சோமாயணம்

இனிய புத்தாண்டு நல்வாழ்த்துக்கள்

2012-01-01T08:20:00.000+05:30

அனைவருக்கும் இனிய புத்தாண்டு நல்வாழ்த்துக்கள்!

கிருஸ்துமஸ் வாழ்த்துக்கள்

2011-12-25T07:39:00.002+05:30

அனைவருக்கும் இனிய கிருஸ்துமஸ் தின நல்வாழ்த்துக்கள்

உங்களுக்குக் கொலைவெறி பிடிச்சிருக்கா?

2011-12-18T16:23:00.001+05:30

வலை நட்புகளுக்கு வணக்கம். நீண்ட இடைவெளிக்குப் பிறகு மீண்டும் சந்திப்பதில் மிக்க மகிழ்ச்சி.

வொய் திஸ் கொலவெறி கொலவெறி கொலவெறிடி? என்ற தனுஷின் பாடல் தான் இப்போது உலகம் முழுவதும் ஹிட். பாடல் யு டியூபில் வெளியான ஒரு மாதத்தில் சுமார் இரண்டரை கோடி ஹிட்ஸ் பெற்றுள்ளது. (இன்று காலை ஏழு மணியளவில் 24531657 ஹிட்ஸ். இதைப் பதிவிடும் நான்கு மணியளவில் 24,722,004 ஹிட்ஸ்). சுமார் எழுபதாயிரத்துக்கும் அதிகமானோர் முகப்புத்தகத்தில் இந்தப் பாடலைப் பகிர்ந்துள்ளனர். BBC செய்திகளில் இப்பாடலைப் பற்றி செய்தி வெளியிட்டதோடு BBC ரேடியோவில் இப்பாடலையும் ஒலிபரப்பினார்கள். அமெரிக்காவின் TIME இதழில் இப்பாடலைப் பற்றி எழுதுகிறார்கள். (Nonsensical, Semi-English Music Video Goes Viral in India. The song's lyrics are practically gibberish, but India can't stop listening.). வட இந்திய செய்தித் தொலைக்காட்சிகளில் முதல் முறையாக ஒரு தமிழ் சினிமாப் பாடலை விளம்பரப் படுத்துவதோடு "கொலைவெறிக்கு" அருஞ்சொற்பொருள் சொல்லி அசத்துகிறார்கள். அதெல்லாம் விடுங்க... சுமார் இரண்டு மாதங்களாய் பதிவேதும் எழுதாத நான் கடந்த இரண்டு வாரங்களாய் இப்பாடலைப் பற்றியோர் பதிவெழுத முயற்சி செய்துகொண்டிருந்தேன். அப்படி என்னதான் இருக்கிறது இந்தப்பாட்டில்...

இணையதளத்தில் வைரஸாய் இப்பாடல் பரவ தனுஷ் சொல்லும் காரணங்கள் என்ன?

அதிஷ்டம்.
பாட்டில் கொலைவெறியைத் தவிர வேறெங்கும் தமிழ் இல்லை. அதனால் வழக்கமான தமிழ்ப் பாடல்களுக்கான மொழித்தடை இதிலில்லை.
Its funny !
எளிமையான பாடல். யார் வேண்டுமானாலும் பாடலாம்.
பாடலின் சூழல். அதாவது பொண்ணுங்களால ஏமாறும் பசங்களின் பாடல். அதாவது ஒவ்வொரு பையனுக்கும் இந்தப் பாட்டோடு தொடர்பிருக்கு. (அப்போ உங்களையும் பொண்ணுங்க ஏமாத்தி இருக்காங்களா என்ற உடனடி கேள்விக்கு, "ஆமாம் ஒருமுறை" என்பது தனுஷின் பதில்.

கேட்டவுடன் நெஞ்சில் ஒட்டிக்கொள்ளும் மெட்டாக இருந்த போதும் இது இந்த அளவுக்கு ஹிட்டாக அதிஷ்டத்தையும் சேர்த்து அமிதாப் பச்சன், சோனி வீடியோ, ரஜினி என இன்னும் சில காரணங்கள் இருக்கின்றன.

அமிதாப் பச்சன்: பாடல் வெளியான முதல் வாரத்திலேயே அமிதாப் அதைப் பற்றி ட்விட்டரில் எழுதினார். ("Just heard #Kolaveri after much talk on it ... its so original and catchy ..congrats Dhanush and Aishwarya(Rajni's daughter) .. love").("how cool is Kolaveri di!!! slamming it LOUD! well done Dhanush and Aishwarya. big up guys!"). மேலும் அதைப் பற்றியோர் பேட்டியிலும் குறிப்பிட்டார். இது வட இந்தியர்கள் இப்பாடலைக் கவனிக்க உதவியது. (எங்கள் அலுவலகத்தில் சிலர் அமிதாப் பச்சனுக்குப் பிடித்தது என்பதாலேயே கைப்பேசியின் காலர் டியூனாக வைத்திருக்கிறார்கள்.)

தில்லியிலும் நான் செல்லும் இடங்களிலெல்லாம் இப்பாடலைக் கேட்க முடிகிறது. நேற்று எங்கள் அலுவலக பிக்னிக்கிலும் இசைக்கப்பட்ட முதல் பாடல் இதுதான். இப்படி அங்கிங்கெனாதபடி எங்கும் பரவியுள்ள இந்தப் பாட்டை உங்களுக்குப் பிடிக்கவில்லையா...

சிறுவன் நவீன் (பாடகர் சோனு நிகத்தின் மகன்) பாடுவதைக் கேளுங்கள் உங்களுக்கு மிகப்பிடிக்கும். இது டாப் சாங்கோ, பாப் சாங்கோ இல்லை. ஆனால் சூப் சாங். சூப்பர் சாங்.....வாழ்த்துக்கள் அனிருத்.

புகைப்பிடிக்க புதிய விதிகள்

2011-11-12T08:01:00.000+05:30

இந்திய சுகாதரத்துறை அமைச்சகம் அண்மையில் திரைப்படம் மற்றும் தொலைக்காட்சி நிகழ்சிகளில் புகைப்பிடிக்கும் காட்சிகளுக்கென புதிய விதிமுறைகளை வெளியிட்டுள்ளது. இந்த விதிமுறைகள் வரும் திங்கட்கிழமை (14 - 11 - 2011 ) முதல் படமாக்கப்படும் அனைத்துக் காட்சிகளுக்கும் பொருந்தும்.

வழக்கமாக புகைப்பிடிக்கும் காட்சிகளில் திரையின் கீழ் "புகைப்பிடித்தல் உடல்நலத்திற்கு கேடு" என்ற வரிகள் போடுவார்கள். அதனோடு சேர்த்து கதாநாயகனே புகைப்பிடித்தலின் தீங்கைப் பற்றி உங்களோடு குறைந்தது 20 நொடிகள் பேசுவார். இந்தக்காட்சி இருமுறை (படத்தின் துவக்கத்திலும் படத்தின் நடுவிலும்) காட்டப்படும். (நல்ல பஞ்ச் டயலாக் யோசிக்கலாம்!)
புகைப்படத்தின் துவக்கத்திலும் நடுவிலும் குறைந்தது 30 நொடிகள் புகைப்ப்டிதலின் தீமையைப்பற்றிய விளம்பரம் காட்டப்படவேண்டும்.
சிகரெட் மற்றும் புகையிலைப் பொருட்களின் கம்பெனிப் பெயர்கள் (Brand Name) காண்பிக்கக் கூடாது.
தணிக்கைக் குழுவில் சுகாதாரத்துறையில் இருந்தும் ஒருவர் பங்கேற்பார். புகைப்பிடிக்கும் காட்சியின் அவசியத்தை விளக்கிச் சான்றிதல் பெற வேண்டும்.

புகைப் பழக்கம் நுரையீரலைப் பாதிக்கும் என்பதும் அதன்பின் நுரையீரல் புற்று நோய் வரும் என்பதும் அனைவரும் அறிந்ததே. நுரையீரல் புற்று நோயால் பாதிக்கப்பட்டு அதன் பின்னர் 5 வருடங்களுக்கு மேல் உயிர் வாழ்பவர்கள் வெறும் 14 சதவீதம் மட்டுமே (மற்ற புற்று நோய்களுக்கு சராசரியாக 52 சதவீதம்) என்பதை நினைவில் கொள்க.

புகைப்பழக்கத்தால் புற்றுநோய் வர நீங்கள் புகைப்பிடிக்கத்தேவையில்லை. புகைப்பிடிப்பவரின் நண்பனாகவோ மனைவியாகவோ குடும்பத்தில் ஒருவராகவோ புகைக்கும் போது அருகில் இருந்தாலே போதும். (Passive Smoking ).

காதலால் கலக்கலாம் வா!

2011-10-20T06:54:00.001+05:30

உன்னை

வருடும் காற்றைக்

கொஞ்சம் வரச்சொல்...

உன்

வாசம் எனக்குக்

கொஞ்சம் தரச்சொல்.

விண்மீன் தோழியிடம்

புன்னகையைக் கொடுத்தனுப்பு.

விரல்களின் வெம்மையை

இரவிடம் கொடுத்தனுப்பு.

இதழ்களின் குளுமையை

முகிலிடம் தந்தனுப்பு.

நினைவுகளை மெத்தையாக்கி

நிலவிடம் தந்தனுப்பு.

திகட்டாத அன்பைத்

தீந்தமிழிடம் சொல்லியனுப்பு.

என்

கற்பூரக் காதலை

அக்னியாய் அணைத்துக்கொள்.

கொஞ்சுதலில் குழந்தையாய்

கெஞ்சுதலில் இளமையாய்

நேசத்தில் தாய்மையாய்

முழுதாய் கிரகித்துக்கொள்.

கடலுக்குள் கலக்கும்

நதிபோல

காதலுக்குள் கலக்கலாம்

வா!

உதயநிலா

2011-10-15T07:14:00.001+05:30

இன்று வடக்கு மற்றும் வடகிழக்கு இந்தியாவில் கர்வா சவுத் (KARVA CHAUTH) கொண்டாடப்படுகிறது. திருமணமான இந்துப் பெண்கள் கணவனின் நீண்ட ஆயுள் வேண்டி நிலவு வரும் வரை விரதமிருப்பார்கள். நிலவு வந்ததும் அதை நீரிலோ, துப்பட்டா அல்லது சல்லடை வைத்தோ பார்த்து பின் கணவன் முகம் பார்ப்பார்கள். "கடவுளே என் கணவனுக்கு ஆரோக்யமான நீண்ட ஆயுள் கொடு, நான் சுமங்கலியாக (இவனைத் தனியே தவிக்கவிட்டுட்டு!) இறக்க வேண்டும்" என வேண்டிக்கொள்வார்கள்.

கர்வா என்றால் மண்கலசம். சௌத் (சௌதா) என்றால் நான்கு (அதாவது கார்த்திகை மாதத்தின் பௌர்ணமியில் இருந்து நான்காவது நாள்). மண் கலசத்தில் நீரையோ அல்லது பாலையோ நிரப்பி அதில் பஞ்ச ரத்தினங்களை இட்டு தானமாகக் கொடுத்து கணவனுக்காக கடவுளிடம் வேண்டிக்கொள்ளும் பண்டிகை என்று பொருள்.

அந்த காலத்தில் வெகு தொலைவில் வாக்கப்பட்டுப் போகும் பெண்கள், ஏதாவது பிரச்சனை என்றால் தங்கள் குடும்பத்தை உடனடியாகத் தொடர்பு கொள்ள இயலாது. அதனால் நாத்தனார் அல்லது அருகில் உள்ள குடும்பத்துப் பெண்களை சகோதரியாக ஏற்று பிரச்சனைகளை பேசிக்கொள்ளவும் ஒருவருக்கு ஒருவர் உறுதுணையாக இருக்கவும் இந்தப் பண்டிகை பழங்காலத்தில் கொண்டாடப்பட்டது. இன்றோ சாமியார் மடத்தில் பூனை கட்டிய கதையாய், மருதாணி இட்டு வளையல் போட்டு புடவை கட்டும் பண்டிகையாகிப் போனது கர்வா சௌத்.

கர்வா சௌத் அன்று சூரிய உதயத்தில் இருந்து நிலவு வரும் வரை தண்ணீர் கூட குடிக்காமல் பெண்கள் கணவனுக்காக விரதமிருக்கிறார்கள். முன்தினமே கை நிறைய வளையல் வாங்கிக்கொண்டு மருதாணி இட்டுக்கொள்கிறார்கள். அன்று பெரும்பாலும் முகூர்த்த புடவைகளை கட்டிக்கொண்டு தெருவில் உள்ள பெண்களெல்லாம் ஒன்றாய் கூடி பூஜை செய்கிறார்கள்.

உதயநிலா

அன்று

சந்திரனைப் பார்த்த

சல்லடைத் தட்டுவழி

இந்திரனைப் பார்த்தாள்

ரதி - அதன்பின்

ஒவ்வொரு நாளும்

விடிகிறது அவனுக்கு

உதயநிலா முகம் பார்த்து...

மனசாட்சி (சவால் சிறுகதை-2011)

2011-10-11T00:02:00.000+05:30

சூரியத் தலைவரின் ஆட்சி முடிந்து நிலாராணி ஆட்சிக்கு வந்திருந்த முன்னிரவு. நட்சத்திரங்களுக்குப் போட்டியாக தெருவெங்கும் வண்ண வண்ண விளக்குகள் மின்னின. சாலையை மறித்துச் சமைத்த மேடைமுன் அமைச்சரின் உரைகேட்க ஆவலாய்க் காத்திருந்தது காசும் 'தண்ணியும்' கொடுத்துச் சேர்த்திருந்த மக்கள் வெள்ளம். வீட்டில் பல்பு பியூஸ் போனதால் அருகில் இருக்கும் சரத்தில் இருந்து குண்டு பல்பு ஒன்றைக் கழட்டிப் போகலாமா என தொண்டன் ஒருவன் யோசித்துக் கொண்டிருந்தான். வரிசையாய்க் கார்கள் வந்து நின்றதும் எழுந்த 'வாழ்க வாழ்க' கோஷம் அவன் கவனத்தைக் கலைத்தது. கூட்டம் கலையாமல் இருக்க மைக்கைக் கடித்து ஒப்பேத்திக் கொண்டிருந்த ஒருவன் அவசர அவசரமாய் அப்புறப்படுத்தப்பட்டான். அடுத்ததாக புரட்சிப் புயல், மங்கையர் குலம்காக்க தென் கங்கையில் வந்துதித்த வேங்கை, மாண்புமிகு சமூக நலத்துறை அமைச்சர் திரு.உத்தமன் அவர்கள் உங்களிடையே சிறப்புரை ஆற்றுவார் என வட்டச் செயலாளர் தன் கட்டைக் குரலில் கூவினார்.

வழக்கமான வசனங்களைச் சொல்லி முடித்ததும் அமைச்சர் தன் உதவியாளர் தயாரித்த உரையைத் துவங்கினார். மற்ற மாநிலங்களுடன் ஒப்பிடும் போது குழந்தைகள் நலத்தில், பெண்களைப் பேணுவதில், பணியாளர் உயர்வில், பழங்குடி இன மேம்பாட்டில் தமிழகம் முன்னோடியாகத் திகழ்கிறது. ஒவ்வொரு நாளும் நேபாளத்தில் இருந்தும் வங்கதேசத்தில் இருந்தும் ஆயிரக்கணக்கான பெண்களும், குழந்தைகளும் கொல்கத்தாவிற்கும் மும்பைக்கும் கடத்தப்படுகிறார்கள். நாட்டின் தலைநகர் தில்லியில் பாருங்கள் போன மாதம் கூட குண்டு வெடித்தது. இன்னும் இன்னும் பல புள்ளி விவரங்களைச் சொல்லி முடித்து, இதுபோன்ற எந்தப் பிரச்சனையும் இல்லாமல் தமிழ்நாட்டை அமைதிப் பூங்காவாக வைத்திருக்க அயராது பாடுபடுவேன் என்று இந்த மாமேடையில் உங்களுக்கு உறுதியளிக்கிறேன் என்று முடித்தார். நிகழ்ச்சி முடிந்ததும் தன் நீலாங்கரை பண்ணை வீட்டுக்கு ஓய்வெடுக்கக் கிளம்பினார் அமைச்சர்.

மறுநாள் காலை சமூக நலத்துறையின் அலுவலகக் கட்டிடத்தின் ஆறாவது மாடியில் தன் நாற்காலியில் சுழன்றபடி அமைச்சரின் உரையைப் படித்துக் கொண்டிருந்தார் குழந்தைகள் நல இயக்குனர் ராஜமாணிக்கம். ஓராண்டுக்கு முன்வரை டிபார்ட்மென்டில் இவர் முரட்டுச்சிங்கம். மிக நேர்மையானவர் என்று பல பரிசுகளையும் பாராட்டுகளையும் வாங்கியவர். அண்மையில் அமைச்சரான உத்தமனின் நட்பு கிடைத்ததும் அப்படியே மாறிப்போனார். நலத்திட்டங்களுக்கு ஒதுக்கப்படும் நிதியில் கைவைப்பது, அலுவலகத்தில் லஞ்சம் வாங்குவதெல்லாம் அமைச்சரின் செல்வாக்கால் அன்றாடப் பணிகளானது . இவர் மூலம் வசூலாகும் தொகையில் ஒரு பெரும்பகுதியை அமைச்சரிடம் கொண்டு சேர்க்க விஷ்ணு உதவினான். இன்டர்காமில் விஷ்ணுவை அழைத்து தன்னறைக்கு வரச்சொன்னார் ராஜமாணிக்கம்.

விஷ்ணு இதே துறையின் கணக்கெடுப்புப் பிரிவில் வேலை பார்ப்பவன். விஷ்ணுவும் ஆரம்பத்தில் ராஜமாணிக்கம் போல் நல்லவனாகத்தான் இருந்தான். சில நேரங்களில் சக அதிகாரிகள் லஞ்சம் வாங்குவதை போலீசில் கூட போட்டுக் கொடுத்திருக்கிறான். எல்லோரும் நல்லவர்களே, தவறு செய்யத் தகுந்த தருணம் கிடைக்கும் வரை. சில ஆயிரங்கள் மட்டுமே சம்பளம் வாங்கும் ஒருவனை பணத்தால் அடித்தால் அவன் ஊழலுக்குத் துணைபோகத்தானே செய்வான். கொள்கைப் பிடிப்போடு நேர்மையான வாழ்க்கை ஒருசிலருக்கே வாய்க்கிறது. அமைச்சரின் பார்வைக்கு அலுவலகக் கோப்புகளை அனுப்புவதாகச் சொல்லி விஷ்ணு மூலமே 'பெட்டி' அனுப்பத் துவங்கினார் ராஜமாணிக்கம். அதில் லஞ்சப் பணம் இருப்பது தெரியாமல் இருக்க விஷ்ணு என்ன பிஞ்சுக் குழந்தையா? பின்னர் இவனையும் கொஞ்சம் கவனிக்கத் துவங்கினார் ராஜமாணிக்கம். பிறகென்ன அடுத்தவர் செய்யும் தவறைப் பொறுத்துக்கொள்ள முடியாமல் போலீசில் சொன்ன உளவாளியே மெல்ல மெல்ல களவாணி ஆனான்.

அறைக்கதவை தட்டி உத்தரவு பெற்று உள்ளே நுழைந்தான் விஷ்ணு. வா விஷ்ணு, இதுவரை கொஞ்சம் கொஞ்சமாய் மட்டுமே காசுபார்த்த நமக்கு ஒரு பெரிய அமௌன்ட் கிடைக்கப் போகிறது. அடுத்த வாரம் மும்பையில் இருந்து சரக்கு வருகிறது. எல்லாச் சரக்கையும் பத்திரமாய் கொல்கத்தா அனுப்பினால் நம் வேலை முடிந்தது. பேசியபடி மொத்தத் தொகையும் நாளைக்கே நம் கைக்கு வந்துவிடும். அப்புறம் ஒரு முக்கியமான விஷயம், சமீப காலமாக உள்ளிருந்தே காவல் துறைக்கு யாரோ தகவல் தருகிறார்கள். அதனால் நீயும் போலிசுக்குத் தகவல் சொல்லிடு. அதாவது தவறான தகவல் சொல்லி காவல் துறையின் கவனத்தைத் திசைதிருப்பிவிட்டால் நம் வேலை மிகச் சுலபமாக முடிந்துவிடும். இரண்டு நாட்களுக்கு எனக்கு போன், மெசேஜ் எதுவும் பண்ணாதே! தவறான தகவலை போலிசுக்கு அனுப்பியதும், ஒரு துண்டுக் காகிதத்தில் எழுதி எனக்கு வரும் கடிதங்களோடு வைத்திடு என்று பேசிக்கொண்டே போனார். சரி சார், மும்பையில் இருந்து என்ன சரக்கு வருகிறது என்று கேட்டதற்கு அவர் சொன்ன பதிலில் அதிர்ந்தான் விஷ்ணு.

தன்னறைக்குத் திரும்பிய விஷ்ணு கவலையோடு யோசனையில் ஆழ்ந்தான். அடுத்தவாரம் மும்பையில் இருந்து வருவதாய்ச் சொன்ன சரக்கு விளையாட்டுப் பொருட்களோ, வெடிமருந்தோ, கஞ்சா அபினோ , கடத்தல் பொருட்களோ அல்ல. உயிருள்ள ஜீவன்கள். நேபாளத்தில் இருந்து கடத்திவரப்பட்ட அப்பாவி இளம்பெண்கள். தாதர் எக்ஸ்பிரஸில் வரும் அவர்களை சென்னையில் தங்க வைத்து ஹௌரா எக்ஸ்பிரஸில் கொல்கத்தா அனுப்புவது இவர்கள் வேலை. அங்கிருந்து அவர்கள் மத்திய கிழக்கு நாடுகளுக்கு அடிமைகளாக விற்பனை செய்யப்படுவர். அரசியல் அதிகார செல்வாக்குடன் மிகப்பெரிய நெட்வொர்க்கே இதற்குப்பின் செயல்படுகிறது. இவர்கள் அனைவரும் திருமணம், வசதியான வாழ்க்கை என ஆசை காட்டி நேபாளத்தில் இருந்து கடத்திவரப்பட்டவர்கள். ஒருசிலரை அறுபதாயிரம் ரூபாய்க்குப் பெற்றோரே விற்ற கொடுமையும் நடந்திருக்கிறது. சென்னை வருபவர்கள் ஒரு தனியார் அநாதை விடுதியில் தங்கவைக்கப்படுவர். ஒருசிலர் அமைச்சரின் பண்ணை வீட்டுக்கும் அனுப்பப்படுவர். மும்பையில் இருந்து நேரடியாக கொல்கத்தா கொண்டு செல்வதில் சில தடங்கல் ஏற்பட்டதால் இந்த மாற்று ஏற்பாடு. ராஜமாணிக்கத்துடன் சேர்ந்து சிறுசிறு தவறுகள் செய்திருந்த போதும் இத்தனை பேர் வாழ்க்கையைச் சீரழிப்பதில் விஷ்ணுவுக்கு உடன்பாடு இல்லை. நீண்ட யோசனைக்குப் பின் ஒரு முடிவுக்கு வந்தவனாய் கணினியில் சில வாசகங்களை டைப் செய்து பிரிண்ட் எடுத்தான். கூடவே மேலும் கீழும் சில வெள்ளைத்தாள்களைச் சேர்த்துப் பையில் போட்டுக்கொண்டான். 'பொறி' என்று கோகுலுக்கு மெசேஜ் அனுப்பிவிட்டு வீட்டுக்குக் கிளம்பினான் விஷ்ணு.

விஷ்ணு வீட்டிற்கு வந்ததும் முதல் வேலையாக தான் பிரின்ட் செய்து கொண்டுவந்திருந்த பேப்பரை எடுத்து டீப்பாயில் வைத்தபடி கீதா இங்கிருந்த ஸ்கேல் எங்கே என மனைவியிடம் வினவினான். என்னங்க பரீட்சை ஏதேனும் எழுதப்போறீங்களா வந்ததும் வராததுமா ஸ்கேல் கேக்குறீங்க என்றபடி ஸ்டீல் ஸ்கேலோடு வந்தாள் கீதா. தான் டைப் செய்திருந்ததை இரு பகுதிகளாக் கிழித்தான். பிறகு கவர் ஏதும் வாங்காமல் வந்துவிட்டதை உணர்ந்தவனாய், கீதா கடைக்குப் போயிட்டு வரேன் கதவை சாத்திக்கோ என்றபடி வீட்டிலிருந்து வெளியேறினான்.

கோகுல்நாத் நீங்கள் எல்லோரும் எதிர்பார்த்தது போல ஒரு நேர்மையான காவல்துறை அதிகாரி. முன்பு அலுவலகத்தில் லஞ்சம் வாங்கப்படுவதை முன்கூட்டியே விஷ்ணு போட்டுக் கொடுத்ததும் கோகுலுக்குத்தான். போனதடவை இருவரும் பேசிவைத்துக்கொண்ட சங்கேத வார்த்தை தான் பொறி. அதன் பிறகு விஷ்ணுவே ராஜமாணிக்கத்தின் பொறியில் மாட்டிக்கொண்டதால் கோகுலுக்கு தகவல் ஏதும் அனுப்பப்படவில்லை. வெகுநாட்களுக்குப் பிறகு விஷ்ணுவிடம் இருந்து மெசேஜ் வந்த போது கோகுல் வேறோர் வேலையாய் விஷ்ணுவின் வீடிருக்கும் பகுதியில் தான் இருந்தார். அந்த வேலை முடிந்ததும் விஷ்ணுவின் வீட்டிற்குக் கிளம்பினார்.

கடைக்குச் சென்றிருந்த விஷ்ணுவை எதிர்பார்த்துக் கதவைத் திறந்த கீதா கோகுலைப் பார்த்ததும் குழம்பினாள். நான் காவல்துறை அதிகாரி கோகுல்நாத், விஷ்ணு இல்லையா என்று கேட்டார். அவர் பக்கத்துலதான் கடைக்குப் போயிருக்கார், உட்காருங்கள் குடிக்க ஏதேனும் எடுத்து வருகிறேன் என்றபடி சமையலறைக்குச் சென்றாள் கீதா. சுவர்க்கடிகாரம், டிவி என்று நோட்டம்விட்டுக்கொண்டிருந்த கோகுல் டீப்பாயின் மேலிருந்த காகிதங்களைப் பார்த்தார்.

"Sir, எஸ்.பி.கோகுலிடம் நான் தவறான குறியீட்டைத்தான் கொடுத்திருக்கிறேன். கவலை வேண்டாம் - விஷ்ணு" என்று ஒன்றிலும் "Mr . கோகுல்- S W H2 6F இதுதான் குறியீடு. கவனம் - விஷ்ணு" என்று மற்றொன்றிலும் இருந்தது. இது என்ன குறியீடு என்று யோசித்துக் கொண்டிருக்கையில் கோகுலின் கைப்பேசி சிணுங்கியது. சார் நான் விஷ்ணு பேசறேன் ஞாபகம் இருக்குங்களா? உங்களிடம் ஒரு முக்கியமான விஷயம் பேசணும் என்றான். போனை கட் பண்ணிட்டு உன் வீட்டுக்கு வா பேசலாம் என்றார் கோகுல்.

விஷ்ணு வந்ததும், சமூக நலத்துறை (Social Welfare) அலுவலகத்தின் ஆறாவது மாடியில் இருக்கும் H2 பிளாக்கில் என்ன நடக்கப்போகிறது எனக்கேட்டார் கோகுல். எவ்வளவு எளிதாய் தன் குறியீட்டைப் புரிந்து கொண்டார் என வியந்த விஷ்ணு எல்லாவற்றையும் விளக்கமாகச் சொன்னான். கவனமாய் விஷ்ணு சொல்வதை முழுவதும் கேட்ட கோகுல்நாத், நாளை ராஜமாணிக்கத்தை நிச்சயம் கைது செய்யப் போவதில்லை என்றார். அதைக்கேட்டு அதிர்ந்த விஷ்ணுவின் முகபாவத்தை ரசித்தபடி தொடர்ந்தார். நாளை கைது செய்தால் ராஜமாணிக்கத்தைத் தவிர அமைச்சர் உட்பட அத்தனை பேரும் தப்பி விடுவார்கள். அவர்கள் திட்டமிட்டபடி அப்படியே தொடரட்டும். நீ ராஜமாணிக்கத்திற்கு டைப் செய்துள்ள வாசகத்தில் "தவறான குறியீட்டைத்தான் கொடுத்திருக்கிறேன்" என்பதை "தவறான தகவலைக் கொடுத்துவிட்டேன்" என்று மாற்றி நாளை காலை அவருக்கு அனுப்பிவிடு. ராஜமாணிக்கத்தின் கைக்குப் பணம் வந்தபின் எனக்கு ஒரு மிஸ்டு கால் கொடு. நீ தவறாகக் கொடுத்தத் தகவலை உறுதிசெய்ய நான்காவது மாடிக்கு நாலு போலீசை அனுப்புகிறேன். பிறகு என்னவெல்லாம் செய்யவேண்டும் என்பதை விளக்கிச் சொல்லிவிட்டுக் கிளம்பினார் கோகுல்.

அடுத்த வாரத்தில் ஒருநாள் சென்னை சென்ட்ரல் ரயில் நிலையத்திற்கு வந்த தாதர் எக்ஸ்பிரஸில், மும்பையில் இருந்து கடத்தி வரப்பட்ட இருபது பெண்கள் போலீசாரால் மீட்கப்பட்டனர். இன்னும் சில வாரங்கள் கழித்து அமைச்சரின் தொடர்பு அறியப்பட்டதும் இவ்வழக்கு சி.பி.ஐக்கு மாற்றப்பட்டது. ராஜமாணிக்கம், உத்தமன் இன்னும் பல முக்கியப் புள்ளிகள் ஒருநாள் அதிகாலையில் கைது செய்யப்பட்டனர். நாடெங்கும் நீதியின் நம்பிக்கைக் கீற்றுகளை விதைத்தபடி அடிவானில் உதித்தான் ஆரஞ்சுச் சூரியன்.

குறிப்பு: இது பரிசல் + ஆதியுடன் 'யுடான்ஸ்' இணைந்து வழங்கும் சவால் சிறுகதைப் போட்டிக்கான சிறுகதை. யுடான்சில் நீங்கள் அளிக்கும் வாக்குகளுக்கு முடிவைத் தேர்வதில் 10 % பங்குண்டு. எனவே இந்தக் கதை உங்களுக்குப் பிடித்திருந்தால் கீழே உள்ள யு டான்ஸ் பட்டனில் உள்ள லைக்கைக் க்ளிக்கி தவறாமல் வாக்களிக்கவும். நன்றி.

உயிரின் விலை 27 ரூபாய்

2011-10-02T15:38:00.000+05:30

ரிஷி என்ற மனநிலை சரியில்லாத அண்ணனுக்கும் கணேஷ் என்ற உடல் ஊனமுற்ற அண்ணனுக்கும் ஒரே தம்பியான 22 வயது உமேஷ் குமார் பாண்டே மானேசர் - குர்கான் நெடுஞ்சாலையில் உள்ள ஓர் சுங்கச்சாவடியில் நான்கு மாதத்திற்கு முன்னர் பணியில் சேர்ந்தான். செப்டெம்பர் 22 நள்ளிரவு பன்னிரண்டு மணியளவில் வழக்கம் போல டோல் பூத்தில் பணம் வசூலித்துக் கொண்டிருந்தான். டோல் பூத் விதிகளின் படி அருகில் இருபது கிலோமீட்டர் சுற்றுவட்டத்தில் உள்ள கிராமங்களின் வாகனகளுக்கு சுங்கவரி கிடையாது.

வெள்ளை நிற போலீரோவில் விஜய்வீர் யாதவ் (28) டோல் பூத்திற்கு வந்த போது உமேஷ் 27 ரூபாய்க் கட்டணம் கேட்டான். அதை மறுத்த விஜய் தான் அருகில் உள்ள ஓர் கிராமத்திலிருந்து வருவதாகச் சொன்னான். விதிப்படி வண்டியின் ஒரிஜினல் RC காண்பித்தால் சுங்கவரி கட்டத் தேவையில்லை. விஜயிடம் RC எதுவும் இல்லை வெறும் ஓட்டுனர் உரிமம் மட்டுமே வைத்திருந்தான். இருந்த போதும் விஜய் மிரட்டியதால் உமேஷ் கேட்டைத் திறந்துவிட்டு போகும்படிச் சொன்னான். அதன் பின்னரும் சும்மா போகாமல் உமேஷை சுட்டுவிட்டுச் சென்றான் அப்பாவி. கழுத்தில் குண்டு பாய்ந்து சுருண்டு விழுந்தான் உமேஷ். இந்த வீடியோவைப் பாருங்கள்.

கேட் திறந்தே இருந்ததால் பின்னிருந்த ஐந்தாறு வாகனங்களும் கிடைத்த வாய்ப்பைப் பயன்படுத்தி டோல் செலுத்தாமல் வேகமாய் வெளியேறின... உயிருக்குப் போராடிக்கொண்டிருந்த உமேஷை விட்டுவிட்டு. பின்னொரு ட்ரக்காரர் கவனித்து தகவல் சொல்லி மருத்துவமனை கொண்டுசெல்லும் முன் உயிர்விட்டான் உமேஷ். நியாயமாய் 27 ரூபாய்க் கட்டணம் செலுத்தச் சொன்னதற்காக கொலைசெய்யப்பட்ட கொடுமையை என்னவென்று சொல்வது. உமேஷின் மறைவால் மூன்றே மாதத்திற்கு முன் உமேஷை மணந்தவளும் உமேஷின் சம்பளத்தை மட்டுமே நம்பி உயிர்வாழ்ந்த நால்வரும் (வயதான பெற்றோர்கள் மற்றும் இரு அண்ணன்கள்) மீளாத்துயரில் வாடுகின்றனர். அவர்களுக்கு ஆறுதல் சொல்ல நம்மிடம் வார்த்தைகளில்லை. இந்தக் குடும்பத்திற்கு உதவ முன்வருவோர் கீழ்காணும் முகவரிக்கு காசோலை அனுப்பலாம். (நன்றி: NDTV)

Ramrati Pandey
Account Number: 30496591243
State Bank of India
Birha, Bijhauli, Hanumana,
Rewa, Madhya Pradesh
India
Pin Code: 486335

மேலும் விவரங்களுக்கு NDTV ன் இந்த லிங்கைப் பார்க்கவும்.

நாய்க்கடி நாள் வாழ்த்துக்கள்

2011-09-28T06:54:00.000+05:30

இன்று உலக ராபிஸ்(Rabies) தினம். நண்பர்கள் தினம், மகளிர் தினம், அப்பாக்கள் தினம், அன்னையர் தினம், நாத்தனார் தினம், கொழுந்தியா தினமெல்லாம் கொண்டாட ஆரம்பித்துவிட்ட நாம் நாய்க்கடி தினம் பற்றியும் ஒரு சில தகவல்களைப் பகிர்ந்துகொள்ளுவதில் தவறில்லை தானே!

ராபிஸ் என்பது வைரஸ் தாக்குதலுக்கு உண்டான நாயிடாமிருந்து மனிதனுக்குப் பரவும் கொடுமையான நோய். கடிபட்ட இடத்திலிருந்து வைரஸ் நரம்பு மண்டலம் வழியாக மூளையைத் தாக்கும். இதற்கு ஒரு சில வாரங்கள் கூட ஆகலாம். ராபிஸ் வைரஸ் மூளையை அடையும் முன் தடுக்காவிட்டால் நிச்சயம் மரணம் தான். எனவே நாய்க்கடித்த உடன் செய்யவேண்டியவை என்னவென்று பார்க்கலாம்.

கடிபட்ட இடத்தை நிறைய தண்ணீர் விட்டு குறைந்தது பத்து நிமிடமேனும் நன்றாகக் கழுவ வேண்டும்.
டெட்டால் அல்லது சோப்புத் தண்ணீரைத் தெளிக்கலாம். ஆனால் கடிபட்ட இடத்தை மூடக் கூடாது.
அருகில் உள்ள மருத்துவரிடம் சென்று ராபிஸ் நோய்க்கான தடுப்பூசி கட்டாயம் போட்டுக் கொள்ள வேண்டும்.

தில்லியில் நிலநடுக்கம்

2011-09-08T06:57:00.001+05:30

நேற்று நள்ளிரவு 11.28 மணியளவில் தில்லியில் வலுவான நிலநடுக்கம் உணரப்பட்டது. ரிக்டர் அளவுகோலில் 4.2 ஆக பதிவான இந்த நிலஅதிர்வால் சேதங்கள் எதுவும் அறியப்படவில்லை. எங்கள் அடுக்ககத்தில் இருந்து அனைவரும் வீட்டிலிருந்து வெளியே வந்து குட் நைட் சொல்லிக்கொண்டு தூங்கப்போனோம். ஆனாலும் தில்லி நிலநடுக்க வரைபடத்தில் zone -4 இருப்பதால் நிலநடுக்க வாய்ப்புகள் அதிகம்.

தில்லி உயர்நீதி மன்ற வாயிலில் குண்டு வெடிப்பில் 11 இறந்த அதே நாளில் நிலநடுக்கமும் வந்து தலைநகர மக்களை அதிர்சிக்குள்ளாக்கியது.

ஆசிரியப்பா

2011-09-05T07:02:00.001+05:30

'அ'னா சொல்லித்தந்த
முதல்வகுப்பு ஆசிரியை.
தொடையில் ஊசிபோட்ட

நாலாம்வகுப்பு ராமசாமி.

பேனா பரிசளித்து
பெரிதும் ஊக்குவித்த
வரலாறு - சரஸ்வதி.

எழுதிக்கொடுத்து என்னை
தமிழ்ச்சங்கத்தில் பேசவைத்த
வெங்கட்ட ராசன்.

பொதுத்தேர்வுக் கணிதத்தில்
நூற்றுக்கு நூறு
வாங்கவைத்த நடேசன்.

தேர்வறைக்குள் வந்து
தாவரவியலா? விலங்கியலா?
எது முதலில்
எழுதுகிறேன் எனப்பார்த்து
போட்டிப்பாசம் காட்டிய
உயிரியல் சகோதரிகள்.

வேதியியலோடு சேர்த்து
தேசியம் கற்பித்த
பதாமி.

ஆய்வுப்பாதையில் என்
ஆர்வத்தைத் தூண்டிய
ரவிசங்கர்.

இப்படி
ஆசிரியர்தினத்தில்
நினைத்து மகிழ
நெஞ்சார்ந்த நன்றி சொல்ல
நிறையபேர் இருந்தும்..........

'ஷூ எங்கே எனக்கேட்டு
மரஸ்கேலில் அடித்த
ஜோதிவித்யாலயா டீச்சர்'
நீங்கள்தான் என்
நினைவிலதிகம் வருகிறீர்கள்.

உங்களால்தான்
தமிழ்வழிக் கல்விக்கு
தடம்மாறினேன் நான்.
உங்களுக்கென் தனிவணக்கம்.

விநாயகர் சதுர்த்தி

2011-09-01T06:49:00.001+05:30

குள்ளக் குள்ளனே

குண்டு வயிற்றோனே

வெள்ளிக் கொம்பனே

விநாயக மூர்த்தியே

உனை வணங்குகிறேன்!

எங்கோ படித்த ஒரு கவிதை....

கடவுள் இல்லையென்று

கவிதை எழுதச்சொன்னார்கள்.

பிள்ளையார் சுழியிட்டு

பிறகு துவங்கினேன் நான்!

அனைவருக்கும் இனிய விநாயகர் சதுர்த்தி வாழ்த்துக்கள்!

தப்புத் தப்பாய் ஒரு தப்பு

2011-08-14T07:52:00.003+05:30

மனதின் ஆசையை நான்

மறைத்து வைத்தது தப்பா?

உன்னலம் கருதி எனை

ஒளித்து வைத்தது தப்பா?

மனதைத் தந்தவுடன் நான்

மறுத்துப் பேசியது தப்பா?

மனதிற்கு நல்லது நம்

மாறாத நட்பென்றது தப்பா?

உன்னுடன் நான் பேசியதில்

ஒரு வார்த்தை ஏதேனும் தப்பா?

நெஞ்சைக் கீறிவிட்டு நீயே

பஞ்சால் துடைத்து மருந்திட்டாய்.

ஒருகையால் வில் கொடுத்து

மறுகையால் நாண் அறுத்தாய்.

மலர்கின்ற பூக்களை நீ

கிள்ளிவிட்டுக் கட்டுகின்றாய்.

நட்பென்ற கண்ணாடிக் கிண்ணமதை

நழுவவிட்டு ஒட்டுகின்றாய்.

மனதில் குழப்பத்துடன் - நான்

மதிலேறத் தயாரில்லை.

காதல் கசாயம் குடிக்கக்

காய்ச்சல் இல்லை நமக்கு.

நமக்கிடையில் உள்ளது

நட்பு மட்டுமென்று

நம்பினால் - நீ

கரத்தைக் கொடு -அன்றில்

மறந்து விடு.

02.08.1999
11.45 am.

பறந்துகொண்டேயிருப்பேன்-அப்துல் கலாம்

2011-07-31T07:20:00.002+05:30

கடந்த வெள்ளி அன்று தில்லி தமிழ்ச் சங்கத்தில் வடக்கு வாசல் நடத்திய "சுப்புடு நினைவில் ஒரு இசைப் பயணம் மற்றும் வடக்கு வாசல் பதிப்பக நூல்கள் வெளியீட்டு விழா"வுக்குச் சென்றிருந்தேன். அந்நிகழ்வில் தில்லிவாழ் தமிழ்ப்பதிவர், மொழிபெயர்ப்பாளர், ஓய்வுபெற்ற தமிழ்ப் பேராசிரியை சுசீலா அம்மாவின் தேவந்தி என்னும் சிறுகதைத் தொகுப்பு வெளியிடப் பட்டது. நூல்களை வெளியிட்டுச் சிறப்புரை ஆற்றியவர் திரு.அப்துல் கலாம் அவர்கள். தேன்தமிழ் கலந்து அவர் ஆற்றிய உரையிலிருந்து சில தித்திக்கும் துளிகள்....

சுப்புடு தர்பார் என்னும் தலைப்பில் சுப்புடு சார் எழுதிய புத்தகங்களை சில ஆண்டுகளுக்கு முன் படித்தேன். பர்மாவில் இருந்து அகதியாய் நடந்தே இந்தியா வந்தது பற்றியும் சுதந்திர போராட்டத்தின் உச்ச கட்டத்தில் தில்லியில் நாடகங்கள் நடத்தியது பற்றியும் அதில் எழுதியிருந்தார். அதைப் படித்ததும் சுப்புடு சாரை ஜனாதிபதி மாளிகைக்கு அழைத்தேன். அங்குள்ள மொகல் கார்டன் நந்தவனத்தில் நெடுநேரம் செலவிட்டார். இயற்கை அழகுகளை ரசித்தார். ரோஜா மலர்களை வெகுநேரம், சுமார் ஒருமணி நேரம் வருடிக் கொண்டிருந்தார். அப்போது அதன் அர்த்தம் எனக்குத் தெரியவில்லை. பல நாட்கள், பல மாதங்கள், பல ஆண்டுகள் கடந்த பின்னர் 18 -01 - 2005 ல் எனக்கு சுப்புடு சாரிடம் இருந்து ஒரு கடிதம் வந்தது. அதில், நான் தொண்ணூரை நெருங்கி விட்டேன் நெற்றியில் திருநீறு பூசி தென்திசைப் பயணம் செல்ல நேரம் வந்துவிட்டது. ஒருவேளை நான் மரணம் எய்தினால் எனக்கு மொகல் கார்டனில் இருந்து ஒற்றை ரோஜா தருவீர்களா? என்று எழுதியிருந்தார். பின்னொருநாள் நள்ளிரவில் துக்க செய்தி கேட்டதும் உடனே சென்று ரோஜாமலர்களைப் பறித்து வந்து சுப்புடு சாருக்கு அஞ்சலி செலுத்தினேன்.

நீ நீயாக இரு...

இளைய நண்பர்களே... இளைய மனம் கொண்டோரே...வீட்டிலே மின்சார பல்பைக் கண்டதும் தாமஸ் ஆல்வா எடிசன் நம் நினைவுக்கு வருகிறார். வானில் சாத்தமிட்டு சீறிப் பாயும் ஆகாய விமானங்களைப் பார்க்கையில் ரைட் சகோதரர்கள் மனதில் வருகிறார்கள். தொலைபேசி / கைப்பேசிப் பார்க்கையில் கிரகாம்பெல் மனதிற்கு அருகாமையில் வருகிறார். கடல் நிறம் ஏன் நீலமாக இருக்கிறது என்ற கேள்வி வருகையில் லண்டனில் இருந்து கல்கத்தாவுக்கு கப்பல்வழிப் பயணம் செய்தபோது இந்திய விஞ்ஞானி நிறப்பிரிகை பற்றி கண்டறிந்த ராமன் விளைவு நினைவுக்கு வருகிறது. அகிம்சா தர்மம் என்ற கத்தியில்லா ரத்தமில்லா ஆயுதத்தைக் கொண்டு உலகுக்கே புதுப் படம் நடத்தினார் காந்தி. இப்படி ஒவ்வொருவரும் ஒவ்வொரு வகையில் தனித்தன்மை பெற்றவர்கள். இந்த உலகில் பிறந்த அனைவருக்கும் வரலாற்றின் பக்கங்களில் ஒரு பக்கம் ஒதுக்கப்பட்டிருக்கிறது. ஆனால் அந்தப் பக்கத்தை இந்த உலகையே படிக்க வைப்பது உங்கள் கைகளில் தான் உள்ளது.

நல்ல புத்தகங்கள்

நல்ல கற்பனை சக்தியை வளர்க்கும்.

நல்ல கற்பனைச் சக்தி

நல்ல சிந்திக்கும் திறனை வளர்க்கும்

நல்ல சிந்தனை

சிறந்த அறிவைக் கொடுக்கும்

சிறந்த அறிவு

நம்மை மேம்பட வைக்கும்.

இன்று வடக்கு வாசல் பதிப்பகத்தார் ஐந்து அருமையான புத்தகங்களை வெளியிடுகின்றனர்.

சிந்தனைச் சிதறல்கள் - ய.சு.ராஜன்

விருட்சங்களாகும் சிருவிதைகள் - சி.டி.சனத்குமார்

சனிமூலை - ராகவன் தம்பி

வடக்குவாசல் நேர்காணல்கள் - ராகவன் தம்பி

தேவந்தி - எம்.ஏ.சுசீலா

(தேவந்தி சிறுகதைத் தொகுப்பை திரு. அப்துல் கலாம் அய்யா வெளியிட சுசீலா அம்மாவின் மகள் மீனு பிரமோதும், நண்பர் பதிவர் விட்டலனும் பெற்றுக்கொள்கிறார்கள்)

ஒவொரு நூலில் இருந்தும் மேற்கோள் காட்டி வாழ்த்திக் கொண்டே வந்தவர். இறுதியாய் தேவந்தி என்னும் அருமையான சிறுகதைத் தொகுப்பு... தேவந்தி சிலபதிகாரக் கண்ணகியின் தோழி (சரி தானேம்மா என்கிறார் சுசீலா அம்மாவைப் பார்த்து). சாத்திரம் அன்று...சதி! என்னும் கதையில் இருந்து, "சரயு நீரைக் கண்களில் ஒற்றித் தலையில் தெளித்தபடி... ஆற்றில் இறங்கி, அதன் ஆழத்தில் அமிழ்ந்தபடி போய்க்கொண்டே இருக்கிறான் ராமன். எங்கோ தொடுவானத்தில் சமநீதி என்னும் உதயத்தின் விடியல் மெல்லியதொரு கீற்றாய் தெரிகிறது" என்ற வரிகளைப் பாராட்டினார்.

முத்தாய்ப்பாய் ஒரு கவிதை சொல்லி அகிருந்த அனைவரையும் கூடவே சொல்லச் சொன்னார்.

நான் பிறந்தேன்

அரும்பெரும் சக்தியுடன்...

நான் பிறந்தேன்

நற்பண்புகளுடன்...

நான் பிறந்தேன்

கனவுடன்...

வளர்ந்தேன்

நல்ல எண்ணங்களுடன்...

நான் பிறந்தேன்

உயர் எண்ணங்களை

செயல்படுத்த...

நான் பிறந்தேன்

ஆராய்ச்சி உள்ளத்துடன்...

நான் பிறந்தேன்

ஆகாய உச்சியில் பறக்க...

நான் பூமியில்

ஒருபோதும் தவழ மாட்டேன்.

தவழவே மாட்டேன்.

ஆகாய உச்சிதான்

என் லட்சியம்

பறப்பேன் வானில்

பறந்துகொண்டேயிருப்பேன்....

இன்னும் கொஞ்சம்...

2011-07-28T06:40:00.000+05:30

நிலவு
பேருந்து சன்னலில்
ஒட்டிய ஸ்டிக்கராய்
உடன்வரும் நிலா
என்மன சன்னலில்
உன் நினைவுகளும்....

தனிமரத்தோப்பு

ஒரு பூ மாலையாகாது

ஒரு துளி கடலாகாது

ஒரு இலை கிளையாகாது

ஒரு கிளை மரமாகாது

ஒரு மரம் தோப்பாகாது

ஆனால் நீ

ஒருத்தி மட்டும் எப்படி

உலகமானாய் எனக்கு......

வேறோர் குழந்தையுடன்

விளையாடிக் கொஞ்சினால்

ஓடிவந்தெனைக் கட்டிக்கொள்கிறாள்

செல்ல மகள்.

இப்படித்தான் நீயும்

அன்றோர் நாள்

காதலைச் சொன்னாய்

குழந்தை மனதோடு........

ஒவ்வொரு தேர்வு

எழுதி முடித்ததும்

உள்ளுக்குள் தோன்றும்

இன்னும் கொஞ்சம்

நல்லா படிச்சிருக்கலாம்.

ஒவ்வொரு முறை

சந்தித்துப் பிரிகையிலும்

உள்ளுக்குள் தோன்றும்

இன்னும் கொஞ்சம்

உன்னோடு பேசியிருக்கலாம்....

விளக்கம்

2011-07-20T06:02:00.003+05:30

அண்மையில் திரு பாலசுப்ரமணியம் அவர்கள் இரு பாடல்களை பதிவிட்டு அதற்கான விளக்கம் கேட்டிருந்தார். இணையத்தில் தேடியதில் எனக்கு கிடைத்த விவரங்களை இங்கே பதிவிடுகிறேன்.

திருவெழுக்கூற்றிருக்கை

கவித்திறனில் ஆசுகவி, மதுரகவி, சித்திரக்கவி மற்றும் விஸ்தாரக்கவி என்று நான்கு பிரிவுகள் உண்டாம். இவற்றில் சித்திரக்கவி என்பது ஒரு உருவம் தோன்றுமாறு கவி அமைப்பதாகும். திருவெழுக்கூற்றிருக்கை என்பது சித்திரக்கவியில் அடங்கும். இதில் சக்ரபந்தம், பத்மபந்தம், நாகபந்தம், ரதபந்தம் முதலான வகைகள் உண்டு. ரதபந்தம் என்பது தேரின் உருவத்தை கட்டங்களில் கொண்டுவந்து, அந்த கட்டங்களுக்குள் எண்கள் இட்டு, அந்த எண்ணிக்கை பாசுரத்தின் சொற்களாக அமையும்படிச் செய்வதாகும். திருமங்கையாழ்வார், அருணகிரிநாதர், திருஞானசம்பந்தர் இன்னும் பலர் திருவெழுக்கூற்றிருக்கை அருளியுள்ளனர்.

மேலும் விவரங்களுக்கு
http://namperumal.wordpress.com/2008/12/11/
http://namperumal.files.wordpress.com/2008/12/thiruvezhu1.படப்

இரண்டாம் பாடல் பன்னிரு திருமுறைகளில் முதலாம் திருமுறையில் உள்ளது.

பாடல் எண் : 1

பண் : வியாழக்குறிஞ்சி

ஓருரு வாயினை மானாங் காரத்
தீரியல் பாயொரு விண்முதல் பூதலம்
ஒன்றிய விருசுட ரும்பர்கள் பிறவும்
படைத்தளித் தழிப்பமும் மூர்த்திக ளாயினை
இருவரோ டொருவ னாகி நின்றனை 5.
ஓரா னீழ லொண்கழ லிரண்டும்
முப்பொழு தேத்திய நால்வர்க் கொளிநெறி
காட்டினை நாட்ட மூன்றாகக் கோட்டினை
இருநதி யரவமோ டொருமதி சூடினை
ஒருதா ளீரயின் மூவிலைச் சூலம் 10
நாற்கான் மான்மறி யைந்தலை யரவம்
ஏந்தினை காய்ந்த நால்வாய் மும்மதத்
திருகோட் டொருகரி யீடழித் துரித்தனை
ஒருதனு விருகால் வளைய வாங்கி
முப்புரத் தோடு நானில மஞ்சக் 15
கொன்று தலத்துற வவுணரை யறுத்தனை
ஐம்புல னாலா மந்தக் கரணம்
முக்குண மிருவளி யொருங்கிய வானோர்
ஏத்த நின்றனை யொருங்கிய மனத்தோ
டிருபிறப் போர்ந்து முப்பொழுது குறைமுடித்து 20
நான்மறை யோதி யைவகை வேள்வி
அமைத்தா றங்க முதலெழுத் தோதி
வரன்முறை பயின்றெழு வான்றனை வளர்க்கும்
பிரமபுரம் பேணினை
அறுபத முரலும் வேணுபுரம் விரும்பினை 25
இகலிய மைந்துணர் புகலி யமர்ந்தனை
பொங்குநாற் கடல்சூழ் வெங்குரு விளங்கினை
பாணிமூ வுலகும் புதையமேன் மிதந்த
தோணிபுரத் துறைந்தனை தொலையா விருநிதி
வாய்ந்த பூந்தரா யேய்ந்தனை 30
வரபுர மொன்றுணர் சிரபுரத் துறைந்தனை
ஒருமலை யெடுத்த விருதிற லரக்கன்
விறல்கெடுத் தருளினை புறவம் புரிந்தனை
முந்நீர்த் துயின்றோ னான்முக னறியாப்
பண்பொடு நின்றனை சண்பை யமர்ந்தனை 35
ஐயுறு மமணரு மறுவகைத் தேரரும்
ஊழியு முணராக் காழி யமர்ந்தனை
எச்சனே ழிசையோன் கொச்சையை மெச்சினை
ஆறு பதமு மைந்தமர் கல்வியும்
மறைமுத னான்கும் 40
மூன்று காலமுந் தோன்ற நின்றனை
இருமையி னொருமையு மொருமையின் பெருமையும்
மறுவிலா மறையோர்
கழுமல முதுபதிக் கவுணியன் கட்டுரை
கழுமல முதுபதிக் கவுணிய னறியும் 45
அனைய தன்மையை யாதலி னின்னை
நினைய வல்லவ ரில்லைநீ ணிலத்தே.

பொழிப்புரை :

சொரூப நிலையில் விளங்கும் பரசிவம் ஆகிய நீ உனது இச்சையால் ஐந்தொழில்களை நிகழ்த்த வேண்டி எடுத்துக் கொண்ட ஓருருவமாகிய திருமேனியை உடையை ஆயினை,

உன் சக்தியைக் கொண்டு அவ் ஐந்தொழில்களை நடத்தும் திருவுளக்குறிப்போடு சத்தி சிவம் என்னும் இரு உருவாயினை,

விண் முதலிய பூதங்களையும் சந்திர சூரியர்களையும் தேவர்கள் மக்கள் முதலியோரையும் படைத்துக் காத்து அழிக்க அயன் அரி அரன் என்னும் மும்மூர்த்திகள் ஆயினை,

பிரமன் திருமால் ஆகிய இருவரையும் வலத்திலும் இடத்திலும் அடக்கி ஏக மூர்த்தியாக நின்றாய்,

ஒப்பற்ற கல்லால மரநிழலில் உனது இரண்டு திருவடிகளை முப்பொழுதும் ஏத்திய சனகர், சனந்தனர் முதலிய நால்வர்க்கு ஒளி நெறியைக் காட்டினாய்,

சூரியன் சந்திரன் அக்கினி ஆகியோரை மூன்று கண்களாகக் கொண்டு உலகை விழுங்கிய பேரிருளை ஓட்டினாய்,

கங்கையையும் பாம்பையும் பிறைமதியையும் முடிமிசைச் சூடினாய்,

ஒரு தாளையும் ஈருகின்ற கூர்மையையும் முத்தலைகளையும் உடைய சூலத்தையும் நான்கு கால்களையும் உடைய மான் கன்று, ஐந்து தலை அரவம் ஆகியவற்றையும் ஏந்தினாய்,

சினந்து வந்த, தொங்கும் வாயையும் இரு கோடுகளையும் கொண்ட ஒப்பற்ற யானையை அதன் வலி குன்றுமாறு அழித்து அதன் தோலை உரித்துப் போர்த்தாய்,

ஒப்பற்ற வில்லின் இருதலையும் வளையுமாறு செய்து கணை தொடுத்து முப்புரத்தசுரர்களை இவ்வுலகம் அஞ்சுமாறு கொன்று தரையில் அவர்கள் இறந்து கிடக்குமாறு அழித்தாய்.

ஐம்புலன்கள் நான்கு அந்தக் கரணங்கள், முக்குணங்கள் இரு வாயுக்கள் ஆகியவற்றை ஒடுக்கியவர்களாய தேவர்கள் ஏத்த நின்றாய்,

ஒருமித்த மனத்தோடு, இரு பிறப்பினையும் உணர்ந்து முச்சந்திகளிலும் செய்யத்தக்க கடன்களை ஆற்றி நான்மறைகளை ஓதி ஐவகை வேள்விகளையும் செய்து ஆறு அங்கங்களையும் ஓதி, பிரணவத்தை உச்சரித்து தேவர்களுக்கு அவி கொடுத்து மழை பெய்விக்கும் அந்தணர் வாழும் பிரமபுரத்தை விரும்பினாய், ஆறுகால்களை உடைய வண்டுகள் இசைபாடும் பொழில் சூழ்ந்த வேணுபுரத்தை விரும்பினாய்,

தேவர்கள் புகலிடம் என்று கருதி வாழ்ந்த புகலியை விரும்பினாய். நீர் மிகுந்த கடல் சூழ்ந்த வெங்குரு என்னும் தலத்தை விரும்பினாய்.

மூவுலகும் நீரில் அழுந்தவும் தான் அழுந்தாது மிதந்த தோணிபுரத்தில் தங்கினாய்.

வழங்கக் குறையாத செல்வவளம் மிக்க பூந்தராயில் எழுந்தருளினாய்.
வரந்தருவதான சிரபுரத்தில் உறைந்தாய்,

ஒப்பற்ற கயிலை மலையைப் பெயர்த்த பெருந்திறல் படைத்த இராவணனின் வலிமையை அழித்தாய்.

புறவம் என்னும் தலத்தை விரும்பினாய்,

கடலிடைத் துயிலும் திருமால் நான்முகன் ஆகியோர் அறிய முடியாத பண்பினை உடையாய்.

சண்பையை விரும்பினாய்.

ஐயுறும் சமணரும் அறுவகையான பிரிவுகளை உடையபுத்தரும் ஊழிக்காலம் வரை உணராது வாழ்நாளைப் பாழ் போக்கக் காழிப்பதியில் எழுந்தருளியுள்ளாய்.

வேள்வி செய்வோனாகிய ஏழிசையோன் வழிபட்ட கொச்சை வயத்தை விரும்பி வாழ்கின்றாய்,

ஆறு பதங்கள், ஐந்து வகைக் கல்வி, நால் வேதம், மூன்று, காலம், ஆகியன தோன்ற நிற்கும் மூர்த்தியாயினாய்,

சத்தி சிவம் ஆகிய இரண்டும் ஓருருவமாய் விளங்கும் தன்மையையும் இவ்விரண்டு நிலையில் சிவமாய் ஒன்றாய் இலங்கும் தன்மையையும் உணர்ந்த குற்றமற்ற அந்தணாளர் வாழும் கழுமலம் என்னும் பழம்பதியில் தோன்றிய கவுணியன்குடித் தோன்றலாகிய ஞானசம்பந்தன் கட்டுரையை விரும்பிப் பிரமன் மண்டையோட்டில் உண்ணும் பெருமானே அறிவான். அத்தன்மையை உடைய நின்னை உள்ளவாறு அறிவார், நீண்ட இவ்வுலகிடை இனிப்பிறத்தல் இலர்.

நன்றி: http://www.thevaaram.org/

அப்படியும் இப்படியும்...

2011-07-03T08:04:00.000+05:30

நீயென்னை முத்தமிட்டும்

எழுப்பியிருக்கிறாய்

காது கிழிய

சத்தமிட்டும்

எழுப்பியிருக்கிறாய்!

என் கன்னங்கள்

வெட்கத்திலும் சிவந்திருக்கிறது.

சிலநாள் அறைவாங்கி

வீங்கியும் சிவந்திருக்கிறது!

உன் பார்வைகள்

என்னைத்

தொட்டும் சிரித்ததுண்டு

சுட்டும் எரித்ததுண்டு!

உன் ஸ்பரிசத்தில்

பூக்கள் சிலநாளும்

பூச்சிகள் சிலநாளும்

நினைவுக்கு வந்ததுண்டு!

உன் சொற்களென்

மனக்காயத்தை

குணமாக்கியதுமுண்டு இன்னும்

ரணமாக்கியதுமுண்டு!

அத்தனை முரண்களையும்

அமைதியாய் ஏற்கிறேன்

அம்மா என்றழைக்கும்

அன்பு மகனுக்காக.....

தீமைக்கு எதிராக தீபம் ஏற்றுங்கள்

2011-06-26T07:50:00.000+05:30

பிஞ்சுக் குழந்தைகளை

நெஞ்சோடு இறுக்கி

பதுங்குக் குழிக்குள்

தாய்கள்

பரிதவித்த போதும்...

உரிமை கேட்டவர்களின்

உயிர்கள் பறித்த போதும்

பள்ளி செல்லும் மலர்கள்

முள்வேலியில் வாடியபோதும்...

நம்மினப் பெண்களின்

கர்ப்பப் பைக்குள்

சிங்கள நாய்கள்

விஷம் கலந்தபோதும்...

கண்களை மூடிக்கொண்ட

கயவர்கள் நாம்.

ஊரையே எரிக்கையில்

ஊமையாய் இருந்துவிட்டோம்

இன்றேனும்

தீபங்கள் ஏற்றி

தீமையை எதிர்ப்போம்.

இன்று மாலை 5 மணியளவில் மெரினா கடற்கரை கண்ணகி சிலையருகே தமிழ் உணர்வாளர்கள் அனைவரும் ஓர் இடத்தில் கூடி தங்களது அஞ்சலியையும் கோபத்தையும் பதிவு செய்ய இருக்கிறார்கள்.

மனநல மருத்துவம்

2011-06-19T07:05:00.001+05:30

வெறுமையைக் குடித்து

வீங்கிய மனதில்

சிரிப்பூசி கொண்டு

சிறுதுளை யிட்டாய்.

கவலைக் காற்று

கசிந்து முடிந்ததும்

புன்னகை கொண்டு

பூசி மெழுகினாய்.

கொஞ்சும் நிலவு

2011-06-16T05:26:00.002+05:30

கொஞ்சுமொழிக் காரியே

பிஞ்சு நிலவே

பிரியமான மகளே - உனகென்

பிறந்தநாள் வாழ்த்துக்கள்.

வேண்டாம் என்பதை

உடனே செய்கிறாய்

வேண்டிக் கேட்பதை

தீண்டிட மறுக்கிறாய்.

பல்துலக்கித் துப்பென்றால்

படக்கென்று விழுங்கிடுவாய்

முகங்கழுவச் சென்றுவந்தால்

முழுவுடம்பும் நனைத்திடுவாய்.

எண்ணெழுதும் புத்தகத்தில்

வண்ணங்கள் தீட்டிடுவாய்.

வண்ணங்கள் தீட்டச்சொன்னால்

எண்ணெழுத வேண்டுமென்பாய்.

முதுகில் கடித்தாலும் - நீயென்

முகத்தில் அடித்தாலும்

வலிப்பதில்லை எனக்கது

இனிக்கவேச் செய்கிறது.

அதிகமாய் சிலநாள்

அடம்பிடிக்கும் உன்னை

அடித்துவிட்டுப் பின்னர்

அழுதிருக்கிறேன் நான்.

தலையாட்டிப் பேசுவதே - முத்

தமிழாக இனிக்கிறது - நீ

விளையாட்டாய் சமைப்பதுவும்

விருந்தெனவே ருசிக்கிறது.

கொஞ்சுமொழிக் காரியே

பிஞ்சு நிலவே

பிரியமான மகளே - உனகென்

பிறந்தநாள் நல்வாழ்த்துக்கள்.

அலுவலக ஞாபகத்தில் பல்பு வாங்கும் பத்து தருணங்கள்

2011-06-11T06:49:00.003+05:30

லொள்ளு லொள்ளும்பாங்களே அது இதானா?

காலையில் எழுந்ததும் உங்க தங்கமணி கடைக்குப் போகச் சொல்வாங்க. பர்சை எடுத்து பாக்கெட்டில் வைத்தபின் பழக்க தோஷத்தில் ID கார்ட எடுத்து கழுத்துல மாட்டுவீங்களே!
ஒருநாளும் இல்லாத திருநாளா ஹோட்டலுக்குக் குடும்பத்தோடு சாப்பிடச் செல்வீர்கள். சாப்பிட்டு முடித்ததும் அலுவலக பழக்கத்தில் தட்டை கையிலெடுத்துக் கொண்டு கை கழுவப் போவீர்கள்!
அப்படிப் போகையில் தங்கமணி முறைத்து தவறைச் சுட்டியதும் தட்டை டேபிளில் வைத்துவிட்டு கை கழுவப் போவீர்கள். அங்கு போய் அலுவலக ஞாபகத்தில் கையை நீட்டிக் கொண்டு காத்திருப்பீர்கள்....தானே தண்ணீர் வருமென்று!
ரொம்ப நாள் கழித்து உங்க நண்பர் தொலைபெசியிருப்பார். ஊர் கதை உலகக் கதையெல்லாம் அடித்துவிட்டு போனை வைக்கும் போது பழக்க தோஷத்தில் 'ஓகே பை பை, ஏதாவது பிரச்சனைனா திரும்பக் கூப்பிடறேன்' என்பீர்கள்!
நாள் முழுதும் அவசரம் அவசரம்னே பேசிக்கேட்ட பழக்கத்தில் வீட்டில் சாப்பிடும் போது உங்க மனைவியிடம் அர்ஜென்ட்டா ஒரு தோசை கொடு என்பீர்கள். வெந்தா தான் தர முடியும் ரொம்ப அவசரம்னா தோசைய நேரடியா தட்ல தான் வார்க்கனும்னு சொல்வாங்களே!
உங்க பிறந்த நாளுக்கோ அல்லது கல்யாண நாளுக்கோ உங்க பாஸ் வாழ்த்து அனுப்புவார். அதை படிக்காமலே பழக்க தோஷத்தில் உங்களுக்கு கீழே வேலை செய்பவருக்கு "please review & discuss " என்று பார்வார்ட் செய்வீர்கள்!
கைப்பேசியில் SMS எதையோ டெலீட் செய்துவிட்டு அவுட்லுக் ஞாபகத்தில் செல்போனில் "deleted items " தேடுவீர்கள்!
வேக வேகமாய் வீட்டுக்கு வந்து சாவியை எடுத்து பூட்டைத் திறக்காமல் கதவு திறக்க கார்டை நீட்டுவீர்களே! (இதை யாரும் பார்கவில்லை என்றாலும் சுயமாய்க் கொடுக்கும் சூப்பர் பல்பு இது.)
ரொம்ப நாளைக்குப் பிறகு சினிமாவுக்குப் போயிருப்பீங்க. இடைவேளையின் போது உங்க மனைவி டைம் என்னங்கன்னு கேட்பாங்க. அதுக்கு நீங்களோ கடிகாரம் பார்க்காமல் திரையின் வலது புறம் கீழ் மூலையைப் பார்ப்பீர்கள்!
ரொம்ப நாள் யோசிச்சு இந்த மாதிரி ஒரு ஐடியா க்ளிக்காகும். சரி ஒரு பதிவ தேத்தலாம்னு ஜிமெயில் லாகின் செய்வீர்கள். பாஸ்வார்ட் இன்வாலிட் என்று வரும். அப்ப தான் தெரியும் நீங்க போட்டது ஆபீஸ் USER ID என்று!

இந்தப் பத்தில் ஐந்து உங்களுக்கு நடந்திருந்தால்....அட நீங்க நம்மாளு!

யானையும் நானும்-1

2011-06-07T06:43:00.004+05:30

அம்புலியைத் துடைத்தெறியும் தும்பிக்கை படித்துவிட்டு என் மனைவி, 'கவிதைக்குப் பொய் அழகுதான் அதுக்காக இப்படியெல்லாம் சொல்லக்கூடாது' என்றாள். யானை எவ்வளவு புத்திசாலி தெரியுமா... ஒற்றுமையையும் பாச உணர்ச்சியும் அதனிடமிருந்து நாம் கற்றுக்கொள்ள வேண்டும். எப்போதும் கூட்டமாய் வாழும் யானைகள், ஒரு யானை இறக்கும் தருவாயில் இருந்தால் அதைச் சுற்றி நின்று கண்ணீர் விடும். இறந்தபின் அதைப் புதைத்த பின்னரே அந்த இடத்திலிருந்து நகருமென்றாள்.

அன்று முழுவதும் எனக்கு யானை நினைவாகவே இருந்தது. சிறுவயது முதலே எனக்கு யானை என்றால் மிகப்பிடிக்கும். யாரவது என்னிடம் மிகப்பிடித்த விலங்கு எதுவென்று கேட்டால் யானை என்றே சொல்லியிருக்கிறேன். என் பள்ளி நாட்களில் எந்த வனவிலங்கு சரணாலயத்திற்கும் சென்றதில்லை. திருவிழாவிலும் சர்கசிலும் யானை பார்க்கையில் என்னை மறந்திருக்கிறேன். நெற்றியில் பெரிய நாமத்துடன் தெருக்களை சுற்றிவரும் பெருமாள் கோவில் யானையிடம் சில்லறை கொடுத்தால் துதிக்கையை தலையில் வைத்து ஆசீர்வதிக்கும். அதுவே தலையில் துதிக்கையை வைத்து அழுத்துவது போலிருக்கும். அதனிடம் ஆசீர்வாதம் வாங்குவதை அடுத்த நாள் பள்ளியில் பெருமை பேசிக்கொள்வோம். ஆசீர்வத்திப்பதே தலையில் அடிப்பது போலிருக்கிறதே...அடித்தால் என்ன ஆகுமென்று சொல்லிச் சிரித்த நாட்கள் இன்னும் நினைவில் உள்ளது.

காடுகளில் சுதந்திரமாய் வாழவேண்டிய யானைகளை இப்படி கட்டிப்போட்டு வீடுகளில் பிச்சை எடுக்க வைக்கிறார்களே என்று தோன்றினாலும் சர்கஸ் யானைகளைப் பார்க்கையில் கோவில் யானைகள் நிலையே தேவலாம் என்று தோன்றும். சேலம் பழைய பேருந்து நிலையம் அருகில் போஸ் மைதானத்தில் ஒவ்வொரு வருடமும் "பாம்பே சர்கஸ்" போடுவார்கள். பலமுறை கேட்டபின் எங்களை ஒருமுறை அழைத்துச்சென்றார் அப்பா. அங்கு யானை பந்து விளையாடியதையும் சைக்கிள் ஓட்டியதையும் பார்த்துவந்து நண்பர்களிடம் ஒரு வாரம் பெருமை பேசியதுண்டு.

ஆனாலும் யானை பார்த்தல் என்னும் என் "யானைப்பசிக்கு" சோளப்பொரியே கிடைத்தது. கோவில் யானைகளைப் பார்க்கையில் நாமும் அதன் கூடவே சென்றிடலாம் என்று கூடத் தோன்றியதுண்டு. இப்படி நான் நேரில் பார்த்த யானைகளே மனதோடு நெருக்கமாய் இருந்தன. சினிமாவில் பார்த்த யானைகளுடன் சிநேகம் கொள்ளவில்லை என் மனது. பழைய தேவர் பிலிம்ஸ் படங்கள் கூடப் பரவாயில்லை. நம்கால ராமநாராயணன் படங்கள் யானைகளை அசிங்கப் படுத்துவதாகவே உணர்கிறேன்.

அம்புலிமாமாவில் இருந்து ஆனந்த விகடன் வரை யானை பற்றிய எந்த செய்தியையும் கதையையும் என் பள்ளி நாட்களில் தவறவிட்டதில்லை. எந்த ஒரு விசயத்தையும் முழுதாய்ப் புரிந்து கொள்ளாதவர்களிடம் கண்ணிலாதவர் யானையைத் தடவிப் பார்த்து உணர்ந்த கதையே இன்றும் சொல்லப்படுகிறது. என்றோ படித்த குட்டிக்கவிதை. மதத்தைப் பற்றி பேசும் யாரும் இந்த வரிகளை மேற்கோள் காட்டாமல் பேசுவதில்லை.

யானைக்கு வெறியினால்

பிடிப்பது மதம்

மனிதனுக்கு மதத்தால்

பிடிப்பது வெறி.

வைரமுத்துவின் விலங்கு கவிதையிலிருந்து சில வரிகள்...

விலங்குகள் நம்மினும்

மானமுள்ளவை

யானையின் காலில்

யானை விழுந்ததாய்

தகவல் இல்லை

பூனைக்கு எலிகள்

பல்லக்கு சுமந்ததில்லை

கரடிக்கு மான்கள்

கால்பிடித்து விட்டதில்லை

ஒன்று

சுதந்திரத்தின் வானம்

இல்லை

மரணத்தின் பள்ளம்

இடைப்பட்ட வாழ்க்கை

விலங்குக்கில்லை.

யானையைப் பற்றிய பதிவு சிறியதாய் இருக்கக் கூடாதல்லவா....அதனால் அடுத்த பதிவிலும் தும்பிக்கை நினைவுகள் தொடரும்.

பாபா ராம்தேவ் நள்ளிரவில் அப்புறப்படுத்தப்பட்டார்

2011-06-05T06:11:00.007+05:30

கறுப்புப் பணம் மற்றும் ஊழலுக்கு எதிரான உண்ணாவிரதத்தை நேற்று துவங்கிய யோகா குரு பாபா ராம்தேவ் நேற்று நள்ளிரவே ராம்லீலா கார்டனில் இருந்து அப்புறப்படுத்தப்பட்டார். சுமார் ஒரு மணியளவில் உண்ணாவிரத மேடையில் தூங்கிக் கொண்டிருந்த ராம்தேவை எழுப்பி அவரை வேறு இடத்திற்குக் கொண்டுசெல்லப் போவதாக போலீசார் சொன்னதும், யாரும் வன்முறையில் ஈடுபடவேண்டாம் என்று மைக்கில் சொல்லிவிட்டு மேடையில் இருந்து குதித்து கூட்டத்துக்குள் புகுந்தார் ராம்தேவ்.

கூட்டத்தின் நடுவிலும் இதையே சொன்ன ராம்தேவ் மீண்டும் மேடைக்கு வந்ததும் அவரின் ஆதரவாளர்கள் அவரைச் சுற்றி மனிதச் சங்கிலி அமைத்தார்கள். கற்களையும் தீயணைப்புக் கருவிகளையும் கொண்டு ஆதரவாளர்கள் போலீசாரைத் தாக்க முயன்றனர். நிலமை மோசமடைவதை உணர்ந்த போலீசார் கண்ணீர்புகைக் குண்டுகளை வீசியும் தடியடி நடத்தியும் கூட்டத்தைக் கலைத்தனர். பாபா ராம்தேவ் கைது செய்யப்படவில்லை வேறு இடத்திற்கு மாற்றப் பட்டிருக்கிறார் என்று போலிஸ் தரப்பில் சொல்லப்படுகிறது. ஹரித்துவார் அழைத்துச் செல்லப்பட்டிருக்கலாம் என்றும் யூகங்கள் உலவினாலும் அவர் எங்கிருக்கிறார் என்ற அதிகாப்பூர்வ தகவல் வெளியாகவில்லை.

இச்சம்பவத்தில் போலிசாரின் தடியடியில் காயமடைந்த சும்மார் முப்பதுபேர் அருகிலுள்ள லோக் நாயக் ஜெய்ப்ரகாஷ் (LNJP) மருத்துவமனையில் அனுமதிக்கப் பட்டுள்ளனர். இந்நிலையில் பாபா ராம்தேவின் பக்தைகள் சுமார் இருபத்தைந்து பேர் மூத்த போலீஸ் அதிகாரியான கூடுதல் DCP டி கே குப்தாவைச் சூழ்ந்தனர். சீருடையைக் கிழிக்க முயன்ற அவர்களிடம் சில மெடல்களை இழந்து தப்பினார் DCP.

கடந்த ஒரு வார காலமாகவே ராம்லீலா கார்டனில் உண்ணாவிரதத்திற்கென சுமார் பதினெட்டு கோடி செலவில் தடபுடலான ஏற்பாடுகள் நடைபெற்றன. இரண்டரை லட்சம் சதுரடிக்கு சுமார் முப்பது அடி உயர நீர்புகா குடில்கள், 780 மின்விசிறிகள், 100 கூலர்கள், 7 பெருந்திரைத் தொலைக்காட்சிகள், 100 CCTV காமராக்கள் இதில் அடங்கும். இந்த மைதானத்தின் வாடகை மட்டுமே சுமார் மூன்று லட்சம். அது மட்டுமன்றி சுமார் 500 குடிநீர்க் கலன்கள் (ஒவ்வொன்றும் பதினாறு லட்சம் ரூபாய்கள்) மற்றும் 1300 கழிவறைகள், ஆம்புலன்ஸ் ஏற்பாடுகள், ஆளுயர பேனர்கள் என களை கட்டியது ராம்லீலா மைதானம்.

அரசும் உண்ணாவிரதத்தைத் தடுக்க தம்மாலான ஏற்பாடுகளைச் செய்து வந்தது. போராட்டம் நடத்தப் போவதாக அறிவித்ததுமே பிரதமர் மன்மோகன்சிங் ராம்தேவிற்கு கடிதம் எழுதினார். அதில் ராம்தேவின் யோசனைகளை அரசு வரவேற்பதாகவும், அவருடன் இணைந்து ஆவன செய்வதாகவும், போராட்டத்தைக் கைவிடவேண்டுமென்றும் எழுதினார். அதை ராம்தேவ் ஏற்காததால் கட்சியின் மூத்தத் தலைவர்களை அவசராமாகக் கூட்டி ஆலோசித்தார் பிரதமர். உண்ணாவிரதப் போராட்டத்தை நிறுத்தும் பொறுப்பு நிதித்துறை அமைச்சர் பிரணாப் முகர்ஜியிடம் கொடுக்கப்பட்டது.

புதன் மாலை ராம்தேவ் தில்லி வருவதை அறிந்ததும் அவரை வரவேற்க மூன்று மத்திய அமைச்சர்கள் அனுப்பப்பட்டனர். மனித வளத்துறை அமைச்சர் கபில் சிபில், பாராளுமன்ற விவகாரத்துறை அமைச்சர் பவன் குமார் பன்சால், சுற்றுலாத் துறை அமைச்சர் சுபோத் காந்த் சகாயுடன் அமைச்சரவைச் செயலர் கே.எம்.சந்திரசேகரும் இந்திராகாந்தி விமான நிலையத்தில் பாபா ராம்தேவைக் காத்திருந்து வரவேற்றனர். அந்தப் பேச்சுவார்த்தையும் பயனளிக்காததால் பிரணாப் முகர்ஜி மீண்டும் பேசினார். அதன் பிறகும் ராம்தேவ் உண்ணாவிரதப் போராட்டத்தில் உறுதியாக இருந்தார்.

அன்னா ஹசாரேவும் தனது ஆதரவைத் தெரிவித்ததோடு இன்று உண்ணாவிரத மேடைக்கு வருவதாக அறிவித்திருந்தார். சுமார் 32 லட்சம் பேர் தங்களை இந்தப் போராட்டத்திற்குப் பதிவு செய்திருப்பதாக தகவல் வெளியானதும் அரசு தரப்பில் இருந்து கறுப்புப் பணத்திற்கு எதிராக சட்டம் செய்யக் குழு அமைக்கப்ப் போவதாக உறுதிமொழியுடன் ராம்தேவிற்கு நேற்றிரவு கடிதம் அனுப்பப்பட்டது. கறுப்புப் பணத்தை நாட்டுடைமையாக்குதல், ஊழல் செய்வோருக்கு கடுமையான தண்டனை இந்த இரண்டைத் தவிர ராம்தேவின் 99 சதவீதக் கோரிக்கைகளை அரசு ஏற்பதாகச் சொல்லப்பட்டது. ஆகவே உண்ணாவிரதத்தை முடித்துவிட்டு தில்லியில் இருந்து வெளியேறுமாறும் அரசு தரப்பில் இருந்து அறிவுறுத்தப்பட்டது. அதையும் ஏற்காத ராம்தேவ், தனது கோரிக்கைகள் முழுவதும் ஏற்றுக்கொள்ளப்படும் வரை போராட்டம் தொடரும் என உறுதியாக இருந்ததால் அரசு தரப்பில் இருந்து இந்த அதிரடி நடவடிக்கை எடுக்கப்பட்டுள்ளது.

அம்புலியைத் துடைத்தெறியும் தும்பிக்கை

2011-05-31T06:35:00.002+05:30

நண்பர் LK தனது கவிச்சோலை வலைப்பூவில் ஒரு கவிதைப்போட்டி அறிவித்திருக்கிறார். கீழுள்ள முத்தொள்ளாயிரப் பாடலுக்கு புதுக்கவிதை எழுதுவது தான் போட்டி.

பாடல்
வீறுசால் மன்னர் விரிதாம வெண்குடையைப்
பாற எறிந்த பரிசயத்தால்-தேறாது
செங்கண்மாக் கோதை சினவெங் களியானை
திங்கள்மேல் நீட்டுந்தன் கை.

கவிதை 1
வீரனாம் சேரனை
        வெல்லவரும் பகைவர்தேரை
வீதியில் சாய்ப்பதும்
         வெறிகொண்டு மிதிப்பதுமே
வேலையெனக் கொண்டதோர்
         வெற்றி யானை.
விண்ணிலே மின்னிய
         வெண்ணிலா கண்டதும்
அங்கோர் தேர்க்குடை
         அசைகிறதே என்றெண்ணி
தும்பிக்கை நீட்டியே
          துடைத்தெரியப் பார்த்ததாம்!

இது போட்டிக்கான என் கவிதை நீங்களும் எழுத வேண்டுமா?
மேலதிக விவரங்களுக்கு இங்கே செல்லவும்....

கவிதை 2

வீரம் செறிந்த சேரமன்னனை

அம்பாரியில் அமர்த்தியே

வீறுநடை போடும் வெற்றி

வேழத்தின் துதிக்கைக்கு

செற்றார்தம் தேரினையும்,

வெண்கொற்றக் குடையினையும்

வீழ்த்துவதே வழக்கம்...

வழக்கமான பழக்கத்தினால்

வான்மதியும் வேற்றரசன்

தேர்க்குடையாய்த் தெரிந்திட

அக்கணமே அம்புலியைத்

துவம்சம் செய்திட - தம்

துதிக்கையைச் சுழற்றியதே

சூறாவளியாய்..!

விசில் போடு!

2011-05-28T18:09:00.003+05:30

IPL கிரிக்கெட் திருவிழாவில் இறுதிப்போட்டி இன்னும் இரண்டு மணி நேரத்தில் துவங்கப்போகிறது. விளையாட்டை விட வியாபாரமே இதில் முக்கிய பங்கு வகித்தபோதிலும் இளம் வீரர்களுக்கான களம் என்பதாலும் இருபது ஓவர்கள் மட்டுமே என்பதாலும் எனக்குப் பிடிக்கிறது. ஒவ்வொரு வருடமும் வீரர்களை ஏலத்தில் எடுப்பதால் யார் யார் எந்த அணியில் விளையாடுகிறார்கள் என்று விளங்கிக் கொள்ளும் முன்னரே ஒரு மாதம் ஓடிவிடுகிறது. அப்படித்தான் இம்முறையும் கடந்த ஏழு வாரங்களாக தினமும் குறைந்தது ஒரு மணி நேரம் IPL போட்டிகளைப் பார்த்து வருகிறேன்.

இன்று நடக்கும் இறுதிப் போட்டியில் சென்னையும் பெங்களூருவும் மோதுகின்றன. கடந்த நான்கு வருடங்களாக நடக்கும் இப்போட்டித் தொடரில் அனைத்துத் தொடர்களிலும் அரையிறுதிக்குத் தகுதிபெற்ற ஒரே அணி சென்னை மட்டுமே.

இரண்டாயிரத்தெட்டாம் ஆண்டு நடந்த முதல் IPL தொடரின் இறுதிப் போட்டியில் கடைசி பந்தில் ராஜஸ்தான் அணியிடம் தோற்று கோப்பையைக் கோட்டை விட்டது.
இரண்டாம் தொடரில் அரையிறுதிப் போட்டியில் பெங்களூருவிடம் தோற்று வெளியேறியது.
சென்ற வருடம் முதல் போட்டியில் அப்போதைய நடப்புச் சாம்பியனான ஹைத்ரபாத்துடன் தோல்வியில் துவங்கிய சென்னை இறுதிப் போட்டியில் மும்பையை 22 ரன்கள் வித்தியாசத்தில் வென்று கோப்பையைக் கைப்பற்றியது.
நான்காம் தொடரின் சூப்பர் இன்னிங்க்சில் முதல் போட்டியில் பெங்களூருவை வென்று இறுதிப்போட்டிக்குள் நுழைந்துள்ளது.

மூன்றாவது முறையாக இறுதிப்போட்டியில் விளையாடும் சென்னை வெல்ல நல்வாழ்த்துக்கள்.

UPDATE: 58 ரன்கள் வித்தியாசத்தில் சென்னை அபார வெற்றி.

கழுதைக் கணக்கு

2011-05-25T06:46:00.001+05:30

சமன்பாடு 1

மனிதன் = சாப்பாடு + தூக்கம் + உழைப்பு + மகிழ்ச்சி

கழுதை = சாப்பாடு + தூக்கம்

ஆகவே

மனிதன் = கழுதை + உழைப்பு + மகிழ்ச்சி

அதாவது

மனிதன் - மகிழ்ச்சி = கழுதை + உழைப்பு

தீர்வு: மகிழ்ச்சியாக வாழத்தெரியாத மனிதன் உழைக்கும் கழுதை.

சமன்பாடு 2

ஆண் = சாப்பாடு + தூக்கம் + பொருள் ஈட்டுவது

கழுதை = சாப்பாடு + தூக்கம்

ஆகவே

ஆண் = கழுதை + பொருள் ஈட்டுவது

அதாவது

ஆண் - பொருள் ஈட்டுவது = கழுதை

தீர்வு: சம்பாதிக்காத ஆண் கழுதை.

சமன்பாடு 3

பெண் = சாப்பாடு + தூக்கம் + செலவு

கழுதை = சாப்பாடு + தூக்கம்

ஆகவே

பெண் = கழுதை + செலவு

அதாவது

பெண் - செலவு = கழுதை

தீர்வு: செலவு செய்யாத பெண் கழுதை.

சமன்பாடு இரண்டு மற்றும் மூன்றின் படி

சம்பாதிக்காத ஆண் = செலவு செய்யாத பெண்

அதாவது

பெண் கழுதையாகாமல் இருக்க ஆண் சம்பாதிக்கிறான்.

ஆண் கழுதையாகாமல் இருக்க பெண் செலவு செய்கிறாள்.

ஆண் + பெண் = கழுதை + வருமானம் + கழுதை + செலவு

முடிவு : ஆணும் பெண்ணும் சேர்ந்து சம்பாதித்து செலவு செய்யும் இரு கழுதைகள்.

இந்த மொக்கைப் பதிவை படித்துவிட்டு என்னை திட்ட நினைப்பவர்கள் இதை எனக்கு ஆங்கிலத்தில் மின்னஞ்சல் செய்த கழுதையை திட்டுமாறு கேட்டுக்கொள்ளப் படுகிறார்கள்.

சிக்ஸர் அடித்தார் வைரமுத்து

2011-05-22T08:45:00.002+05:30

கவிஞர் வைரமுத்து திரைப்பாடலாசிரியராக ஆறாவது முறை தேசிய விருது பெறுகிறார். முதல் மரியாதை, ரோஜா, கருத்தம்மா, சங்கமம், கன்னத்தில் முத்தமிட்டால் படங்களைத் தொடர்ந்து தென்மேற்குப் பருவக்காற்று படத்திற்காக இவ்விருதைப் பெறுகிறார். அவரை வாழ்த்தி மகிழும் இந்த இனிய தருணத்தில் எனக்கு மிகப் பிடித்த அவர் கவிதைகளில் ஒன்று உங்களுக்காக...

உன்னைப் பார்த்து உலகம் குறைக்கும்

தன்னம்பிக்கை தளர விடாதே

இரட்டைப் பேச்சுப் பேசும் உலகம்

மிரட்டும் தம்பி மிரண்டு விடாதே

ஒவ்வொரு வாயிலும் ஒற்றை நாக்கு

உலகின் வாயில் இரட்டை நாக்கு

எனக்கு நேர்ந்த இழிமொழி எல்லாம்

உனக்குச் சொல்கிறேன் உள்ளத்தில் எழுது

இன்னிசைத் தமிழை எளிமை செய்தேன்

இலக்கியம் இல்லை லேகியம் என்றது

திரைப்பாட்டுக்குள் செழுந்தமிழ் செய்தேன்

பரிமே லழகரை வரச்சொல் என்றது

குறுந்தொகை கம்பன் கொட்டி முழக்கினேன்

குண்டுச் சட்டியில் குதிரை என்றது

எலியட் நெருடா எல்லாம் சொன்னேன்

திறமை எல்லாம் திருடிய தென்றது

எளிய தோற்றமே இயல்பென இருந்தேன்

வடுக பட்டி வழியுது என்றது

அழகாய் நானும் ஆடைகள் கொண்டேன்

கழுதைக் கெதற்குக் கண்மை என்றது

மேடையில் கால்மேல் காலிட் டமர்ந்தேன்

படித்த திமிர்தான் பணிவில்லை என்றது

மூத்தவர் வந்ததும் முதலில் எழுந்தேன்

கவிஞன் நல்ல "காக்கா" என்றது

உயர்ந்தோர் பெருமை உவந்து புகழ்ந்தேன்

காதில் பூ வைக்கிறான் கவனம் என்றது

விரல்நகத் தளவு விமர்சனம் செய்தேன்

அரிவாள் எடுக்கிறான் ஆபத்து என்றது

மற்றவர் சூழ்ச்சியால் மண்ணில் விழுந்தேன்

புத்தி கொழுத்தவன் புதைந்தான் என்றது

மூச்சுப் பிடித்து முட்டி முளைத்தேன்

தந்திரக் காரன் தள்ளிநில் என்றது

பகையைக் கண்டு பைய நகர்ந்தேன்

பயந்துவிட்டான் பாவம் என்றது

மோதி மிதித்து முகத்தில் உமிழ்ந்தேன்

விளங்கி விட்டதா மிருகம் என்றது

பணத்தில் பொருளில் பற்றற் றிருந்தேன்

வறுமையின் விந்தில் பிறந்தவன் என்றது

என்னைத் தேய்த்து மண்டபம் கட்டினேன்

புலவன் இல்லை பூர்ஷ்வா என்றது

சொந்த ஊரில் துளிநிலம் இல்லை

இவனா மண்ணின் மைந்தன் என்றது

தென்னை மரங்கள் தேடி வாங்கினேன்

பண்ணையார் ஆனான் பாவலன் என்றது

கயவர் கேட்டால் காசு மறுத்தேன்

கறக்க முடியாக் கஞ்சன் என்றது

உண்மை இருந்தால் உறுபொருள் கொடுத்தேன்

உதறித் திரியும் ஊதாரி என்றது

மங்கைய ரிடையே மௌனம் காத்தேன்

கவிஞன் என்ற கர்வம் என்றது

பெண்கள் சிலருடன் பேசத் தொடங்கினேன்

கண்களைக் கவனி காமம் என்றது

விருதுகள் கழுத்தில் வீழக் கண்டேன்

குருட்டு அதிஷ்டம் கூடிய தென்றது

மீண்டும் மீண்டும் விருதுகள் கொண்டேன்

டெல்லியில் யாரையோ தெரியும் என்றது

திசைகள் தோறும் தேதி கொடுத்தேன்

அய்யோ புகழுக் கலைகிறான் என்றது

நேரக் குறைவு நிறுத்திக் கொண்டேன்

கணக்குப் பார்க்கிறான் கவிஞன் என்றது

அப்படி இருந்தால் அதுவும் தப்பு

இப்படி இருந்தால் இதுவும் தப்பு

கத்தும் நாய்க்கு காரணம் வேண்டாம்

தன்நிழல் பார்த்துத் தானே குறைக்கும்

உலகின் வாயைத் தைத்திடு; அல்லது

இரண்டு செவிகளை இருக்க மூடிடு

உலகின் வாயைத் தைப்பது கடினம்

உந்தன் செவிகளை மூடுதல் சுலபம்

நலம்பெற வாழ்த்துக்கள் ரஜினி

2011-05-19T06:30:00.000+05:30

தனது அடுத்த படமான ராணாவின் முதல் நாள் படப்பிடிப்பின் பொது மூச்சுத்தினரலால் அவதிப்பட்ட ரஜினிகாந்த் ஏப்ரல் 25 ம் தேதி சென்னை இசபெல் மருத்துவமனையில் அனுமதிக்கப்பட்டார். சிலநாள் சிகிச்சைக்குப் பின் மீண்டும் திரைப்படப் பணிகளை தொடர்ந்தார்.

மே 13ம் தேதி உடல்நலக் குறைவால் மீண்டும் மருத்துவமனையில் அனுமதிக்கப்பட்டார். நிமோனியா மற்றும் வயிற்றுக் கோளாறால் அவதிப்பட்ட ரஜினிக்கு நுரையீரல் தொற்றுக்கான சிகிச்சை அளிக்கப்பட்டது. சிறுநீரக செயல்பாடுகள் குறைந்துள்ள நிலையில் மருத்துவர்கள் டயாலசிஸ் கொடுத்துள்ளனர்.

இந்நிலையில் நேற்று நள்ளிரவு சிறப்பு வார்டில் இருந்து ராமச்சந்திரா மருத்துவமனையின் ICU வுக்கு ரஜினி மாற்றப்பட்டுள்ளார். சிகிச்சைகள் தொடர்வதாகவும் நுரையீரல் தொற்று சரியானதும் அவருடைய சிறுநீரகங்கள் மீண்டும் இயல்பாய் செயல்படத் துவங்குமென்றும் அதன் பிறகு டயாலசிஸ் தேவைப்படாது என்றும் மருத்துவர்கள் தெரிவித்துள்ளனர்.

உண்மை நிலை இப்படி இருக்கையில் விசமிகள் பலர் தவறான தகவல்களைப் பரப்புகின்றனர். ரஜினிகாந்த் விரைவில் குணமடைய வேண்டுகிறேன்.

நீயின்றி அமையாது உலகு

2011-05-14T07:47:00.006+05:30

உன்னில் துவங்கி
உன்னில் முடிகிறது
உலகம் எனக்கு.

உனக்கென காத்திருக்கும்
நிமிடங்கள் வருடமென
நிச்சயம் சொல்லமாட்டேன்.
நீயில்லா நிமிடங்கள்
எப்படிக் கடந்தால்
எனக்கென்ன?
என் கவனமெல்லாம்
என்னோடு நீயிருக்கும்
நிமிடங்கள் பற்றியது.
கண்கள் சந்திக்கும்
அந்தக்
கற்கண்டு நிமிடத்தில்
கடிகார முட்களுக்கு
காலுடைய வேண்டுகிறேன்.

உன்னில் துவங்கி
உன்னில் முடியட்டும்
உலகம் எனக்கு....

வைகறைப் பனி
அரைத்தூக்க முத்தம்.

கதிரவ தரிசனம்
கண்விழித்துப் பார்க்கிறாய்.

காற்றிலசையும் இலைகள்
தலைகோதும் விரல்கள்.

காதற் பறவைகள்
கைகோர்த்த நினைவுகள்.

உரைக்கும் வெயில்
உணர்ச்சிவச சுடுசொல்.

ஊமைவெயில் மேகம்
உன்னுடைய பொய்க்கோபம்.

மாலையும் அந்தியும்
மயக்கும் உரையாடலூடல்.

வெண்ணிலா
விளக்கணைத்தபின் நீ.

உன்னில் துவங்கி
உன்னில் முடியும்
உலகம் எனக்கு...

புர்ஜ் காலிபாவில் தற்கொலை

2011-05-11T07:04:00.003+05:30

புர்ஜ் காலிபா (Burj Khalifa) 160 மாடிகள் கொண்ட உலகிலேயே உயரமான இந்தக் கட்டிடம் துபாயில் உள்ளது (2717 அடிகள்). 2010 ஆம் ஆண்டு ஜனவரி மாதம் நான்காம் தேதி திறந்துவைக்கப்பட்ட இதில் 19 வது தளத்தில் இருந்து 108 வது தளம் வரை குடியிருப்புகள். அதற்கு மேலே 37 தளங்களில் அலுவலகங்கள் இயங்குகின்றன. உலகிலேயே உயரமான மசூதி இந்தக் கட்டிடத்தின் 158வது தளத்தில் உள்ளது.

இந்தக் கட்டிடத்தின் 147 வது தளத்தில் இருந்து சுமார் முப்பது வயது மதிக்கத்தக்க வாலிபர் நேற்று காலை சுமார் ஒன்பது மணியளவில் வெளியே குதித்து தற்கொலை செய்துகொண்டார். 147 வது தளத்தில் இருந்து குதித்த இவர் மற்ற தளங்களில் மோதி 108 வது தளத்தின் பால்கனியில் விழுந்து உயிர்விட்டார். 147 வது தளத்தில் சன்னல்களோ பால்கனியோ இல்லை என்பதால் இவர் AC வைத்திருந்த துவாரத்திலிருந்து குதித்தார் என நம்பப்படுகிறது.

இந்த சோக நிகழ்வை உறுதி செய்துள்ள போலீசார் இறந்தவர் யாரென்ற விவரம் இன்னும் கண்டுபிடிக்கப்படவில்லை என்று தெரிவித்துள்ளனர். விடுமுறை கிடைக்காத இந்திய வாலிபர் மனமுடைந்து தற்கொலை செய்துகொண்டதாக உறுதிசெய்யப்படாத தகவல்கள் தெரிவிக்கின்றன.

12.05.2011
இறந்தவர் சிவகங்கையைச் சேர்ந்த ஆதிராமன் கிருஷ்ணன் என்ற 38 வயது தமிழர் என்றும் அராப்டெக் (Arabtec ) என்னும் கட்டுமான நிறுவனத்தில் கிளீனராக பணியாற்றி வந்த இவரின் சூப்ரவைசர் பலமுறை கேட்டும் விடுமுறை கொடுக்காததால் மனமுடைந்து தற்கொலை செய்துகொண்டதாகவும் செய்திகள் வெளியாகியுள்ளது.

அம்மா

2011-05-08T06:52:00.001+05:30

முதல்மாத சம்பளத்தில்

பட்டுப்புடவை - உன்

முகம் மலர

கீதைப் புத்தகம்.

கழுத்து கனக்க

தங்கப் பதக்கம்- என்

சாம்ராஜ்யத்தில்

தலைமைப் பீடம்.

உனக்கு

எவ்வளவு செய்தாலும்

பாக்கி இருக்கிறதே....

பத்து மாத வாடகையும்

பால்கணக்கும்.

கோபம் கொப்பளிக்கும் தலைப்புகள்

2011-05-04T06:49:00.000+05:30

Osama bin Mohammed bin Awad bin Laden. அரேபிய மொழியை பின்னிருந்து படிக்க வேண்டும் என்பதால் இந்தப் பெயரின் அர்த்தம் லேடனின் மகன் அவாத். அவாதின் மகன் முகமது. முகமதுவின் மகன் ஒசாமா என்று பொருள்படும். ஆகவே அவரை பின்லேடன் என்று சொல்வதை விட ஒசாமா என்று சொல்வதே சரி.

சௌதி அரேபியாவில் அரச குடும்பத்திற்கு நெருக்கமான பணக்கார வியாபாரியின் பத்தாவது மனைவிக்கு மகனாகப் பிறந்தார் ஒசாமா. கல்லூரிப் படிப்பை முடித்தபின் ஒசாமா அப்துல்லா ஆஜாமுடன் சேர்ந்து ஆப்கானிஸ்தானில் சோவியத் யூனியனின் ஆக்கிரமிப்பை எதிர்த்துப் போராடினார். பின்னர் அமெரிக்க ஜனாதிபதிகள் கார்ட்டரும் ரீகனும் அமெரிக்க மத்திய உளவுத்துறை மூலம் பணமும், பயிற்சியும், ஆயதங்களும் கொடுத்து வளர்த்தனர். அல்கொய்தா என்னும் அமைப்பை நிறுவி தீவிரவாத செயல்களில் ஈடுபட்டார். 2001 ல் செப்டெம்பர் 11 அன்று நியுயார்க்கில் நடத்திய விமான தாக்குதலில் ஆயிரக்கணக்கான அமெரிக்கர்கள் கொல்லப்பட்டனர். அன்றிலிருந்து பத்து வருடம் தேடி நேற்று முன்தினம் பாகிஸ்தானில் ராணுவ மையத்திற்கு மிக அருகில் அபாத்தாபாத்தில் உள்ள வீட்டில் வைத்து அமெரிக்க உளவுத்துறையும் சிறப்பு கடற்படையும் இணைந்து கொன்றனர். ஒசாமாவுக்கு நான்கு மனைவிகளும் சுமார் 12 முதல் 24 குழந்தைகளும் இருக்கலாம் என நம்பப்படுகிறது.

ஒசாமா தங்கியிருந்த வீட்டின் மீது ஹெலிகாப்டர் மூலமாகவும் தரை வழியும் சுமார் நாற்பது நிமிடங்கள் நடைபெற்ற தாக்குதலை ஒபாமாவும் ஹிலாரி கிளிண்டனும் நேரடியாகப் பார்த்தனராம். மூன்று மாடி வீட்டை சுற்றி 18 அடி உயர மதில் சுவரும் அதன் மேல் மின் கம்பிகள் அமைத்து மிக பாதுகாப்பாக பதுங்கியிருந்த ஒசாமா இந்த தாக்குதலை சற்றும் எதிர்பார்க்கவில்லை. கையில் ஆயுதம் ஏதும் இல்லாமல் இருந்த ஒசாமாவை மனைவி மனித கேடயமாகி காக்க முயன்றாராம். பாதுகாப்பாய் தங்க இடம் கொடுத்துவிட்டு மனித குலத்துக்கே பெரும் அச்சுறுத்தலாய் இருந்த ஒசாமாவை கொள்ள உதவியதாக பாகிஸ்தான் சொல்கிறது.

திங்களன்று அமெரிக்காவின் செய்தித்தாள்களில் வந்த தலைப்புகளைப் பாருங்கள்.

மனப்பெண்

2011-04-24T07:30:00.000+05:30

கல்லூரிக் காலத்தில்
காதலிக்கும் யோகமில்லை
அலுவலகம் வந்தபின்
அமையுமென்றும் நினைக்கவில்லை!

உண்டு குடித்து உறங்கி
ஊர்சுற்றித் திரிந்தபோதும்
கண்டுகொள்ளவேயில்லை என்னுள்
காதல் விதை உறங்கியதை!

உன்புன்னகை சிந்திய
பொன்னொளி பட்டதும்
உறங்கிய விதையது
உயிர்பெற்றது விருட்சமாய்!

எப்படிச் சொல்வதென்று
எண்ணித் தவிக்கையில்
தேவதை நீயே
தித்திக்கும் வரம்தந்தாய்!

வாகனத்தில் உடனமர்ந்து
வருவதற்கே தயங்கியவள்
வாழ்க்கை முழுவதுமே
உடன்வர சமதித்தாய்!

நீயென் மூச்சுக்காற்றில்
ஊதிய பந்து
முதல்முதல் பாடிய
காவடிச் சிந்து!

மழைத்துளி தீண்டலில்
மணக்கின்ற பூமியாய்
மனதுக்குள் மலர்வெடிக்க
மகிழ்ந்தேன் நான்!

இன்று
மனப்பெண்ணே
என்னருகில்
மணப்பெண்ணாய்.....

கவிதைப் போட்டி

2011-04-14T06:28:00.001+05:30

கடந்த ஒரு மாதத்திற்கு மேலாக அரசியல் பதிவெழுதி நிறையபேர் களைத்துப் போயிருப்பீர்கள். உங்களுக்கு ஒரு ஜாலி சவால். கீழே உள்ள இந்தப் புகைப்படத்துக்குப் பொருத்தமாக கவிதை எழுதுங்களேன்....

அனைவருக்கும் சித்திரைத் திருநாள் நல்வாழ்த்துக்கள்!

பெயர்

2011-04-08T06:24:00.001+05:30

பெயர் ஒவ்வொரு மனிதனையும் தனித்துவமாக்கும் தனி அடையாளம். அத்தனை மனிதர்களுக்கும் மிகப்பிடித்த ஒற்றை வார்த்தை அவரவர் பெயராகத்தான் இருக்கும். ஆதி காலத்தில் எலேய் என்று கூப்பிட்டால் எல்லோரும் திரும்பி இருக்கக் கூடும். அதைத் தொடர்ந்த சிந்தனையின் செயல் வடிவமே பெயர் இடுதல். சுய அடையாளம் சுட்டுவதற்காய் சுடர்விட்ட பெயர் பின்னாளில் சாதி, தொழில், குடும்பம் போன்ற கூடா நட்பால் 'பேர்' கெட்டுப்போனது. தமிழ் நாட்டில் பகுத்தறிவு முழக்கங்களும் திராவிட இயக்கமும் பெயர் சீரமைப்பில் பெரும்பங்கு ஆற்றியுள்ளன. என் தாத்தாவின் பெயருடன் இருந்த சாதியை என் பெயரில் இருந்து நீக்கிய பெரியாருக்கு நன்றி!

மனிதர்கள் மட்டுமல்ல டால்பின்களும் பெயர்சொல்லி அழைத்துக் கொள்வதாக ஆய்வுகள் நிருபித்துள்ளன. ஒவ்வொரு டால்பினையும் விளிக்க தனித்தனி விசிலை பயன்படுத்துகிறதாம் டால்பின்கள்.

சரவணன்.

பங்குனி உத்திரத்தன்று பிறந்ததால் அம்மா எனக்கு சரவணன் என பெயர் வைத்தார்கள். நான் முன்னொரு பதிவில் சொன்னதுபோல ச.ஆ.பெரமனூரில் உள்ள ஊ.ஒ.து.பள்ளியில் ஒன்றாம் வகுப்பு படித்த நாளில் இருந்தே என்னுடன் சில சரவணன்கள் எப்போதும் இருப்பார்கள். எங்களை வேறுபடுத்துவதற்காக பட்டப்பெயர்கள் வைக்கப்படும். உதாரணத்திற்கு முதுநிலை மருந்தாக்கியல் படிக்கையில் என் வகுப்பில் என்னைவிட கருப்பாய் ஒரு சரவணன் இருந்ததால் அவர் 'கருப்பு' சரவணன். சாலமன் பாப்பையாவை சந்திக்கும் போது வைரமுத்துவுக்கு இரண்டு விஷயங்கள் மகிழ்ச்சி தருமாம். ஒன்று சிரிக்க வைக்கும் பேச்சு. இரண்டாவது அவருடன் இருக்கும் போது தான் தான் கருப்பில்லை என்ற எண்ணம் தோன்றுமாம்.

நான் நான்காம் வகுப்பு படிக்கும் போது நடந்த ஓர் சம்பவம். அப்போது பள்ளிக்கு நேரெதிரே எங்கள் மளிகைக் கடை இருந்தது. பக்கத்துக் கடை ஜெயராம் அண்ணனின் டீக்கடை. மாலையில் ஒவ்வொரு ஆசிரியரும் அவர் வகுப்பில் இருந்து யாரையாவது அனுப்பி டீ வாங்கி வரச் சொல்வார்கள். அதற்கு எங்களிடையே போட்டி நடக்கும். அப்படித் தான் அன்றும் பிரேமா டீச்சர், சரவணா டீ வாங்கி வா என்று சொல்லி முடிப்பதற்குள் வகுப்பிலிரிந்து நான் எழுந்து ஓடினேன். ஏனென்றால் எங்கள் வகுப்பில் மூன்று சரவணன்கள் இருந்தோம். வேகமாய் ஓடினேன். சாலையைக் கடந்து எதிர்புறம் உள்ள டீக்கடை மட்டுமே என் குறியாய் இருந்ததால் சாலையில் வந்த டிராக்டரை கவனிக்கவில்லை. நேரே டிராக்டரின் பெரிய பின் சக்கரத்தில் மோதி தேங்கியிருந்த மழை நீரில் விழுந்தேன். அப்பா கடையில் மடித்துக் கொண்டிருந்த பொட்டலத்தை அப்படியே போட்டுவிட்டு ஓடி வந்தார். திராக்கரை ஓட்டி வந்த்தவரும் தெரிந்தவர். 'அண்ணா நான் பிரேக் மேல ஏறி நின்னேன் அப்பாவும் என்னால ஒன்னும் பண்ண முடியல' என்று சொல்லி என் அப்பாவின் கைப்பிடித்து அழுதார் அவர். இவன்தான் கண்முன் தெரியாம ஓடி வந்தான் உன்மேல் ஒரு தவறும் இல்லை என்று அவரை சமாதானப்படுத்தி அனுப்பினர் என் அப்பா. மாலை மொத்த வகுப்பும் என்னைப் பார்க்க வந்தது. அதன் பிறகு இனிசியலோடு சேர்த்து தான் பெயர் சொல்வார் எங்கள் ஆசிரியை. இப்படி சின்ன வயசில் இருந்தே நான் தான் பள்ளிக்கூடத்தில் முதல் மாணவன். ஸ்கூல் விட்டதும் வீட்டுக்கு வருவதில்....

அப்புறம் கல்லூரி நாட்களில் சத்யப்ரியன் என்ற பெயரில் கவிதைகள் எழுதினேன். ஆனந்த விகடனில் என் முதல் கவிதை என் மனைவியின் பெயரில் வந்தது. அதன் பிறகு வலைப்பூ துவங்கிய நாளில் இருந்து கலாநேசனானேன். ஆனந்த விகடனில் பிரசுரமான கவிதை:

கால்களுக்குக் கீழே

நகர்கின்ற பூமி

பேருந்தில் ஓட்டை.

குறிப்பு: இந்த தொடர்பதிவை எழுத அழைத்த நண்பர் கோபிக்கு நன்றி. இவ்வளவு "சீக்கிரமாய்" எழுதியதற்கு மன்னிக்கவும்.

புதிய பார்வை (சிறுகதை)

2011-04-01T06:31:00.001+05:30

நான் ஒரு தகவல் தொழில்நுட்பப் பொறியாளன். சொந்த ஊர் லால்குடிக்கு அருகில் உள்ள கூகூர். இப்போது சென்னையில் பணிபுரிகிறேன். இரண்டு நாள் விடுமுறையில் ஊருக்குப் போவதற்காக இரண்டு மாதங்கள் முன்னரே குழுத் தலைவர், திட்டத் தலைவர் அப்புறம் ஒரு பெருந்தலைவர் என மூணு பேரிடம் அனுமதி வாங்கினேன். அப்படி இருந்தும் இன்று மாலை பல்லவனைப் பிடிக்கப் போகும் என்னிடம் முக்கிய வேலையோன்றைக் கொடுத்து முடித்துவிட்டுப் போ என்றார்கள். ஏன் தான் இந்தத் தனியார் நிறுவனங்களில் விடுமுறையில் செல்லும் போதெல்லாம் நாம் வேலையை விட்டே போவதுபோல் நடத்துகிறார்களோ தெரியவில்லை. எரிச்சலுடன் அவசர அவசரமாய் கொடுத்த வேலையை முடித்துவிட்டு ஷேர் ஆட்டோ பிடித்து சோழிங்கநல்லூர் வந்தேன். மழை வரும்போல் இருந்தது. நெடுந்தவத்திற்குப் பிறகு நிறைய கும்பலுடன் T51 வந்தது. நெரிசலில் நசுங்கி நின்று கொண்டே வந்த என்னை கிழக்குத் தாம்பரத்தில் துப்பியது பேருந்து.

பேருந்து நிறுத்தத்தில் இருந்து ரயில் நிலையத்தின் ஆறாவது நடைமேடைக்கு ஓடினேன். என் குழுத்தலைவனை மீண்டுமொருமுறை ஆங்கில கெட்டவார்த்தையில் திட்டிக் கொண்டே மூச்சு வாங்கி முடிக்கையில் பல்லவன் வந்தது. முன் பதிவு செய்திருந்த என் சன்னலோர இருக்கையில் அமர்ந்ததும் நிம்மதியாய் உணர்ந்தேன். பக்கத்துக்கு இருக்கை காலியாக இருந்தது. எதிரே சுமார் 25 வயது மதிக்கத்தக்க ஒரு இளைஞனும் அருகில் அவன் தந்தையும் இருந்தனர். எதிர் இருக்கை இளைஞனின் நடவடிக்கைகள் வித்தியாசமாக இருப்பதை உணர்ந்தேன். என்னைப் பார்த்து சிரித்தான். பின் இன்று தான் முதன்முதலாய் ரயிலைப் பார்ப்பது போல அங்குலம் அங்குலாமாய் பார்வையில் விழுங்கினான்.

சிறிது நேரம் கழித்து அப்பா இங்கே பாருங்கள் வீடு கடைகளெல்லாம் பின்னால் போகுதென்றான். அவன் அப்பாவோ "ஆமாப்பா" என்று சிரித்தார். என்னடா இது சின்னபுள்ளத்தனமா இருக்கே என்று நானும் சிரித்துக் கொண்டேன். சிறிது நேரத்தில் சிலிசிலுவென காற்று அடித்தது. அப்பா காற்றைக்கூடப் பார்க்க முடியுமா, அங்கே பாருங்கள் மரங்களின் தலைகலைக்கிறது என்றான். அவன் அப்பாவோ "ஆமாப்பா" என்று சிரித்தார். இன்னும் கொஞ்ச நேரம் கழித்து அங்கே பாருங்கள் ஏரி என்றான், அதோ பாருங்கள் குருவி என்றான், இதோ பாருங்கள் பூக்கள் என்றான். அவன் அப்பாவோ வழக்கம்போல "ஆமாப்பா" என்றார். நானோ எனக்கு மட்டும் கேட்குமாறு 35007 என்றேன்.

இவனுக்கு எப்படியும் 25 - 30 வயதிருக்கும். அப்புறம் ஏன் இப்படி பைத்தியக் காரன் போல நடந்து கொள்கிறான் என்று நினைத்து கொண்டிருக்கையில் மெதுவாய் தூர ஆரம்பித்தது. உடனே அவன் கைகளை சன்னலுக்கு வெளியே நீட்டி உள்ளங்கையில் சிறுதுளி பிடித்து அப்பா மழை என்றான். அவர் ஆமாம்பா சொல்வதற்குள் அடக்க முடியாமல் கேட்டே விட்டேன். உங்க பையன ஒரு நல்ல டாக்டர்கிட்ட காட்டலாமே என்றேன். அவரோ கோபப்படாமல் பொறுமையாய் சொன்னார். ஆமாம்பா...டாக்டர்கிட்ட காட்டிட்டுத்தான் வந்தேன். என் மகனுக்கு சிறுவதில் போன பார்வை நீண்ட சிகிச்சைக்குப் பின்னர் இன்று தான் மீண்டும் கிடைத்தது என்றார்.

மஞ்சள் துண்டும் பச்சை இலைகளும்

2011-03-26T07:16:00.000+05:30

தமிழக சட்டசபைத் தேர்தலில் போட்டியிட வேட்புமனு தாக்கல் செய்ய இன்று கடைசி நாள். மஞ்சள் துண்டும் பச்சை இலைகளும் அரசியல் வியாபாரத்தில் சிலபல கட்சிகளை வாங்கி தங்களுக்கு பலம் சேர்த்துக் களம் இறங்குகின்றன. அனுதினமும் புதிய புதிய இலவச அறிவிப்புகள் காற்றில் வந்து நம் நெஞ்சை நனைக்கின்றன. எந்த அரசும் இலவசங்களைத் தரக்கூடாது என்று சட்டம் இயற்ற முடியாதா? பாரதி கேட்ட காணி நிலம் போல, இரண்டு ஏக்கர் நிலம், அப்புறம் ஒரு வீடு, அதில் தொலைகாட்சி, மிக்சி, கிரைண்டர், சாப்பாட்டு அரிசி, சைக்கிள், லேப்டாப், மாடுகள் எல்லாமே இலவசமாகக் கொடுத்தால் ஏழைத் தமிழன் எதைத்தான் உழைத்து சம்பாதிப்பான். நான் கோடி ரூபாய் கொள்ளையடிக்கப் போகிறேன் அதில் பத்து ரூபாய் உங்களுக்குப் பிரித்துத் தருகிறேன் "தயவுசெய்து" எனக்கு ஓட்டுப் போடுங்கள் என்று ஒப்பந்தம் போடுவதாகவே இலவச அறிவிப்புகள் இருக்கிறது. வழக்கத்திற்கு அதிகமாக பணமும் பரிசுப் பொருட்களும் பிடிபடுகிறது.

தனிமனிதத் தாக்குதல்களுக்கும் குறைவில்லை. தனது வீட்டில் விஜயகாந்தின் ஆட்கள் கல்லெரிந்ததாகவும் அந்தக் கோபத்தில் பேச வந்துள்ளதாகவும் திருவாரூரில் சொன்ன நடிகர் வடிவேல் அவன் இவன் என்ற ஏக வசனத்தில் பேசத்துவங்கினார்.

"நீ முதலமைச்சர்னா நான் பிரதமர். நீ பிரதமர்னா நான் ஜனாதிபதி. நீ கருப்பு எம்.ஜி.ஆர் னா நான் கருப்பு நேரு"

"தண்ணில ஆடற கப்பலை சமாளிக்கறவந்தான் கேப்டன். எப்பவும் தண்ணில ஆடறவன் கேப்டனில்லை"

நிற்க. (அட உங்களைச் சொல்லலைங்க நீங்க உட்காருங்க. நான் என்னைச் சொன்னேன். இது அரசியல் பதிவில்லைங்க அறிவியல் பகிர்வு. ஆனாலும் இந்தத் தலைப்பை வைத்தவுடன் எண்ணியது ஒன்று எழுதுவது ஒன்றாகிப் போனது. சரி விசயத்திற்கு வருவோம்.)

நாம் சற்றும் எதிர்பார்க்காத சில சமையலறைப் பொருட்கள் நமக்கு மருந்தாகக்கூடிய சாத்தியமிருக்கிறது. தமிழ் சினிமா புற்று நோய் வந்தவர்கள் பிழைக்க முடியாது என்ற "விழிப்புணர்வை" ஏற்ப்படுத்திய பின்னரும் காலங்காலமாய் நாம் சமையலறையில் பயன்படுத்தும் மஞ்சள் பொடி கழுத்து, தலை புற்று நோய்களுக்கு மருந்தென்று சொன்னால் நம்புவீர்களா? ஏன்டி ஆக்சிடண்ட்ஸ் (Anti oxidants), ஆஸ்பிரின் நிறைந்துள்ள பச்சைத் தேயிலைச்சாறு சில வகையான புற்று நோயை குணப்படுத்தும் என்றால் ஆச்சர்யப்படுவீர்கள் அல்லவா?

பெங்களூருவில் உள்ள மசும்தர் ஷா கான்செர் சென்டர் (MSCC), 220 வாய்ப்புற்று நோய்கொண்ட மனிதர்களுக்கு மஞ்சள் கொடுத்து மருத்துவ ஆராய்ச்சி செய்துள்ளது. இந்த ஆராய்ச்சியின் முடிவுகள் ஒருசில வாரங்களில் வெளியிடப்படும். மஞ்சளும் சில வகையான தேயிலைச் சாறுகளும் புற்று நோய் மருத்துவத்தில் பயன்படுத்துவதை இந்த ஆராய்ச்சி உறுதி செய்யும்.

வாழ்க்கைமுறையும் உணவுப் பழக்கமுமே 85 சதவீத புற்று நோய்களுக்குக் காரணம்.
95 சதவீத வாய்ப்புற்று நோய்களுக்கு புகையிலையே காரணம்.
வாழ்க்கை முறை மாற்றத்தாலும் உணவுக் கட்டுப்பாட்டாலும் பெரும்பாலான மார்பகப் புற்றுநோய்களை தடுக்க முடியும். கொழுப்பு குறைவான உணவுடன் காய்கறியும் பழங்களும் சேர்த்துக்கொள்ளும் பெண்களுக்கு மார்பகப் புற்றுநோயின் வாய்ப்புகள் மிகக் குறைவு.
புகையும் மதுவும் புற்று நோய்க்கான வெற்றிக் கூட்டணி. புகைப் பழக்கத்தோடு ஒருவர் மதுவும் அருந்தினால் புற்றுநோய் வருவதற்கான வாய்ப்புகள் எட்டு மடங்கு அதிகரிக்கும்.

பிச்காரி

2011-03-20T10:51:00.000+05:30

இன்று ஆரியர்கள் அனைவரும் கொண்டாடும் ஹோலி திருவிழா. ஹோலி என்றதும் என் நினைவுக்கு வருவது வண்ணப்பொடி, எண்ணெய், கிரீஸ், மை, முட்டை, தக்காளி, பெயின்ட் என கலந்துகட்டி சீனியர்களுடன் ஹோலி விளையாடிய கல்லூரி முதலாமாண்டு ஹோலிதினம் தான். நான் அதற்கு முன்பின் அப்படி கொண்டாடியதேயில்லை. ஹோலி என்றால் நெருப்பு என்று பொருள். இன்றோ வெறும் வண்ணங்கள் மட்டும் நினைவில் நின்று இத்திருவிழாவின் எண்ணம் மெல்ல மறைகிறது. சரி, ஹோலியின் புராணக் கதை காண்போமா?

இப்போ நான் சொல்லப்போகும் புராணக்கதை உங்களில் பலருக்குத் தெரிந்திருக்கும். தசாவதாரம் படத்தில் கூட வருகிறது. (இது கமல் நடித்த தசாவதாரம் இல்லைங்க). ஹிரன்யஹஷிபு நெடுந்தவம் புரிந்து பிரம்மாவிடம் ஒரு அரிய வரம் பெற்றான். அதன்படி அவனை மனிதனோ மிருகமோ, பகலிலோ இரவிலோ, மண்ணிலோ விண்ணிலோ, வீட்டிலோ வெளியிலோ கொல்ல முடியாது. மூவுலகையும் ஆள முடிவெடுத்த ஆவான் ஏராளமான கொடுமைகள் செய்தான். அனைவரும் இனி கடவுளை வணங்குவதை நிறுத்திவிட்டு தன்னை வணங்குமாறு கட்டளையிட்டான். உலகமே பயத்தில் நடுங்கிய போதும் அவன் மகன் பிரகலாதன் மட்டும் நாராயணனை வணங்கினான். பிரகலாதனை பலவகையில் பயமுறுத்தியும் அவன் கடவுளை வணங்குவதை நிறுத்தவேயில்லை. தந்தையே மகனைக் கொல்ல முடிவெடுத்தான். விஷம் கொடுத்தான், பாம்புகளுடன் அறையிலடைத்தான், பட்டினி கிடக்கச் செய்தான், யானைகளை விட்டு மிதிக்க வைத்தான். எதுவும் பிரகலாதனை ஒன்றும் செய்யவில்லை. பிறகு அவன் தங்கை ஹோலிகாவிடம் (நோட் பண்ணுங்கப்பா..நோட் பண்ணுங்க...ஹோலிகா) பிரகலாதனைக் கொல்லுமாறு கட்டளையிட்டான் ஹிரன்யகஷிபு. ஹோலிகாவோ நெருப்பில் எரியாத வரம்* வாங்கியிருந்தாள். பிரகலாதனை மடியில் வைத்துக்கொண்டு நெருப்பிடச் சொன்னாள். பிரகலாதனுக்கு ஒன்றுமே ஆகவில்லை ஆனால் ஹோலிகா சாம்பலானாள். (* conditions apply : தனியே எரிந்தால் மட்டுமே நெருப்பு ஒன்றும் செய்யாது.) அப்புறம் நாராயணன் நரசிம்ம அவதாரம் (பாதி மனிதன் பாதி சிங்கம்) எடுத்து வந்து ஒரு மாலைப்பொழுதில் அவன் அரண்மனையின் வாசற்படியில் வைத்து வயிற்றைக் கிழித்து கொன்றதுதான் உங்களுக்குத் தெரியுமே! ஹோலிகா என்னும் அரக்கி நெருப்பில் எரிந்ததை கொண்டாடுவதே ஹோலி (நரகாசுரன் தலை வெடித்த தீபாவளி போல்).

ஹோலிக்கு முன்தினம் பழைய மரக்கட்டைகள், சருகுகளை வைத்து தீமூட்டி சுற்றி வந்து வணங்குகிறார்கள். வசந்தகாலத்தை வரவேற்கும் விதமாக மலர்களின் சாயங்களையும் செடிகொடிச்சாருகளையும் பூசி மகிழ்ந்த பழக்கமே இன்று கண்மூடித்தனமாய் கலரடிக்கும் ஹோலியானது.

என் மகள் இரண்டு வாரம் முன்னர் அப்பா பிச்காரி வேண்டுமென்றாள். அபியும் நானும் பார்த்து ஏதோ உளருகிறாள் என்று நினைத்தேன். பிறகு தங்கமணி சொல்லித்தான் தெரியும் பிச்காரி என்றால் தண்ணீர்த் துப்பாக்கி. ஒன்று வாங்கிக் கொடுத்தேன். எங்கள் வீடு இரண்டாம் தளத்தில் என்பதால் பால்கனியில் நின்று கொண்டு வருவோர் போவோர் மீதெல்லாம் தண்ணி அடிக்கிறாள் இரண்டரை வயது இளவரசி. யாராவது உன்னைத் திட்டுவாங்கடா என்றேன். யாராவது திட்டினா "புரா மத் மானோ...ஏ ஹோலி ஹை!"ன்னு சொல்லணுமாம் ( கோவிச்சுக்காதீங்க...இது ஹோலி)

அப்புறம் முக்கியமான ஒன்றைச் சொல்லாமல் இந்தப் பதிவு முடியாதுங்க. அது குஜ்ஜியா. சமோசாக்குள்ள பூர்ணம் வைத்த மாதிரியான ஒரு இனிப்பு. ரொம்ப நல்லாருக்குங்க. இது தான் ஹோலி ஸ்பெசல் ஸ்வீட்.

ஹோலி கொண்டாடும் அனைவருக்கும் நல்வாழ்த்துக்கள்.

மனதைப்பிழிந்த காதல் கதை!

2011-03-18T18:58:00.000+05:30

ஒரு அழகான கிராமம். அந்தக் கிராமத்தின் தலைவருக்கு ஒரு பெண் இருந்தாள். அவளைப்போல் ஓர் அழகியை யாரும் பார்த்ததும் இல்லை. கேட்டதும் இல்லை. அவள் பக்கத்துக் கிராமத்தைச் சேர்ந்த ஒரு ஏழை வாலிபனைக் காதலித்து வந்தாள். இது தெரிந்ததும் மொத்தக் கிராமமும் அந்தக் காதலை எதிர்த்தது. இதனால் வேறு வழி தெரியாமல் ஊரை விட்டு ஓட திட்டமிட்டனர். திட்டமிட்டபடி ஒரு நாள் ஊரை விட்டு ஓடிவிட்டனர். கிராமமே சேர்ந்து தேடியும் அவர்களைக் கண்டுபிடிக்க முடியவில்லை. அதன் பிறகு அந்தக் காதலை ஏற்றுக்கொள்வதாக செய்தித்தாளில் விளம்பரம் கொடுத்தனர். அதைப் பார்த்த காதல் ஜோடி உடனே ஊர் திரும்பியது. மகிழ்ந்த கிராம மக்கள் மிக பிரமாண்டமான முறையில் இருவருக்கும் திருமணம் செய்து வைக்கத் திட்டமிட்டனர்.

திருமண ஆடைகள் வாங்க கடைக்குச் சென்று திரும்பிவரும் வழியில் அவர்கள் பயணம் செய்த கார் விபத்துக்குள்ளானது. அந்தக் காதலன் சம்பவ இடத்திலேயே மரணமடைந்தான். (இது அந்தத் தலைவரின் வேலையான்னு நீங்க யோசிக்க வேண்டாம்). விபத்தன்று அவன் அணிந்திருந்த ரத்தக்கறை படிந்த சட்டையை அவன் நினைவாக அந்தப்பெண் வைத்திருந்தாள். ஒரு நாள் அவள் கனவில் ஒரு தேவதை வந்து அந்தச் சட்டையை துவைத்து விடவேண்டுமென்றும் இல்லை என்றால் குடும்பத்துக்கே பெரும் இழப்பு நேரிடும் என்றும் சொன்னது. அவள் அதை கண்டுகொள்ளவேயில்லை.

சில நாள் கழித்து அதே தேவதை அவள் அம்மாவின் கனவிலும் வந்து அந்தச் சட்டையை துவைத்துவிடச் சொன்னது. ஆனால் அவர்கள் அதை சட்டை செய்யவேயில்லை. பின் ஒருநாள் அதே தேவதை அவள் தந்தையின் கனவிலும் வந்து எச்சரித்ததும் அவர்களுக்கு அதன் விபரீதம் புரிந்தது. உடனே அந்தச் சட்டையை துவைத்தாள். ஆனாலும் ரத்தக் கறை போகவேயில்லை. மீண்டும் தேவதை அவள் கனவில் வந்து எச்சரித்தது. எப்படி முயன்றும் அந்தக் கறை போகவேயில்லை.

அடுத்த நாள் காலை யாரோ அவர்கள் வீட்டுக் கதவை தட்டினர். அவள் சென்று கதவைத் திறந்தாள். என்ன ஆச்சர்யம், கனவில் வரும் தேவதை நின்றிருந்தது. முகம் வெளிறிப்போய் இருந்தது. அவளைப் பார்த்து கோபமாய்ச் சொன்னது. லூசாடி நீ! எத்தனை முறை சொல்றது? சர்ப் எக்செல் போடு கறை போயிடும்!!!

உயிர் குடிக்கும் கடல்

2011-03-16T06:17:00.000+05:30

முதல் உயிர் முளைத்த

மூப்பிலா ஆழியே!

இன்னல்பல தந்து -நீ

இன்னும் நெடுநாள் வாழியே!

அலையாய் பொங்கிவந்து

கொலைசெய்து விளக்குகிறாய்

நிலையாமைத் தத்துவத்தை -நீ

உள்ளொன்று வைத்துப்

புறமொன்று காட்டும்

கள்ளத்தனம் கற்றாயோ

கபடமாடும் மனிதரிடம்....

பிள்ளைக்கறி கடித்து பெருந்தாயே

பிணந்தின்னும் பருந்தானாய்!

திட்டமிட்டு செதுக்கிய நாட்டை

எட்டடிகள் நகர்த்தி வைத்தாய்!

நீரை வெளியேற்ற

வெட்டிய குழிகளில்

ஊரை வெளியேற்றி

ஊழ்வினை ஆற்றினாய்!

வீடுடைக்கும் நிலம்

உயிர்குடிக்கும் நீர்

ஊரழிக்கும் நெருப்பு

கதிர்வீச்சு பரப்பும் காற்று

கரும்புகை படிந்த ஆகாயம்.

அட

அழைப்பது சரிதானோ

பஞ்சபூதங்களென்று....

மனதின் வார்ப்பு

2011-03-14T06:26:00.000+05:30

கல்லூரி வாழ்க்கைக்குள்
காலெடுத்து வைக்கும்வரை
நட்புக்கும் எனக்கும்
நாலாம் பொருத்தம்தான்.

வகுப்பு துவங்கியதும்
வாரம் சில சென்றபின்பு
வளாகத்தில் நிகழ்ந்ததுநம்
முதல் சந்திப்பு.

மனதில் குழப்பத்துடன்
சரிஎது தவறெதுவென
சரிவரத் தெரியாமல்
மாணவர்க் கூட்டத்தில்
தனிமையில் நான் வாட

துணைக்கரம் நீட்டிய

தோழி நீ.

காணாமல் போனஎனை
கண்டெடுத்துத் தந்தவள் நீ.
எனக்கு எதெல்லாம்
நன்றாக வருமென்று
நீ சொல்லித்தான்
எனக்கேத் தெரியவரும்.

வகுப்பறைக்குள் அமர்ந்து
வாதிட்ட நிமிடங்களும்
நடந்து பேசி சிரித்த
நல்ல நினைவுகளும்
என்னுள் நிலைத்திருக்கும்
நானுள்ள வரையில்...

வெள்ளைத் தாளாய்
இருண்ட என் மனதில்
கள்ளி நீதான்
கவிதை எழுதினாய்.

செதுக்குவதாய் நினைத்து
சிலசமயம் நீஎன்னை
சிதைத்தும் இருக்கிறாய் - நாம்
மணிக்கணக்கில் பெசியதுமுண்டு
மாதக்கணக்கில் பேசாமலிருந்ததும் உண்டு
ஆனாலும்
நட்பென்ற சொல்லை
யார் சொன்னாலும்
உன்முகம் எனது
உள்மனதிரையில்
ஒளிர்கிறதே........

மனதின் வார்ப்பாய்.

என்னுயிர்த்தோழி தேவிக்கு இனிய பிறந்தநாள் வாழ்த்துக்கள்!

முடிவு!

2011-03-12T06:51:00.001+05:30

என் கவிதைகள்

எங்கு தொடங்கி

எதில் முடியும்?

சில கவிதைகள்

என்றும் தொடரும்

உன் நினைவுகள் போல....

கேள்வியால் துவங்கி

கேள்வியால் முடியலாம்

உன் பார்வைகள் போல....

பாதியில்கூட நின்றுபோகலாம்

உன்வருகையை எதிர்பார்த்து

நான் ஏமாறுவது போல....

முற்றுப்புள்ளியால் அரிதாய்

முழுமை பெறுகிறது

உன் புன்னகை போல....

ஆச்சர்யக்குறியிலும் முடியலாம்

திடீர்முத்தமிட்டு நீயென்னை

திக்குமுக்காடச் செய்தால்....

ஆனாலும் பாரடி

அதிகக் கவிதைகள் முடிவதில்லை

உன் மௌனத்தைப் போல....

தாய்மை

2011-03-08T06:25:00.001+05:30

மண்ணில் மகளாக

மலர்ந்த போதும் - இந்த

மகிழ்வில்லை எனக்கு....

மாதாவின் மார்பில்

இதழ்வைத்த போதும் - இந்த

இதமில்லை எனக்கு....

தமையனின் தோளில்

தங்கையான போதும் - இந்த

தவிப்பில்லை எனக்கு....

இனிய தலைவனோடு

இல்லறம் புகுந்தபோதும் - இந்த

சிலிர்ப்பில்லை எனக்கு....

எந்தன் மணிவயிற்றில்

உந்தன் உயிர்ச்சத்தம்

உருவாகி விட்டதை

உணர்ந்த நொடிமுதலே - இத்தனை

உவகையும் எனக்கு....

நூறாவது மகளிர்தின நல்வாழ்த்துக்கள்!

கவிஞன்

2011-03-06T16:23:00.000+05:30

என்

தள்ளாத வயதிலும்

அந்த

தமிழ்க்கவியைக்

காணச்சென்றேன்.

என்னைக் கண்டதும்

எழுந்துவந்து

கட்டிக்கொண்டான்.

அப்புறம் அறிந்தேன்

தப்புத் தப்பாய்

தமிழ் எழுதி - நான்

தண்டித்த மாணவன்

அவனென்று...

'கவிஞனாக எப்படி?'

என்றேன்.

"காதலிக்கிறேன் ஐயா"

என்றான்.

வரி விளையாட்டு

2011-03-05T07:58:00.001+05:30

இந்தப் படத்தில் இருப்பது யார்?

மகேஷ் பூபதியும் அவரின் முதல் மனைவி ஸ்வேதா ஜெய்சங்கரும்னு சரியாச் சொன்னவங்களுக்கு வாழ்த்துக்கள்.

மகேஷ் பூபதி- பிரெஞ்சு ஓப்பன் டென்னிஸ் போட்டியின் கலப்பு இரட்டையர் பிரிவில் வென்ற முதல் இந்தியன். இன்னும் ஏராளமான டென்னிஸ் போட்டிகளில் பெரும்பாலும் இரட்டையர் பிரிவில் கலக்கியவர். 2001 ம் ஆண்டு இந்தியாவின் உயரிய விருதான பத்மஸ்ரீ வாங்கியவர். முதல் மனைவியை விவாகரத்து செய்துவிட்டு போனமாதம் (16 .02 .2011 ) லாரா தாத்தாவை மணந்தார். அப்புறம் முதல் மனைவியும் அடுத்த சில நாட்களிலேயே (20 .02 .2011 ) சென்னையைச் சேர்ந்த தொழிலதிபர் ரகு கைலாசை மணந்தார். (அட நான் சொல்ல வந்ததை விட்டு பதிவு வேறு எங்கேயோ போகுதே!)

திங்கட்கிழமை திரு பிரணாப் முகர்ஜி வாசித்த பட்ஜெட்டில் நமக்கு ஏதேனும் சலுகை இருக்கிறதா என் சல்லடை போட்டுத் தேடிக்கொண்டிருப்பவரா நீங்கள்? அப்போ உங்களுக்குத் தான் இந்தப் பதிவு.

மகன்தந்தைக்கு ஆற்றும் உதவி இவன்தந்தை

என்நோற்றான் கொல் எனும் சொல்.

இப்படி ஒரு பையன் மகனாகப் பிறப்பதற்கு அவன்தந்தை என்ன புண்ணியம் செய்தானோ என ஏங்கும் படியான ஒரு ஒப்பந்தத்தில் தந்தையும் மகனும் 10.06.1994 ல் கையெழுத்து போட்டனர். அந்த ஒப்பந்தத்தின்படி உணவு, உடை, உறைவிடம், டென்னிஸ் பயிற்சி மற்றும் டிப்ஸ் என தந்தை செலவழித்த 28.5 லட்சத்தை தான் சுயமாக சம்பாதிக்க ஆரம்பித்த நாளிலிருந்து பத்து வருடங்களுக்குள் திருப்பித் தருவதாக எழுதினர். இது தந்தைக்குத் தான் அளிக்கும் குருதட்சணை என்றும் அதற்கு வரிவிலக்கு அளிக்குமாறும் முறையிட்டார் பூபதி. வருமான வரித்துறையும், கர்னாடக உயர்நீதி மன்றமும் இதை ஏற்றுக் கொள்ளவில்லை. பின்னர் உச்ச நீதிமன்றத்தில் மேல்முறையீடு செய்தார்.

இந்த மனுவை 25.10.2010 அன்று விசாரித்த தலைமை நீதிபதி SH கபாடியா, நீதிபதிகள் KS ராதாக்ருஷ்ணன் மற்றும் ச்வத்தந்த குமார் அடங்கிய பென்ச் ஐந்தே நிமிடங்களில் தள்ளுபடி செய்தது. அதை தள்ளுபடி செய்ததற்கான காரணங்கள்....

மகனுக்கு நல்ல புத்தி சொல்லி அவன் சுயமாய் சம்பாதிக்கும் வரை அவனைக் காப்பது தந்தையின் கடமை. இந்த நீதிமன்றம் இதுபோல் ஒரு வழக்கை இதற்குமுன் பார்த்ததில்லை.

1989 ல் இருந்து 1994 வரையான காலத்தில் டென்னிஸ் விளையாட்டில் சிறந்து விளங்கிய போதும், இந்த ஒப்பந்தம் 1994 ல் செய்தது வரி விலக்கை மட்டுமே நோக்கமாகக் கொண்டது என்பதை தெளிவாக்குகிறது.

(பய புள்ள டென்னிஸ் கோர்ட்ல மட்டுமல்ல சுப்ரீம் கோர்ட்லயும் நல்லாத்தான் விளையாண்டிருக்கு)

மறுபடியும் மகளானேன்!

2011-03-01T06:44:00.001+05:30

வட்டநிலா வானில்

வந்தவுடன் போனதுபோல்

மொட்டு மலரொன்று

முகம்காட்டி மறைந்ததுபோல்

கட்டுக்கரும்பது கைக்

கிட்டியதும் கசந்ததுபோல்

தொட்டில் நெடுங்கனவே

தொலைதூரம் ஏன்போனாய்?

கட்டிய கயவனவன்

கைவிட்டுப் போனபின்

ஒட்டி உறவாட

ஒற்றையுயிர் நீயிருப்பாய்

கெட்டுப் போகவில்லை

வாழ்வென்றே நினைத்திருந்தேன்

பட்டுமலர் உனையிறைவன்
படைத்ததுமேன் பறித்துக்கொண்டான்?

விழியாரப் பார்க்கவில்லை

விரல்பிடித்து நடக்கவில்லை

விளையாடிச் சிரிக்கவில்லை

விடியலென வந்தவனே

விட்டிலாகி ஏன் மறைந்தாய்?

பிறந்தவுடன் இறந்துவிட்டப்

பிள்ளைக்குநான் தாயுமில்லை

ஏமாற்றிய கணவனுக்கு

இன்றுநான் மனைவியில்லை

வாடுமென் அம்மாவுக்கு

வருத்தந்தரும் மகளானேன்.....

மத்திய அரசு தடை செய்துள்ள மருந்துகள்

2011-02-26T06:36:00.002+05:30

10.02.2011 அன்று மத்திய சுகாதாரம் மற்றும் குடும்பநலத்துறை அமைச்சகம் வெளியிட்டுள்ள அறிவிப்பின்படி கீழ்காணும் மருந்துகள் இந்தியாவில் உற்பத்தி செய்வதற்கும் விற்பனை செய்வதற்கும் உடனடியாகத் தடை செய்யப்பட்டுள்ளது.

Nimesulide formulations for human use in children below 12 years.
Cisapride and its formulations for human use.
Phenylpropanolamine and its formulations for human use.
Human Placental Extracts and its formulations for human use.
Sibutramine and its formulations for human use.
R-Sibutramine and its formulations for human use.

இவற்றில் பெரும்பாலான மருந்துகள் மற்ற நாடுகளில் பல வருடங்களுக்கு முன்னரே தடை செய்யப்பட்டுள்ளன. உதாரணத்திற்கு நிமுசுலைட். இது வலி நிவாரணியாகவும் சில சமயங்களில் காய்ச்சலுக்கும் பயன்படுத்தப்படுகிறது. அமெரிக்கா (USFDA ), கனடா, பிரிட்டன், ஆஸ்திரேலிய நாடுகள் இதை விற்க அனுமதியே அளிக்கவில்லை. ஈரல் குறைபாடு ஏற்படுவது உறுதியானதும் இந்த மருந்தைக் கண்டுபிடித்த ச்விசர்லாந்திலேயே குழந்தைகளுக்கு இம்மருந்து தடை செய்யப்பட்டது. பங்களாதேசில் கூட 2005 லேயே இம்மருந்து தடைசெய்யப்பட்டது.

மத்திய அரசின் அறிவிப்பு இங்கே

மனப்பெண்

2011-02-23T06:50:00.000+05:30

கனவு

2011-02-20T04:55:00.002+05:30

வானவில் தானெடுத்து

வளையல்கள் செய்தலின்று

வழக்கமாகியது எனக்கு!

மனதே உன்னுடன் நான்

மகிழ்ச்சியாய் குடித்தனம்

மணல்வீட்டில் நடத்துகிறேன்!

காண்கின்ற காட்சியெல்லாம்

கண்ணே உன் முகம்காட்டி

களிப்புறச் செய்யுதடி!

எழுதலாம் என்று

எடுக்கின்ற தாளிலெல்லாம்

உன்பெயர் மட்டுமெழுதி

உலகையே மறக்கின்றேன்!

இவையெல்லாம் இங்கு

இனிதே நடக்கிறது

எவரும் வந்து

என்னை எழுப்பாதவரை.....

(1999)

ஐவகை நிலமும் அவளே!

2011-02-14T06:31:00.004+05:30

குறிஞ்சி மலர் பூத்து
குலுங்கிச் சிரித்தாலும் - உன்
முல்லை மலர்ப் பாதத்தின்
எல்லையைச் சேர்ந்தாலே பெருமை.
மருத வயல் நெல்சமைத்து
நெய்விட்டு நீ வறுத்த
நெய்தல் நிலமீன் தந்தால்
பொய்யில்லை அது அமிர்தம்.
உன்காலடி படுமிடம் சோலை
படாத இடமோ பாவமது பாலை.

(1999)

அனைவருக்கும் காதலர்தின நல்வாழ்த்துக்கள்

பாரதியை பார்க்கப் போயிருந்தேன்-3

2011-02-11T06:44:00.003+05:30

பாரதியை பார்க்கப் போயிருந்தேன்-1

பாரதியை பார்க்கப் போயிருந்தேன்-2

பாரதி பிறந்த எட்டயபுர வீட்டில் சுமார் இரண்டரை மணி நேரம் இருந்தேன். அங்கு என்னையும் சில கொசுக்களையும் தவிர வேறு உயிர்களே இல்லை. ஒரு மாபெரும் கவிஞனின் வீட்டை அரசுடமையாக்கினால் மட்டும் போதுமா? அதைப் பராமரிக்க வேண்டாமா? என்ற கேள்வி என்னுள் எழுந்தது. பாரதியின் கையெழுத்துப் பிரதிகள் வெகுசிலவே இருந்தன. ஒரு சமீபக் காலக் கவிஞனிடம் இருந்து நாம் பாதுகாத்து வைத்திருப்பது இவ்வளவுதானா என்றே தோன்றியது. பாரதியின் கையெழுத்துக்களையே நீண்ட நேரம் பார்த்துக் கொண்டிருந்தேன்.

சுவற்றில் பாரதியின் குடும்ப வரைபடம் வைத்திருந்தார்கள். அதைப் பார்க்கையில் மங்காத்தா படத்திற்கு பாட்டெழுதும் பாரதியின் எள்ளுப்பேரன் நிரஞ்சன் வரை இதில் சேர்க்கலாமே என்று தோன்றியது. பாரதி காணி நிலம் கேட்டது உங்கள் எல்லோருக்கும் தெரியும். அவரின் வேண்டுதலைப் பாருங்கள்.

சுதந்திரத் தீ சுடர்விட்டு எறிந்த காலத்திலும் தாய்நாட்டுப் பற்றோடு தமிழ்ப் பாசத்தையும் வளர்க்கச் சொன்னவன் பாரதி. இதோ ஒரு சங்கற்பங்கள் அவரின் கையெழுத்தில்...

இயன்ற வரை தமிழே பேசுவேன், தமிழே எழுதுவேன்.
சிந்தனை செய்வது தமிழிலே செய்வேன்.
எப்பொழுதும் பராசக்தி - முழு உலகின் முதற்பொருள் -அதனையே
தியானம் செய்துகொண்டிருக்க முயல்வேன்.
அதனைக் குறித்தே ஓயாமல் எழுதிக் கொண்டிருக்க விரும்புவேன்.

இப்படிச் சாகும் வரை தமிழைத் தன் சுவாசமாய்க் கொண்டவன் பாரதி. பாரதி போன்ற நன்னிலத்தில் தானே வளரும் தவவலிமை கொண்டது தமிழ். யாரும் தங்கள் தோட்டத்தில் நட்டு வளர்க்கத் தேவையில்லை. நாங்கள் தான் இலக்கியம் படைத்து தமிழை வளர்க்கிறோம் என்று யாரேனும் சொன்னாலோ, இவர்தான் முத்தமிழை மொத்தமாய் குத்தகைக்கு எடுத்து பாதுகாக்கிறார் என்று எச்சில் ஒழுக யாரையேனும் புகழ்ந்தாலோ நீங்கள் நிச்சயம் சிரிப்பீர்கள் தானே!

வழிப்போக்கர் ஒருவரின் துணையோடு நான் எடுத்துக்கொண்ட புகைப்படம்.

சீரிய கவியே
புயலாய்ச்
சீறிய கவியே!
உன் சிலைக்கு முன்னால்
சில சின்னக் கேள்விகள்.

உன்
ஆணைகளில் எது இங்கே
அமலுக்கு வந்தது?

பிறநாட்டுச் சாத்திரங்கள்
பெயர்த்தோமா?
இறவாத தமிழ்நூல்கள்
இயற்றினோமா?

படைப்பிலக்கியம் தானே
ஒரு
சுத்தமான மொழியின்
சுவாசம்.

இங்கே
கிலோ கணக்கில்
தமிழ் வளர்க்கும்
எழுத்தாளர்களை
என்ன சொல்ல?

விற்பனைச் சந்தையின்
வியாபார அவசரத்தில்
எழுத்துக்களுக்கு இங்கே
ஆடை அணிவிக்கவும்
அவகாசமில்லை.

அச்சு எந்திரம்
இங்கே
வாசகனை உருவாக்கியது
குடிமகனை....?
(வைரமுத்துவின் கவிராஜன் கதையிலிருந்து)

பாரதியை பார்க்கப் போயிருந்தேன்-2

2011-02-05T06:18:00.001+05:30

பாரதியார் பரலி சு நெல்லையப்பருக்கு எழுதிய கடிதம்.

புதுச்சேரி

19 -12 -1915

எனதருமைத் தம்பியாகிய ஸ்ரீ நெல்லையப்ப பிள்ளையை பராசக்தி நன்கு காத்திடுக.

தம்பி - மாதத்துக்கு மாதம், நாளுக்கு நாள் நினதறிவு மலர்ச்சி பெற்று வருவதைக் காண்கிறேன். நினது உள்ளக் கமலத்திலே பேரறிவாகிய உள்ஞாயிற்றின் கதிர்கள் விரைவிலே பல்கி நினக்கு நல்லின்பம் உண்டாகுமேன்றே கருதுகிறேன்.

நெஞ்சம் இளகி விரிவெய்த விரிவெய்த அறிவிலே சுடர் ஏறுகிறது. நம்மிலும் மெலியோருக்கு நாம் இரங்கி அவர்களை நமக்கு நிகராகச் செய்துவிட வேண்டுமென்று பாடுபடுதலே நாம் வலிமை பெறுவதற்கு வழியாகும். வேறு வழியில்லை.

ஹா! உனக்கு ஹிந்தி, மராட்டி முதலிய வடநாட்டு பாஷைகள் தெரிந்திருந்து, அந்த பாஷையின் பத்திரிக்கைகள் என்ன அற்புதமான புதுமை பெற்றுள்ளன என்பதை நேரிடத் தெரிந்துகொள்ள முடியுமானால் - தமிழ்நாட்டிற்கு எத்தனை நன்மை உண்டாகும்! தமிழ், தமிழ், தமிழ் - என்று எப்போதும் தமிழை வளர்ப்பதே கடமையாகக் கொள்க. ஆனால் புதிய புதிய செய்தி, புதிய புதிய யோசனை, புதிய புதிய உண்மை, புதிய புதிய இன்பம் தமிழில் கூடிக்கொண்டே இருக்கவேண்டும்.

தம்பி, நான் ஏது செய்வேனடா! தமிழைவிட மற்றொரு பாஷை சுகமாக இருப்பதைப் பார்க்கும் போது எனக்கு வருத்தமுண்டாகிறது. தமிழனைவிட மற்றொரு ஜாதியார் அறிவிலும் வலிமையிலும் உயர்ந்திருப்பதில் எனக்கு ஸம்மதமில்லை. தமிழச்சியைக் காட்டிலும் மற்றொரு ஜாதிக்காரி அழகாயிருப்பதைக் கண்டால் என் மணம் புண்படுகிறது.

தம்பி, உள்ளமே உலகம். ஏறு! ஏறு! ஏறு! மேலே! மேலே! மேலே!நிற்கும் நிலையிலிருந்து கீழே விழாதபடி கயிறுகள் கட்டிவைத்துக் கொண்டு பிழைக்க முயற்சிபண்ணும் பழங்காலத்து மூடர்களைக் கண்டு குடல் குலுங்கச் சிறி. உனக்குச் சிறகுகள் தோன்றுக. பறந்து போ,மேலே, மேலே, மேலே!

தம்பி, தமிழ்நாடு வாழ்க என்றெழுது. தமிழ் நாட்டில் நோய்கள் தீர்க என்றெழுது. தமிழ்நாட்டில் வீதி தோறும் தமிழ் பள்ளிக்கூடங்கள் மலிக என்றெழுது. அந்தத் தமிழ் பள்ளிக்கூடங்களில் நவீன கலைகளெல்லாம் பயிற்சி பெற்று வளர்க என்றெழுது. தமிழ்நாட்டில் ஒரே ஜாதிதான் உண்டு. அதன் பெயர் தமிழ்ஜாதி. அது ஆர்ய ஜாதி என்ற குடும்பத்திலே தலைக்குழந்தை என்றெழுது. ஆணும் பெண்ணும் ஒருவரின் இரண்டு நிலைகள் என்றெழுது! அவை ஒன்றிலொன்று தாழ்வில்லை என்றெழுது. பெண்ணைத் தாழ்மை செய்தோன் கண்ணைக் குத்திக் கொண்டான் என்றெழுது. பெண்ணை அடைத்தவன் கண்ணை அடைத்தான் என்றெழுது.

தொழில்கள், தொழில்கள், தொழில்கள் என்று கூவு. தப்பாக வேதம் சொல்பவனைக் காட்டிலும் நன்றாகச் சிதைப்பவன் மேற்குலத்தானென்று கூவு. வியாபாரம் வளர்க, யந்திரங்கள் பெருகுக. முயற்சிகள் ஓங்குக. ஸங்கீதம், சிற்பம், யந்திர நூல், பூமிநூல், வான நூல், இயற்கை நூலின் ஆயிரம் கிளைகள் இவை தமிழ்நாட்டிலே மலிந்திடுக எண்டு முழங்கிடு. சக்தி, சக்தி, சக்தி என்று பாடு. தம்பி- நீ வாழ்க.

உனது கடிதம் கிடைத்தது. குழந்தைக்கு உடம்பு செம்மையில்லாமல் இருந்தபடியால் உடனே "ஜவாப்" எழுத முடியவில்லை. குழந்தை புதிய உயிர் கொண்டது. இன்று உன் விலாஸத்துக்கு "நாட்டுப் பாடல்கள்" அனுப்புகிறேன். அவற்றைப் பகுதி பகுதியாக உனது பத்திரிக்கையிலும் ஞான பானுவிலும் ப்ரசுரம் செய்திடுக. "புதுமைப்பெண்" என்றொரு பாட்டு அனுப்புகிறேன். அதைத் தவறாமல் உடனே அச்சிட்டு அதன் கருத்தை விளக்கி எழுதுக. எங்கேனும் எப்படியேனும் பணாம் கண்டுபிடித்து ஒரு நண்பன் பெயரால் எமக்கு அனுப்புக. தம்பி - உனக்கேனடா இது கடமையென்று தோன்றவில்லை? நீ வாழ்க.

உனதண்ணன்

பாரதி.

முந்தைய பதிவும் புகைப்படங்களும்.

நீந்துதல் மீன்களின் குற்றமா? #tnfisherman

2011-01-30T09:52:00.006+05:30

உடன்பிறந் தவர்களைப் போலே- இவ்

வுலகினில் மனிதரெல் லாரும்;

திடங்கொண் டவர்மெலிந் தோரை - இங்குத்
தின்று பிழைத்திட லாமோ?

என்ற பாரதியின் வரிகள்தான் நினைவுக்கு வருகிறது. வெறும் வலையோடு வயிற்றுப் பிழைப்புக்காய் கடலுக்குள் சென்றவனை ஆயுதம் எய்துக் கொல்வது நியாயமா? நீந்துதல் என்பது மீன் செய்யும் குற்றமா? மீன்பிடிக்கச் செல்வது மீனவன் செய்யும் குற்றமா?

"இந்திய மீனவர்களை மனிதர்களாக நடத்த ஆவன செய்வோம். தேவையான பாதுகாப்பு ஏற்பாடுகள் செய்யப்பட்டுள்ளன. கடலோர ரோந்து, பன்னாட்டுக் கடல் எல்லைகளில் ரோந்து, வான் வழி மற்றும் ரேடார் கண்காணிப்புகள் துரிதப்படுத்தப்பட்டுள்ளன" - இது நாமெல்லாம் குரல் கொடுத்ததால் எடுக்கப்பட்ட நடவடிக்கை இல்லைங்க. 2007 ஆம் வருஷம் மே மாதம் ஒன்பதாம் தேதி அந்நாள் பாதுகாப்புத்துறை அமைச்சர் பாராளுமன்றத்தில், 1991 முதல் 2007 ஏப்ரல் வரை 77 இந்திய மீனவர்களை இலங்கை ராணுவன் சுட்டுக் கொன்றுள்ளதேன்னு கேட்டதற்குப் பதிலாய்ச் சொன்னது.

இன்றைய நிலவரப்படி 500 க்கும் மேற்பட்ட மீனவர்கள் இலங்கை ராணுவத்தால் கொலை செய்யப்பட்டபின்னும் ராஜபக்சே சொல்கிறார், "இலங்கை ராணுவத்தினர் ஒன்றுமரியாதவர்கள் என்று!". கடந்த இரு தினங்களாக இணையத்தில் எழுப்பப்படும் குரல்கள் நிச்சயம் பயனளிக்கும். ஒன்றுகூடிக் குரல் கொடுப்போம்.

இணைய தள முகவரி- savetnfisherman.org
ட்விட்டர் முகவரி- twitter.com/savetnfisherman
பேஸ்புக் முகவரி - http://www.facebook.com/savetnfisherman
உங்களுடைய ஆதரவரை இந்திய அரசுக்கு அனுப்ப -Fill This Form

என்னுடைய (@kalanesan) ட்விட்டர் தளத்தில் பதிந்ததில் சில...

1
தந்தி மட்டும் அனுப்பினால் போதுமா?
தந்திடுவானா எமன், தான் எடுத்த உயிர்களை...
2
தமிழன் வயிற்றுப் பிழைப்புக்காய் வீசினான் வலை -அதுவே
சிங்கள நரிகள் அவனுக்கு விரிக்கும் சிலந்தியின் வலை.
3
சிங்கள கடற்படையின் துப்பாக்கிப் பயிற்சிக்கு
தமிழக மீனவன் உயிருள்ள பொம்மையா?
4
கடலில் சிந்திய ரத்தமெல்லாம் -மீனவர்
உடலின் இந்திய ரத்தம்.
5
படகும் கப்பலும் மிதந்த கடல்
இன்று மிதப்பதோ மீனவர் உடல்.
6
ஒன்றுபட்டால் உண்டு வாழ்வே நம்மில்
ஒற்றுமை நீங்கினால் அனைவர்க்கும் தாழ்வே!
7
"பொறுத்தது போதும்! பொங்கி எழு!" இது யார் எழுதிய வசனம் கண்டுபிடியுங்கள் பார்க்கலாம்?
8
இலங்கைத் தமிழனை இன்னலில் தவிக்கவிட்டோம் காரணம் இறையாண்மை. இந்தியத் தமிழனை காக்க மறந்தால் அது நம் இயலாமை.

சுமார் இரண்டு மணி நேரத்தில் 600 க்கும் அதிகமான ட்விட்டுகள் பதிவாகியுள்ளன. உங்கள் எல்லாக் கருத்துக்கள் கண்டனங்களோடும் #tnfisherman என்று இணைக்கவும். ஒன்றுபட்டுக் குரல் கொடுப்போம். நிச்சயம் நல்லது நடக்குமென நம்புவோம்.

உடன்பிறந் தார்களைப் போலே- இவ்

வுலகில் மனிதரெல் லாரும்;

இடம்பெரி துண்டுவை யத்தில் -இதில்

ஏதுக்குச் சண்டைகள் செய்வீர்.

பாரதி.

பாரதியை பார்க்கப் போயிருந்தேன்-1

2011-01-27T06:28:00.002+05:30

பாரதி!

தமிழ் இலக்கியத்தின் உயிர் எழுத்துக்களில் ஒருவன். தாளக்கட்டுகளுக்கு மட்டும் தலையாட்டிக் கொண்டிருதவர்களின் காதைத்திருகி புதுக் கவிதை காட்டியவன். அவன் இறந்து 50 வருடங்கள் ஆனபின்னும், ஏன் இன்றும் கூட "ஏன் மரபை மீறுகிறீர்கள்?" என்ற கேள்விக்கு பாரதி மீறினான் என்பதே பதிலாய் இருக்கிறது. அவன் பெண்ணியப் பெருங்கவி, விடுதலை வீரன், புதுமைக்காதலன், புரட்சியாளன், எட்டயபுரத்தில் கொட்டிய முரசு.

"நீடுதுயில் நீக்கப் பாடிவந்த நிலா
காடு கமழும் கற்பூரச் சொற்கோ
அறம் பாடவந்த அறிஞன் - புதிய
மறம் பாட வந்த மறவன் " என்ற பாரதிதாசனின் வரிகளைச் சொல்லி என் பள்ளி நாளொன்றில் சேலம் தமிழ்ச்சங்கத்தில் பேசிய நாளிலிருந்தே பாரதி பிறந்த வீட்டைப் பார்க்க வேண்டுமென்பதென் ஆசை. அது அண்மையில் நிறைவேறியது. 11 .01 .11 அன்று இரவு சேலத்தில் இருந்து திருநெல்வேலி கிளம்பினேன்.

திருநெல்வேலியில் இருந்து கோவில்பட்டி போனேன். கோவில்பட்டியில் இறங்கிய பின்தான் நினைவுக்கு வந்தது என் கேமராவின் பேட்டரி வீட்டிலேயே (சேலத்தில்) விட்டு வந்தது. ஒருமணி நேரம் கோவில்பட்டியின் கடைவீதிகளில் அந்த எட்டாத கனிக்காய் கொட்டாவி விட்டுக் கொண்டிருந்தேன். பின் என் கைப்பேசிக் கேமராவே நல்ல படமெடுக்கும் என்ற ஞானம் வந்தவனாய் தூத்துக்குடி பேருந்தில் ஏறினேன்.

கோவில்பட்டியில் இருந்து தூத்துக்குடி செல்லும் வழியில் சுமார் 15 கிலோமீட்டர் தூரத்தில் உள்ளது எட்டயபுரமென்னும் கிராமம். முத்து சோளப்பயிர்களையும் முட்புதர்களையுமே வழியெங்கும் காண முடிந்தது. எட்டயபுரத்தில் இறங்கியதும் பாரதி வீட்டை ஓர் ஆட்டோ ஓட்டுனரிடம் விசாரித்தேன். அவர் நடந்து போகும் தொலைவிலுள்ள வீட்டில் இருபது ரூபாய் வாங்கிக்கொண்டு இறக்கிவிட்டார்.வழியில் உள்ள பெயர்ப் பலகைகளில் எட்டயபுரம், எட்டயாபுரம், எட்டய்யபுரம் என்று வித விதமாய் எழுதி என்னை யோசிக்க வைத்தார்கள். கோவிலுக்கு அருகில் எட்டு அய்யர்களின் குடும்பங்கள் வாழ்ந்த கிராமம் தான் எட்டயபுரமோ (எட்டு + அய்யர் + புரம்) என்ற எண்ணம் எழுந்தது. வரலாறு படித்த வல்லுனர்களும் நன்னூல் படித்த நல்லவர்களும் இதை சரி பார்க்கலாம்.

அந்தப் பெருங்கவி பிறந்த வீடு ஒரு அருங்காட்சியகமாய் இருக்கும் என்று போன எனக்கு ஆச்சர்யமே கிடைத்தது. அந்தக் கவிராஜனை காணப் போன என்னை வெறும் மேசை, நாற்காலியே வரவேற்றது. அதன் மீது ஒரு வருகைப்பதிவேடு. அதில் நாளொன்றுக்கு சுமார் 20 - 25 கையெழுத்துகள் பதிவாகியிருந்தன. வெளிச்சுவற்றில் பாரதியின் படம் அதனருகில் "திராவிடர் இயக்கம் ஒருகாலத்தில் பாரதியை ஏற்றுக்கொள்ளவில்லை ஆனால் திராவிடர் இயக்கம் இன்று பாரதியை ஏற்றுக்கொள்வது பாரதி பெற்ற பெருமை" என்ற கலைஞரின் வசனம். கீழே பாரதி பிறந்த வீட்டை அரசுடைமையாக்கியதற்கான கல்வெட்டு.

இன்னொரு புறம் இன்னுமோர் கல்வெட்டு அதில் பாரதியின் சிறப்பாய் பதிந்திருக்கிறார்கள் பாருங்கள்...

முதல் உள்ளறையில் பாரதி பிறந்த இடத்தில் ஒரு சிலை வைத்திருக்கிறார்கள்.

இரண்டாம் உள்ளறையில் சுவரெங்கும் புகைப்படங்கள். அதில் பாரதியின் குடும்ப வரைபடம், துணைவியார் செல்லம்மாவுடன் பாரதி, மூத்த மகள் தங்கம்மாள், இளைய மகள் சகுந்தலா, இந்தியா இதழின் முகப்பு அட்டை, தமிழ்த்தாத்தா உ.வே.சாமிநாத அய்யர், பாரதியால் பூணூல் அணிவிக்கப்பட்ட கனகலிங்கம், அரசியல் குரு திலகர், ஆன்மீக குரு நிவேதிதா, குவளைக்கண்ணன், சோமசுந்தர பாரதியார், பாரதிதாசன், நெல்லையப்பர், நெல்லையில் கல்வி பயன்ற இந்துக்கல்லூரி பள்ளி இன்னும் சில புகைப்படங்கள் மாட்டப்பட்டுள்ளன. அவற்றுள் சில உங்களுக்காக...

இந்தியா இதழின் அட்டைப்படம்

பாரதியால் பூணூல் அணிவிக்கப்பட்ட கனகலிங்கம்

புதுச்சேரி நாட்களில் இருந்து கடைசிவரை கூடவே இருந்த குவளைக்கண்ணன்

பாடல்களை பதிப்பித்த நெல்லையப்பர்

காலக்கடிகாரமும் பாரதியின் காதல் கடிகாரமும்

காரைக்குடியில் பாரதியார்

நெல்லையப்பருக்கு பாரதியின் கடிதம்

இந்த வண்ணம் உதிர்ந்த சுவற்றில் மாட்டப்பட்டுள்ள உள்ளம் உருக்கும் பாரதியின் கடிதம் அடுத்த பதிவில்...

சாளர இருக்கை

2011-01-21T05:56:00.000+05:30

சாளர இருக்கை கிட்டின்

சாதித்த உணர்வு தோன்றும்

துண்டு மேகம் பார்க்க

துடைத்துவைத்த வானம் பார்க்க

வண்டுகள் பறக்கப் பார்க்க

வட்ட நிலவு பார்க்க

நகர்கின்ற மரங்கள் பார்க்க

நட்சத்திரக் கூட்டம் பார்க்க

தகதகவென மாலையில் மின்னும்

தங்கச் சூரியன் பார்க்க

நடைமேடைக் கடைகள் பார்க்க

நகைத்திடும் குழந்தைகள் பார்க்க

தடையில்லாப் பறவைகள் பார்க்க

தலைகோதும் தென்றல் பார்க்க

சாளர இருக்கை கிட்டின்

சாதித்த கர்வம் தோன்றும்.

லோஹ்ரி திருவிழா

2011-01-12T18:02:00.001+05:30

நம்ம ஊர் பொங்கல் போல பஞ்சாப் இன்னும் சில வட மாநிலங்களில் அறுவடைத் திருநாள் லோஹ்ரி (Lohri) பண்டிகையாகக் கொண்டாடப்படுகிறது. பொங்கலும் லோஹ்ரியும் மிக நெருங்கிய தொடர்புடையன. இங்கு கோதுமை விளைச்சலைக் கொண்டாடவும் விவசாயிகளுக்கு நன்றி சொல்லும் விதமாகவும் இப்பண்டிகை கொண்டாடப்படுகிறது. இந்நாளில் விளைச்சலுக்கு நன்றி தெரிவிப்பதோடு மக்கள் பாங்க்ரா நடனமாடுவார்கள். குழந்தைகள் ஆடிப் பாடியபடி அருகில் உள்ள வீடுகளில் இனிப்பைப் பகிர்வார்கள்.

பின்பு பாரம்பரிய வாத்தியமான டோல் வாசித்தபடி நெருப்பைச் சுற்றி நடனமாடுவார்கள். ஆடலும் பாடலும் முடிந்ததும் மக்காச்சோள ரொட்டியும் கரும்புச் சாரும் விருந்து படைப்பார்கள். நம்ம ஊரில் புதிதாய் திருமணமானவர்களுக்கு எப்படி தலைப் பொங்கல் விசேஷமோ அப்படியே பஞ்சாபிலும் மணமான பின் முதல் லோஹ்ரி மிக விசேஷம்.
இதே பண்டிகை பிகு(Pihu) என்று அசாமிலும் மகா சங்கராந்தி என்று இன்னும் பல மாநிலங்களிலும் கொண்டாடப்படுகிறது.

பதிவுல நட்புகளுக்கு என் இனிய பொங்கல் வாழ்த்துக்கள்.

தற்கொலைகளின் தலைநகரம்

2011-01-07T06:20:00.000+05:30

கொசுவர்த்திச் சுருளை
பொடியாக்கிக் குடித்து
உயிர்விட்டாள் ஒருத்தி.

கணவன் திட்டியதால்
கயிற்றில் தொங்கினாள்
ஒருத்தி.

மனைவியுடன் ஏற்பட்ட
மனக்கசப்பில் தன்னுயிரை
மாய்த்துக்கொண்டான் ஒருவன்.

பதினெட்டு மாதக்குழந்தையை
பரிதவிக்க விட்டுவிட்டு
உள்ளத் தகராறில்
உயிர்விட்டனர் இருவர்.

இப்படி
நாலிரண்டு மாதத்தில்
நானூற்று ஐந்துபேர்
உள்ளத் துணிவின்றி
உயிர்மாய்த்துக் கொண்டனரே...
திருப்பூர் என்ன
ஆடை தொழில்நுட்பத்தின்
அழகு நகரா - இல்லை
தற்கொலைகளின் தலைநகரா?

உங்கள் தாய்
ரத்தத்தை பாலாக்கி
ஊட்டி வளர்ப்பதுவும்
உங்கள் தந்தை
சொத்தைவிற்று கடன்வாங்கி
சுபமுகூர்த்தம் குறிப்பதுவும்
பாதிவழியில் நீங்கள்
பயணத்தை முடிப்பதற்கா?

"பாசக்கயிர்" பிடிக்கும்
பாசப் பறவைகளே..
துயரத் தனிமையை
துடைத்தெரியுங்கள்.
உயரப் பறப்பதற்கு
உறுதி கொள்ளுங்கள்.

குறிப்பு: இரண்டாயிரத்துப்பத்தின் முதலெட்டு மாதங்களில் மட்டும் திருப்பூரில் 405 பேர் தற்கொலை செய்துகொண்டனர். பெரும்பாலான தற்கொலைகள் மூடத்துணிச்சலில் எடுக்கும் அவசர முடிவுகளே. உங்களுக்குத் தெரிந்தவர் யாரேனும் திடீர்த்தனிமையை விரும்பினால், அவர்களுடன் மனம் விட்டுப் பேசுங்கள். உங்களின் ஒரு நிமிடப் பேச்சு ஒரு உயிரைக் காக்கலாம். வாழ்க்கை வாழ்வதற்கே...

100

2011-01-04T06:22:00.000+05:30

நான் மாதக்கணக்கில் ஏன் சில வருடங்களாய் கூட ஒரு விஷயத்தை யோசிக்கிறேன். 99 முறை என் முடிவுகள் தவறானவை. ஆனால் 100 வது முறை நான் எடுக்கும் முடிவு சரியானது - ஐன்ஸ்டீன்.
மிக அரிதாய் பூமியில் கிடைக்கும் கதிரியக்கக் கனிமம் பெர்ரியத்தின் அணு எண் 100
நீரின் கொதிநிலை 100°C
அமெரிக்க மக்களவை (ஒவ்வொரு ஸ்டேட்டுக்கும் தலா இரண்டு என)100 செனேட்டர்கள் கொண்டது.
கிரீஸ், இஸ்ரேல் மற்றும் இந்தியாவில் அவசர போலிஸ் எண் 100
அமெரிக்க கால்பந்தாட்ட மைதானத்தின் நீளம் 100 யார்ட்.
100 மீட்டர் உயரத்திலிருந்து விழுந்தாலும் அணிலுக்கு அடி படாது.
பூனைகள் 100 விதமாய் ஒலியெழுப்பும்.
மின்னல் சுமார் 100 கிலோமீட்டர் தூரத்துக்குத் தெரியும்.
உலகிலேயே நீளமான மகிழுந்து 100 அடி நீளமுள்ளது. இதில் நீச்சல் குளமும் நீர்ப்படுக்கையும் உண்டு.
இந்தியாவில் நில மதிப்பீட்டுமுறை கி.மு.100 ல் இருந்தே உள்ளதாம்.
எஸ்கிமோக்கள் மொழியில் பனிக்கட்டிக்கு 100 க்கும் அதிகமான வார்த்தைகள் உள்ளதாம்.
வரலாற்றில் 100 வருடப்போர் என குறிப்பிடப்படும் இங்கிலாந்துக்கும் பிரான்சுக்கும் இடையேயான போர் துவங்கிய வருடம் 1336
100 குவாட்டர் = 25 Full
1³+2³+3³+4³=100

நான் என்ன சொல்ல வரேன்னு உங்க எல்லோருக்கும் தெரிந்திருக்கும். ஆமாங்க எனக்குக்கூட 100 பின்தொடரும் நண்பர்கள் கிடைச்சிருக்காங்க. தொடர்ந்து எழுதாமல் சராசரியாக வாரம் ஒரு பதிவென சுமார் 50 பதிவுகளே எழுதியுள்ள எனக்கு இது கூடுதல் மகிழ்வைத் தருகிறது. உங்கள் ஒவ்வொருவரின் ஆதரவிற்கும் மிக்க நன்றி.

பு(ன்ன)கைப்படம்

2011-01-01T17:06:00.000+05:30

கொஞ்சமாய்த் தெரியும்
மஞ்சள் சூரியன்
பிஞ்சுக் குழந்தையின்
பஞ்சுநிகர்ப் பாதங்கள்.

நினைத்ததைக் காட்டும்
நீலவானக் கண்ணாடி.
விமானப் பயணத்தில்
வெளியேத் தெரியும் வெளி.

திரையிட்டு மறைத்தாலும்
தெரிகின்ற கண்கள்.
நுரையிட்டு நம்காலை
நுகர்கின்ற அலை.
கால்தடப் பொட்டுவைத்து
கரையிடும் கோலம்.

திருமண தினத்தின்
தித்திக்கும் நிமிடங்கள்.
இருவயது மகளின்
அறுசுவைக் குறும்புகள்.

உள்ளங்கையில் தாஜ்மகால்
உச்சந்தலையில் குதுப்மினார்
பச்சைவயற் பயிர்கள்
பறக்கின்ற உயிர்கள்
மொட்டை மாடியில்
முளைத்த மரம்.

இப்படி எனக்குப்
பிடித்த படங்களும்- நான்
பிடித்த படங்களும்
ஏராளம் இருந்தாலும்...

கரும்பு தினமொன்றில்
விரும்புவதைச்சொல்லிவிட்டு - நீ
புன்னகையில் வெட்கம்கலந்தோர்
புதுப்பார்வை பார்த்தாயே
அந்நொடியை படம்பிடித்து
உள்ளத்தில் மாட்டியுள்ளேன்
உயிராணி துணைகொண்டு...

இன்னல் வரும்போது
இருவிழி மூடியுன்
புன்னகையைப் பார்த்தாலே
புதுத்தெம்பு கிடைக்குதடி.
போகுதடித் துன்பமெல்லாம்
போனதிசை தெரியாமல்...

புத்தாண்டு வாழ்த்துக்கள்

2010-12-31T05:56:00.000+05:30

1-1-11 எனத்துவங்கும் இவ்வருடம் அனைவருக்கும் முதல் தரமாய் அமைய வாழ்த்துக்கள். வெறுங்கையில் வாழ்த்து சொன்னா எப்படி? இந்தாங்க... பிடிங்க பூங்கொத்து.

ஒரு சாமியார் செத்து சொர்கத்துக்குப் போனாராம். சொர்க்க வாசல் வரிசையில் (அங்கயுமா?) அவருக்கு முன்னாடி நம்ம ஆட்டோ ஓட்டுனர் மாணிக்கம் நின்று இருந்தாராம். நம்ம மாணிக்கத்தை பட்டு வேட்டி, வைரமாலை தந்து சொர்கத்தில் வரவேற்றார்கள். ஆனால் சாமியாரை நூல் வேட்டி மட்டும் கொடுத்து உள்ளே போகச் சொன்னாங்களாம். கடுப்பான சாமியார், "சாதாரண ஆட்டோ ஓட்டுனருக்கு ராஜமரியாதை. அனுதினமும் கடவுளையே நினைத்துப் பாடிக்கொண்டிருந்த எனக்கு இது தானா?" என்று சித்திரகுப்தன்கிட்ட கோவமாக் கேட்டாராம்.
நீ பாட்டுப் பாடி மக்களை தூங்க வச்ச, ஆனா இவர் வேகமா ஆட்டோ ஓட்டி கடவுளை அடிக்கடி நினைக்க வச்சார்னு சொன்னாங்களாம். இதன் மூலம் நாம தெரிஞ்சிக்க வேண்டியது என்னன்னா, யார் என்ன நிலையில் (Position) இருகிறாங்க அப்படிங்கறது முக்கியம் இல்லை என்ன பண்றாங்க (Performance) தான் முக்கியம்.

உங்கள் இலக்கைத் தெளிவாக்கிக் கொள்ளுங்கள். அதை நோக்கி கொஞ்சம் கொஞ்சமாய் முன்னேறுங்கள். வெற்றி நிச்சயம்.

21 வருடங்களுக்கு முன்னர் பாட்டி வீட்ல இப்படி உட்கார்ந்து இருந்தவர்தான்....

இன்று உலகின் அதிகாரம் மிக்க நாற்காலியில் உட்கார்ந்து இருக்கார்.

இனிய நினைவுகளை
இதயத்தில் விதைத்து
இனிதே விடைபெறுகிறது
இரண்டாயிரத்துப் பத்து.

பதிவுல நட்புகளுக்கு என் மனமார்ந்த புத்தாண்டு வாழ்த்துக்கள்.

பெயரில் என்ன இருக்கிறது?

2010-12-26T07:24:00.000+05:30

ஒரு ஊர்ல, அதாவது கர்நாடக மாநிலம் கொப்பால் மாவட்டத்தில் உள்ள குனள்ளி (Gunalli) என்னும் ஊரில் இருக்கும் அத்தனை பேருக்கும் ஒரே பெயர் தான். சாதி,மதம்,தொழில் என பெயரில் எந்த வித்தியாசமும் இல்லை. செல்லப்பெயர், பட்டப்பெயர், குடும்பப்பெயர் என எதுவுமே கிடையாது. ஆண்கள் எல்லோரும் க்யானப்பா (Gyanappa) பெண்கள் எல்லோரும் க்யானவ்வா (Gyanavva) அவ்வளவுதான் வேறு பெயரே கிடையாது. குடும்பத்தில் குழப்பம் வராமலிருக்க பெரியவர்களை தோடா க்யானப்பா & தோடா க்யானவ்வா என்றும் சிறியவர்களை சிக்க க்யானப்பா & சிக்க க்யானவ்வா என்றும் அழைக்கிறார்கள்.

சுமார் 200 குடும்பங்கள் வசிக்கும் இக்கிராமத்தில் பெயரினால் என்னென்ன குழப்பங்கள் வரும் என்று ஒரு கற்பனை (இது நிஜத்திலும் நடக்கலாம்)

யாரைவது நீங்க பார்க்கப்போனால் எப்படித் தேடுவீர்கள்? இங்க க்யானப்பா வீடு எங்க இருக்குன்னு கேப்பிங்களா? அப்படிக் கேட்டால் உங்களை பார்வையிலேயே எரிக்கலாம் வழிசொல்லும் க்யானப்பா.
இந்த ஊர் பள்ளிக்கூடத்தில் அட்டனன்ஸ் எப்படி எடுப்பாங்க?
இந்த ஊரில் போஸ்ட்மேனாக வேலை கிடைத்தால் சந்தோசப்படுவீர்களா?
இங்கு போட்டிகள் நடத்தத் தேவையே இருக்காது. ஏன்னா எப்போதும் எல்லா பரிசுகளும் க்யானப்பா & க்யானம்மாவிற்கே கிடைக்கும்.
வீட்டில் மகளைத் திட்டுவது போல மாமியாரைத் திட்டலாம் மருமகள்.
மூத்தவர் தோடா சின்னவர் சிக்கா. அப்ப நடுவில் இருப்பவர்களை எப்படி வேறுபடுத்துவது?
இந்த ஊரில் கல்யாணப் பத்திரிக்கை எப்படி இருக்கும்?

நிகழும் மங்களகரமான விக்ருதி வருடம் கார்த்திகைத் திங்கள் ஐந்தாம் நாள் சுபயோகம் கூடிய சுபதினத்தில் க்யானப்பாவின் பேரன் க்யானப்பாவின் மகன் திருநிறைச்செல்வன் க்யானப்பாவிற்கு க்யானப்பாவின் (லேட்) பேத்தி க்யானப்பாவின் மகள் திருநிறைச்செல்வி க்யானம்மாவை இல்வாழ்க்கைத் துணைவியாக்க பெரியோர்களால் நிச்சயிக்கப்பட்டு....

அடபோங்கப்பா. சரி இந்த பெயர் எப்படி வந்தது?
பலநூறு ஆண்டுகளுக்கு முன் க்யானேஷ்வர் என்னும் சாமியார் வாழ்ந்தாராம். அவர் இக்கிராமத்தை ஒரு பேரழிவில் இருந்து காப்பாற்றியதற்கு நன்றிசொல்லவே இப்படி பெயர் வைக்கிறார்களாம். வேறு பெயர் வைத்தால் இந்த கிராமத்திற்கு கெட்ட சக்திகளால் தீங்கு வருமென்று இன்னும் நம்புகிறார்கள் இக்கிராம மக்கள்.

இப்படி ஒரு விசயத்தில் கிராமமே ஒற்றுமையாய் இருக்கிறதே! இதே போல மரம் வளர்ப்பு, மழைநீர் சேமிப்பு, மனிதநேயம், மருத்துவ விழிப்புணர்வு போன்ற விசயங்களில் நம்மக்கள் ஒற்றுமை காட்டினால் எவ்வளவு நன்றாக இருக்கும்.

வானவில் மனிதர்கள்

2010-12-23T06:47:00.001+05:30

அமுதத்தமிழ் கடலின்
அலைகளில் விளையாடும்
சிறுவன் நான்.
விரைவில் பயில்வேன்
இலக்கண நீச்சல் - பின்
விலகிப் போகும்
"செய்யுள்" காய்ச்சல்.

இணையத்திரை வானில்
இனிக்கும் நட்புகளே -நீங்களென்னை
வாழ்த்தி வளர்க்கும்
வானவில் மனிதர்கள்.

பனித்துளி கவிதைகளை
பகலவன் என்றுசொல்லி
பாராட்டி பாராட்டி
பதிவெழுத வைப்பவர்கள்.

தொடர்ந்து படிக்கும்
தொண்ணூறு பேருக்கும்
நடுநடுவே வந்து
நல்வாழ்த்து சொல்வோருக்கும்
நன்றி...நன்றி!

கானம் மறந்த குயில்

2010-12-17T06:22:00.002+05:30

சிட்டுக் குருவிகள் பல
வட்டமிட்ட இடத்தில்
கட்டிடங்கள் மட்டும்
கூட்டம் கூட்டமாய்...

இலக்கியங்கள் யாவையும்
இலைகளில் இயற்றிய இனமின்று
கிறுக்கிப் பார்க்கும் தாள்களுக்காய்
கிளைகள் பல ஒடிக்கின்றோம்.

கதவு மேசை நாற்காலி
கைத்தடி காகிதம் கட்டிலென
வெட்டும் தேவையோ தீராது
வேறென்ன செய்வது சிந்திப்போம்.

இப்படியோர் சட்டம்
இயற்றினால் என்ன ?
"இருமரம் நட்டபின்
ஒருமரம் வெட்டலாம்!"

கணிணியில் கவியெழுதிக்
கதவைத் திறந்தால்
இணையக் கம்பியில்
இருகுயில் கண்டேன்.

வனமெல்லாம் பொலிவிழந்து
பணமாகிப் போனதனால்
கட்டிடத்தில் வசிக்கிறதோ
கானம் மறந்த குயிலின்று....

மீட்டாத வீணைகள்

2010-12-11T06:51:00.000+05:30

மன-பாடம் கற்றுத்தரும்
கல்வியின்று வெறும்
மனப்பாடம் மட்டுமே
சொல்லிக் கொடுக்கிறது.

இன்றைய ராமன்களுக்கு
திரையரங்கில் மட்டுமே
தெரிகிறது ஒளிக்கற்றை.
ராமானுஜம் படிப்பதோ
பணக்கணக்கு மட்டுமே.

படிப்புத் திட்டத்தால்
பயம் வளருமளவு
சுயம் வளர்வதில்லை.

பயன்படுத்தப் படாமலேயே
பழையதாகிப் போகின்றன
இளம்ஞான வீணைகள்.

அறிவின் துணையின்றி - வெறும்
அகவையின் துணைகொண்டே
"பெரியவர்" ஆகிறோம் நாம்.

நடைமுறைக் கல்வியை
நவிலாத படிப்பே
நடைமுறையில் உள்ளது.

பாடத்திட்டங்கள்
புத்தகச்சுமை கூட்டினவேயன்றி
புத்திக்கு சுவை காட்டவில்லை.

முக்கால் கிணறு தாண்டவே
சொல்லிக் கொடுக்கிறது
மெக்கல்லோ.

இன்று
வியாபாரிகள் மட்டுமே
கல்வித் தந்தைகளாகி
விற்பனை செய்வதால்
விறகுக் கட்டையாகிறது
வெண்கமலக்காரியின்
வீணை.

கவிதைப் போட்டி

2010-12-07T05:49:00.005+05:30

வணக்கம். இது கவிதைப் போட்டி தாங்க...ஆனா கவிதைகளுக்கு இடையேயான போட்டி. நீங்க இதுல கலந்துக்க முடியாது ஏன்னா...நீங்க தான் இதுல நடுவர்.

நேற்று என் தோழி "நான்... ஏன்...பிறந்தேன்." என்று தொடங்கும் வரிகளில் மூன்று வரி கவிதை எழுதச் சொன்னாள்.

நான் ஏன் பிறந்தேன்
பதில் தெரியவில்லை -உன்னைப்
பார்க்கும் வரை.
என்று சொன்னதற்கு, "நான்" என்று முதல் வரியும் "ஏன்" என்று இரண்டாம் வரியும் "பிறந்தேன்" என்று மூன்றாம் வரியும் தொடங்க வேண்டும் எனச் சொன்னாள்.

சரி. இப்போ போட்டி என்னவென்றால் நானும் என் நண்பர்கள் மூவரும் மேற்சொன்ன விதிகளில் கவிதை எழுதியுள்ளோம். அதில் உங்களுக்கு பிடித்த கவிதைகளை 1 , 2 , 3 , 4 என வரிசைப் படுத்தி பின்னூட்டமிடுங்கள். (உதாரணத்திற்கு 2 , 1 , 3 , 4)

நான் கருவறைத்தாண்டி வெளிவந்த தருணம்
ஏன் கைகளில் தந்தாய் கள்ளிப்பால் மரணம்
பிறந்தேன் பெண்ணாக - பிழையென்றால் யாரிங்கே காரணம்??

2
நானென்றால் நானில்லை நீ
ஏனென்றால் வேறில்லை காதல்
பிறந்தேன் உனக்கென இறக்க.

3
நான் எரிந்து கொண்டிருப்பது தெரிந்தும்
ஏன் அணைக்க மறுக்கிறாய் (நீரே)
பிறந்தேன் உனக்காக (நெருப்பாய்) என்பதாலா?

4
நான் மரித்தேனுன் பார்வையில்
ஏன் பார்த்தாய் மீண்டும்
பிறந்தேன் மறுமுறை.

நீங்க இதில் நடுவர்தான். ஆனாலும் போட்டி விதிகளுக்குட்பட்டு நீங்களும் எழுதலாமே....

பின்னூட்டக்கவிதைகள்

நான் வாழ்ந்ததும்
ஏன் வீழ்ந்ததும் கூட
பிறந்தேன் உனக்காக என்பதாலே! (பாலா)

நான் விடியல் எனத்தெரிந்தும்
ஏன் விழிமூடிக் கிடக்கிறாய்
பிறந்தேன் மீண்டும் இறப்பேன் என்பதாலா? (பாலா)

நான் நீயானேன்
ஏனென்றால்
பிறந்தேன் அதுக்காகத்தானே! (அன்புடன் மல்லிகா)

நான் உனக்குள் உறைந்தேன்
ஏன் எனக்குள் கலந்தாய்
பிறந்தேன் உனக்காவென்றா! (அன்புடன் மல்லிகா)

நான் நானாக இருக்க,
ஏன் நீ மட்டும் வேறாகப்
பிறந்தேன் (பிறந்து ஏன்) பழி தீர்க்கிறாய்.? (G M பாலசுப்ரமணியம்)

நான் தமிழனென்றேன்
ஏன் திருப்பிக்கொண்டாய்
பிறந்தேன் ஈழத்தில் என்றா ? (சிவகுமாரன்)

நான் நலமில்லை
ஏனென்று நீ கேட்காததால்..
பிறந்தேனோ நீ புறக்கணிக்கவே...(தேனம்மை லெக்ஷ்மணன்)

நான் ஏங்குகிறேன்
ஏன் தாமரையாய்
பிறந்தேன் நீரின்றி,(என நினைந்து). (காளிதாஸ்)

நான்,நான் என்ற மனம்
ஏன்,ஏன்,எனக் கேட்க
பிறந்தேன் ஞானியாய்,பிறக்கும் போதே. (காளிதாஸ்)\

நான் என்ற கர்வம் ஒழித்து
ஏன் என்று சிந்திக்க
பிறந்தேன் இவ்வுலகிலே...(ராஜி)