், 2010

பஞ்சாபில் பயங்கரம்

போபாலில் 3787 பேர் இறந்து போய் 26 வருடம் கழித்து அங்கு நடந்தது விபத்தா? வினையா? என்று தீர்ப்புக்கு எதிராய் போர்க்கொடி தூக்கும் நல்லவர்களே!
இதோ உங்கள் கண்முன்னே செத்துக்கொண்டிருக்கும் உயிர்களைப் பற்றியும் கொஞ்சம் சிந்தியுங்கள்.

பஞ்சாபில் மனநலம் பாதிக்கப்பட்ட குழந்தைகளின் முடிகளில் நடத்திய ஆய்வில் அளவுக்கதிகமான யுரேனியம் அவர்கள் உடலில் கலந்திருப்பதாகக் கண்டறியப்பட்டுள்ளது. இங்குள்ள மால்வா பகுதி வேதிப்பொருட்கள், கதிரியக்கம், உயிர் நச்சு என முக்கியமான மூன்று வழிகளிலும் மாசடைந்துள்ளது.

பஞ்சாபில் மூன்று மாவட்டங்களின் குடிநீரில் அளவுக்கு அதிகமான நைட்ரஜென் கலந்திருக்கிறது. இதை குடிப்பவர்களுக்கு புற்றுநோயும், பிறக்கும் குழந்தைகளுக்கு பிறவிக் குறைபாடும் வரும் வாய்ப்புகள் அதிகம். இது நிச்சயமாய் இங்குள்ள தொழிற்சாலை கழிவுகளாலும், விவசாய நிலத்தில் அளவுக்கு அதிகமாய் யூரியா பயன்படுத்துவதாலும் தான்.

இங்கு முதலமைச்சரின் மாவட்டத்தில் மட்டும் இதுவரை 1074 பேர் புற்று நோயால் இறந்து போயுள்ளனர் (1991-2009). இன்னும் 668  பேரின் நிலமை கவலைக்கிடம். அனுதினமும் 1144 லிட்டர் கழிவு நீர் சட்லட்ஜ் ஆற்றில் கலக்கிறதாம்.


மீண்டும் கேட்கிறேன்,
போபாலில் 3787 பேர் இறந்து போய் 28 வருடம் கழித்து அங்கு நடந்தது விபத்தா? வினையா? என்று தீர்ப்புக்கு எதிராய் போர்க்கொடி தூக்கும் நல்லவர்களே!
இதோ உங்கள் கண்முன்னே செத்துக்கொண்டிருக்கும் உயிர்களைப் பற்றியும் கொஞ்சம் சிந்தியுங்கள்.
இதற்கு என்ன செய்யப் போகிறோம் நண்பர்களே!

சனி, 12 ஜூன், 2010

பாப்பா பாட்டு

உலக வலைப்பூ வரலாற்றில் முதல் முறையாக என் செல்ல மகள் தியானாவுடன்  ஒரு தித்திக்கும் உரையாடல்.


நான்: உங்க பேர் என்ன?
அவள் : தியானா (நீ தான பேர் வச்ச. அதயேன் திரும்பத் திரும்ப நீயே கேக்குற. யாராவது தெரியாதவங்க கேட்டா பரவால...)


நான்: அப்பா பேர் என்ன?
அவள் : ணன்
நான்: அம்மா பேர் என்ன?
அவள் : டோமா

நான்: என்ன பாட்டு பிடிக்கும் ?
அவள் : குவா குவா வாத்து
              அம்மா இங்கே வா வா
              வர்றான் வர்றான் பூச்சாண்டி
              clap your hands
              chubby cheeks
              டாடி மம்மி
              old mc donald
              துஷ்யந்தா
              கியாம் கியாம் குருவி 
            ............................
நான்: போதும் போதும். பாட்டு லிஸ்ட் சொல்லி சோர்ந்து போயிருப்பீங்க. என்ன குடிகிறீங்க. வெறும் பாலா? சாக்லேட் பாலா(Horlicks)?
அவள் : வெறும் சாக்லேட்!!!

நான் : சரி ஒரு கதை சொல்லுங்க.
அவள் : மம் மம் பாட்டி (அவளோட அம்மாவோட அம்மா ) வடைஐ சுட்டாங்களா, அப்ப காக்கா வந்து ஒரு வடைய தூக்கிட்டு போயி ட்ரீ மேல உக்காந்துகிச்சாம். அப்போ ஒரு fox  வந்து காக்கா காக்கா நீ ரொம்ப அழகா இருக்க, ஒரு பாட்டு பாடுன்னு சொன்னுச்சாம். காக்கா கா கான்னு பாடும் போது வடை டம்முன்னு கீழ விழுந்துச்சாம். அத FOX மம் மம்னு சாப்டுசாம். அப்போ அந்த காக்கா சொன்னுச்சாம் வட போச்சே!

தியானாவுக்கு வரும் புதன் கிழமை இரண்டாவது பிறந்த நாள்.

(அவளுக்கு பிடித்த பாடல்களின் லிங்க் கொடுத்துள்ளேன். நேரமிருப்பின் உங்கள் குழந்தைக்கு காட்டுங்கள்)

Quote

Followers